跟住名人去旅行 星級旅遊締商機
港人熱愛旅遊，一年去三數次旅行實屬等閒事，旅遊目的地亦愈來愈刁鑽，近年更吹起一股跟住名人去旅行風，不少旅行社瞄準機會，禮聘當紅旅遊達人或KOL隨團出發；另有專辦深度遊的旅行公司，邀沈旭暉、林超英等有份量的學者或專家隨團出發冷門國度，以明星或名人效應吸引旅客報團。
被網民譽為新一代日本通的周奕瑋，憑《周遊東京》的推介夠貼地，形象夠入屋而走紅。被奠定達人地位後旋即被旅行社找來做代言人，帶完一團又一團的日本團，今年再加埋代言韓國線。
自言小時候有個導遊夢的森美，由他主持的《森美旅行團》反應熱烈，東瀛遊老闆禤國全即乘勢邀請他帶團到日本德島，親民的森美更大獲團友歡心。
這股跟住名人去旅行風氣更殺入財經界，著名基金經理「英Sir」黃國英近年亦獲旅行社邀請帶股民去旅行兼講股，他笑言最深刻是在郵輪上與股民「困獸鬥」，聆聽股民們的炒股故事。
團費方面，獲星級導遊加持的旅行團，團費尚算貼地，以日本團為例，最貴2萬元有找，難怪團團爆滿，同時造就旅行社開拓星級旅行團商機。
日本窿周奕瑋 蒐集知識拼圖 砌出明星路
「呢間餐廳好堅㗎，每晚8點都有A5和牛拍賣。我哋平時在香港試過投車牌，但投地就沒資格，來到東京，點都要投件和牛返去食吓卦！你喺呢度可享受做地產商嘅感覺，還有看到這個財團（食客）跟另一個財團（食客）喺度爭嗰（每口叫價）100日圓！」2月的某一晚，電視正播放周奕瑋主持的《周遊東京》節目，不經常看電視的記者也被這段在大牌檔格局的餐廳競投和牛，充滿現場感的即興「Tag」吸引，於是坐下來看看這位新一代日本通首次擔大旗主持的旅遊特輯，感覺他的推介更貼地更入屋。
Profile
周奕瑋（Jarvis）
34歲
學歷︰
‧喇沙書院畢業
‧香港理工大學語言及傳意學學士
‧東京國際大學日本語學校，曾考獲日本語能力測試（最高）N1級資格
‧部分主持節目/特輯︰娛樂新聞台主播、《STAR TALK》、《三日兩夜》、《街坊廚神之舌戰東京》、《周遊東京》等等
難得教路港人在日本競投和牛，每集也有足以令日本迷失控的精明旅遊推介，如100日圓100秒內任搶衫、0円Pizza、100円吞拿魚放題，甚至是遊日冷知識，如入神社參拜時，要經參道兩旁進入，而兩邊步道又以走左邊更好，參拜者不走中間，以示對神明的尊重。「節目有編審、Writer，但自己也有諗Tag，因去到現場臨場發揮好靠自己，我用好多Hashtag，如「#自己牛自己投」等，自己去到嗰個位忽發奇想可以這樣Round-up，係自己諗出嚟！」
不懂就學 絕不Hea答
2006年大學畢業後，周奕瑋即投身娛樂圈，曾在日本留學的他，經常被指派訪問日本藝人和參與旅遊節目，以一口流利日語奠定日本通形象，他說這條路就像砌拼圖一樣，是「逐塊逐塊砌出來」。
周奕瑋不諱言，他的Facebook專頁經常收到詢問遊日信息，但當中有許多都是他不懂的，如有人妻代愛好釣魚的丈夫問︰「邊度有抵買的釣具？」不懂不會扮懂的他，卻視之為一個學習機會，會盡量找答案回答網民，享受這學習過程。
周奕瑋推介港人到東京旅遊時，可去競投和牛，一嘗當「財團」的滋味。他當天就成功競投兩件A5和牛回來。
「就算日本人都唔會知道咁多嘢，其實每一樣嘢都係透過不斷的學習，然之後去儲一啲嘢返嚟。就係因為有咁多人去問我呢啲問題，反而迫到我不斷去學習和吸收資訊返嚟。你問我嘅嘢，都唔係Day One就識，係靠在嗰邊生活（留學日本）經驗，留意人哋做法觀察得來，到需要時就拎出嚟用。」個子不算高的周奕瑋，帶點娃娃臉，笑容又親切，予人鄰家男孩感覺，對網民的舉動更是窩心，可以說是旅遊界的黃大仙，有求必應。
周奕瑋愛旅遊，去日本次數更多不勝數，早前曾到訪札幌雪祭。
