小傳日記 | 50年港資玩具廠走入歷史，玩具OEM代工如何死而復生？
最終都係捱唔住！曾經喺4月傳出四間廠一夜同時執笠嘅華盛玩具，母企南華集團(00413)噚日公布，高院已經正式頒令華盛玩具清盤，意味香港製造業又少咗一個老字號。
但實情華盛玩具早就已經唔係香港製造，公司喺1976年香港成立，80年代就因應改革開放遷移廠房返大陸，高峰時期喺廣東、廣西甚至越南總共設有11間廠，員工最多有兩萬人，係全球數一數二嘅玩具OEM代工廠，包括美泰嘅Barbie公仔、孩之寶嘅小魔怪Furby都係由華盛玩具代工生產。雖然唔係香港本地生產，都算係香港工業代表。
睇返南華集團份中期業績都的確好曳，上半年虧損由去年同期9177萬擴大到4.33億，收入斬一半由8.92億降到得返3.81億。以地區計最出事係來自歐美廠商，美國收入由3.91億跌48%至2.16億，歐洲更加由2.21億跌到得1785萬，大跌九成二，剩餘訂單規模縮減到微不足道。整體OEM玩具代工而言，總收入由去年同期6.26億大跌83%，得返1.04億，分部虧損2.43億；南華集團解釋因為消費意欲疲弱、經濟放緩、美國關稅之類嘅因素抑制全球對玩具等非必需消費品的需求，令集團主要美國客戶「採取保守及規避風險的訂購策略」，即係cut單，因此南華集團決定cut loss、終止OEM玩具業務都好似理所當然。
唔做玩具OEM，南華集團就話之後會以貿易型為主，轉做輕資產中介角色繼續發展玩具業務，並且其實南華係仲有造鞋業務，上半年收入都有1.7億兼按年增8%，集團嘅實業生意仍然有得做。
歸根究底，就係玩具OEM模式嘅技術門檻實在太低，競爭極大，令代工廠嘅議價能力好低，只可以鬥平鬥實惠。唔少以前做開OEM嘅工廠都會積極提升技術，改做ODM，即係Original Design Manufacturer，一手包辦產品設計、研發同生產，再尋求同品牌商合作，例如布魯可(00325)具備專利積木零件技術，參考Lego發展路線，吸引唔同IP同意授權；又或者有啲玩具公司把心一橫，自己開發IP，例如泡泡瑪特(09992)將香港藝術家龍家昇設計嘅Labubu公仔發揚光大，揚威海外自然生意滾滾來。
想當年華盛玩具最成功嘅產品就係小魔怪，可愛毛毛寵物會發聲又會互動，當年風靡全球。只可惜小魔怪說到底只係其他公司嘅IP產品，就算有幾成功都不過係為他人作嫁衣；再加上神州工藝技術不斷進步，而家嘅機械人機械狗識行識走仲識講心事，傳統玩具廠冇外來資金支持，又可以追到幾多呢？
講開又講，玩具長做長有，人類喜歡耍樂嘅童心從來唔會變，但贏家每隔兩三年就換一次人，Toy Story最新一集話Gen Alpha小朋友人手一個pad，但又有邊個會諗到而家最hit嘅玩具竟然回歸到爆旋陀螺同pokemon卡？等到以後機械人大規模量產，智能陪伴玩具大行其道，到時Toy Story又可以拍多集警長胡迪大戰AI機械人，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。