《周遊東京》播完後，周奕瑋收逾千個網民向他查詢遊日信息，即使工作排山倒海，但為保住旅遊分享者這貞節牌坊，他笑言也會抽時間盡量回覆。「我一係唔答，但唔想求其答，呢個一向係自己做人做工作態度，唔想Hea人哋。」試過有位單親媽媽話會與兒子去名古屋旅行，還附上每日行程問安排是否妥當，但周奕瑋當時事忙未有即時回覆，單親媽媽後來再給他發信息。「她說仔仔3歲時去過日本，好鍾意這個地方，現仔仔7歲，唔知幾時可兩母子再去。睇完好感動，我也好想小朋友去得開心，漏夜覆幾千字，係人與人的Connection，旅遊其實係分享，我會盡力，但不能夠保證每個人都覆到。」
每集《周遊東京》播出後，周奕瑋即整理每集重點，並放上網供網民參考，獲網民大讚勤力，資料又詳盡又實用。
苦學日文 因兒時愛打機
被網民封為新一代「日本通」，他謙虛說只是「日本窿」。「我覺得日本通呢個詞有毒，我唔會話自己係日本通。我喺香港住咗30幾年，我都唔能夠話自己係香港通，你永遠都唔會知道晒成個香港。日本實在太大，食物、旅行、文化、歷史、自駕遊、動漫、經濟，你要通精所有嘢先稱得上通吖嘛，好老實講，我一定唔會知得晒！」
「我話叫日本窿，因好多人不斷問你嘢，我不斷吸收，即不斷把不同資訊擺喺呢個窿度，填滿呢個窿，變成真係可以知道好多嘢。我係嗰啲打爛沙盤問到篤的人，如日本人的打包文化，點解佢哋唔打包呢？我會去了解點解，學到知識更立體及全面。即好似香港人（吃飯時）不可飛象過河，這些埋藏在生活嘅知識，大家都覺得好理所當然，但外國人不知，我只做少少功課話俾大家知，但唔係咩驚天動地知識分享。」從說話中感受到他的態度，也不難發現他爆紅是有道理。
八十後的周奕瑋成長階段，亦是日本文化最流行的時期，也是他踏上日本通之路的第一塊拼圖。他學日文是因他鍾意打機和看日本漫畫，但以前那個年代的角色扮演遊戲（RPG Game）沒有繁體中文版，玩時不明怎樣能取寶物，於是中二升中三那年暑假便去學日文。
「我覺得日本文化在東南亞比較獨特，日本諗嘢思維模式同東南亞不一樣，再去了解時發覺原來呢個Mindset好值得借鏡喎，自己都好怕俾麻煩人哋，覺得盡量唔好令人地有困難地方。」
周奕瑋說得一口流利日語，經常被指派訪問日本藝人，如「大口仔」香取慎吾，奠定其日本達人地位。
明星效應 吸引粉絲報團
在初入無線電視娛樂新聞台，不論是幕前或幕後工作都有觸及，包括資料搜集、剪接、度蹺、翻譯字幕都肯做，其中一個《STAR TALK》環節不時要訪問日本藝人，由於當時未有識日文同事，許多資料搜集和翻譯都由他一腳踢。周奕瑋又先後參與過《三日兩夜》、《街坊廚神之舌戰東京》等與日本旅遊有關的節目，亦開始被外界認同他是一個對日本旅遊有知識的人，同時也為他帶來搵錢的工作機會。
「後來永安（旅遊）主動搵我傾做日本市場代言人，永安有咁耐歷史，搵你做即認同咗啲嘢，後來更多不同界別認同，如TVB周刊寫日本專欄，日本旅遊局邀請做Guest Speaker出席活動，好似砌Puzzle咁逐塊逐塊砌番嚟。」近年，不少旅行社開拓跟明星或旅遊KOL出發的旅行團，永安也看準機會，前年找來人氣急升的周奕瑋代言日本市場，兼帶團遊日本，如由他帶團的北海道雪祭5天團，團費1.3萬元，較普通旅行團約貴一成。第一團是去年9月尾10月初去立山及大阪，今年2月的第二團則去北海道雪祭，本月則再帶團去立山，每團均有二三十人，每次只辦一團，但團團爆滿。
跟得團出發的旅客，大多數是中年或以上的退休人士，問及團友為何會跟他的團，周奕瑋有這樣的估計：「可能之前已有（日本達人）形象，佢哋又鍾意跟團，而有我的團（團費）只多10%。有時睇電視覺得我好Cheerful，橫掂跟團就不如跟你。第二團（去北海道）有我的粉絲（報名），有少少明星效應，她曾留言說已報團，問到時可否和我去影貼紙相，去到當地又搵到影貼紙相的機，又跟她們夾公仔。」周奕瑋笑言自己只是星級吉祥物，親民的他會跟團友一齊玩，又會在在旅遊巴上跟真導遊「搭吓咀」，有時又當上翻譯，推介邊間蟹店好吃，又分享自己遊日心得，甚至會跟團友聊天，說說電視是怎樣的一行。
再學外語 增實力爭機會
雖是明星或KOL身份，但周奕瑋卻無架子，甚至做足帶團前準備，做好資料搜集，如搵定雪祭的影相打卡位。「做咗旅遊節目主持後發現，旅遊節目主持和鍾意去旅行的人的分別，係後者鍾意睇自己旅遊嘅資料；前者其實係一個媒體，要同人Share，唔好話好有心得，但你都要知囉。但如知嘅嘢好似旅遊網站，無個人化、不Unique，甚至連唔識都話識，咁人哋Send去社交網站問都可答到，不會問你。」就是擁有這種態度，這才能當名副其實的日本通。
周奕瑋在旅遊節目中，又會分享冷知識．如入神社參拜要走參道兩旁，以示對神明尊重。
好學的周奕瑋，除了日文了得，考獲日本語能力測試N1級最高資格，近兩年又跟韓國老師苦練韓語，再為他鋪下另一個機會。《周遊東京》收視理想，電視台再乘勝追擊，即計劃下一輯旅遊節目給他，除了去日本，還會去其他國家地方。
至於代言人方面，永安旅遊今年安排周奕瑋代言韓國市場。「我自己又好，永安和TVB都覺得其實唔只可做日本Market，我個人比較隨緣，Go with the flow，如果大家覺得有呢個空間，咁咪試吓囉，我自己覺得做旅遊節目，係想去認識多啲人、發掘唔同人的故事，就算你溝通唔到，只用笑容也可溝通。」擁有語言天份的周奕瑋，還透露繼韓語後，下一個想學泰語。
周奕瑋貼士 醒住遊日本
‧去小型超市和便利店購買零食、飲品或日用品，如「SHOP99」，店內全部貨品未計稅均售99日圓，連稅後也只是107日圓，較大型連鎖便利店划算，雖然樣樣貨品都抵賣，但要選擇日本製先精明。
‧去便利店或超市購買有氣酒，較其他啤酒便宜三分一至一半價格，但酒精濃度不高，不少日本人以這酒代替真正的啤酒。
‧如4個人去旅行，而目的地屬兩三個站短程的話，不一定要搭地鐵或火車，反而搭的士仲慳時間，兼慳上上落落地鐵的腳骨力。
‧如去東京旅行，或會搭JR山手線，但日本人不會搭山手線，因要兜大圈，而是會搭地鐵，因更慳時間，轉車也較方便。
經常遊日 被海關懷疑偷運黃金
周奕瑋未做旅遊目前，是娛樂新聞台主播，經常飛外地採訪。直至日本旅遊達人形象被奠定後，現飛日本次數就更加多，平均每月飛一至兩次。問周奕瑋去過多少次日本，他笑稱以前都數過次數，但現已數不到去過多少次。
被奠定日本通形象後，周奕瑋即獲旅行社簽做代言人，代言日本線。
一本厚版的特區護照有48頁兼有10年期，周奕瑋手中的護照，還有5年才到期，但因去得日本太多，最近已要更換一本新護照。
「去年年尾連續去咗幾次日本，如去完東京留港一兩日，再去東京留廿幾日，再返港再去北海道。入境北海道時被攔截，查問點解咁短時間來日本咁多次，還問我係咪偷運黃金？因嗰陣時好多內地人走私黃金或金條去日本。」周奕瑋續稱，入境有告示警告，偷運黃金是罪行，他亦無奈地被日本當局人員搜勻全身。他笑言：「件事我自己睇都唔Make sense（短時間內多次入境）啦，何況海關人員。 」
黃國英帶隊上郵輪 摸杯底 講股仔
跟住名人去旅行的風氣，近年更殺入財經界。人稱「英Sir」的豐盛金融集團資產管理董事黃國英，可以說是第一位被旅行社邀請「帶團」的基金經理，讓股民邊旅遊邊問股市。
Profile
黃國英（Alex）
49歲
‧香港大學經濟系學士
‧1990年開始從事金融行業
‧1996年中轉投證券界
‧2007年自立門戶，現為豐盛金融集團資產管理董事
‧著作：《四両撥千金－黃國英小本致富六大招式》、《自己做基金經理》、《黃國英68招》等
去年10月，黃國英帶3日2夜的郵輪團，名副其實出公海講股。回想起這趟旅程，黃國英笑言最難得是兩晚與股民團友「困獸鬥」，由晚上10時開始，足足聊天近3小時。「對我們來說可與客戶長時間接觸，因我們有好多鐵腳，嗰團不識的只有7、8個。在郵輪上困獸鬥，吹水聽別人的（買股）故仔，我又講吓意見，不似一般講座咁我有我講點睇，你有你問邊隻邊隻股，而係我哋摸住酒杯底，講吓佢哋買股的經歷。」
去年10月，黃國英帶郵輪團，與一班忠粉股民在公海吃喝玩樂兼講股市。
一來會友 二來考察
當整天郵輪節目完畢後，忠粉股民即把握機會請教「英Sir」，當時人數多到還要分兩枱坐，最令他深刻是騰訊（00700）的話題。「因為我哋真係帶挈好多人買騰訊賺錢。」
黃國英指，當時搞郵輪團，其中一個原因是其公司較看重郵輪股，所以順道實地考察一番。但由於求過於供，旅行社因「攞唔到房」而要局限團友人數，最後只可給20至30人報名。今年8月中旅將再接再厲，但就放棄開辦郵輪團，改為開辦2日1夜的中山純玩團，講到明跟「英Sir」去玩去食，更標榜48小時可黐實他，節目還包1小時港股講座，團費1,699元。據知廣告推出僅一星期，已有33人報名參加，反應踴躍。
講起中旅社主動邀請黃國英帶團，話說是他2012年開Talk Show，當年由中旅社贊助，他則以帶團作為回報，而過去亦曾為旅行社帶過上海、杭州等「講股團」。
黃國英跟旅行社與股民去過杭州旅遊講股，自己公司又不時搞股民飯局，聽聽股民買股故事之餘，又可作為Talk Show題材。
另一次經歷則是出席一艘郵輪的講股講座，但由於該船主力做內地客為主，加上當時港股通又未開通，內地人不太懂港股，反應較差，只有約20人坐下來聽講座，所以試過做一次就不再做。
黃國英過去曾開多場Talk Show，但原來除講座以外，他的公司也有舉行飯局，如與客戶吃法國大餐，目的是多與股民客戶接觸。「不同年齡股民關注的都不同，後生一輩關注邊個Stage炒得好啲，而上咗年紀的大部分睇Upcoming點炒得好啲，多過用咩方法去炒。」他又自言對搞飯局或帶團持開放態度。「可以吹吓水、輕鬆啲，可以睇到我喺台下講嘢個樣，台上好Formal、好權威，台下Down to earth好多。」
貼地親民 聽血淚史
另一個好處是，接觸多些股民，多聽些別人的故事，並把故事融入Talk Show中。「當中有個大學畢業一年的後生仔，自己用補習儲蓄得來的40萬元炒股，現這筆錢已滾至百多萬元，但他並不安心，反而覺得不安，因不知如何Handle下去，覺得賺大錢只是好彩。但我冇諗過竟然有人（賺大錢）會咁諗！」
至於跟住財經界名人去旅行的風氣會否愈來愈多？黃國英這樣回應︰「在財經界就難啲，因要有一種號召力先容易（吸客），相比搞Talk Show賣到飛收到錢會容易啲，帶團較複雜，收到錢帶團的不多，因未必個個肯下海！」但肯下海帶團的黃國英笑指，帶郵輪團的酬勞全部用作隨行家人身上，說畢即哈哈大笑起來。
港人愛外遊 次數冠全球
根據世界旅遊組織數據所示，2016年中國出境外遊消費總額達2610億美元，按年增12%；第二位為美國，消費總額為1240億美元，按年增8%；而第三位為德國，消費總額為810億美元，按年增5%；或許是將港人遊深圳次數計算在內，每名港人平均年去11.4次旅行，成為全球之冠。但以人均消費計算而言，港人人均消費力最強，排名第一，人均消費力達2.6萬港元；第二位澳洲人均消費力為1039美元；至於第三位的德國，人均消費力則為982美元。
森美禤老闆隨團 客人報名 唔講價
港人熱愛旅遊，一年去三數次旅行實屬等閒事，旅遊目的地亦愈來愈刁鑽，傳統旅行社要不斷推陳出新，迎合港人要求。
早前，森美與東瀛遊合作，帶團遊德島，團費貼地，2萬元內有交易。
在港經營31年的東瀛遊（06882），自2004年起，不時聘用藝人帶團，提高旅行社知名度。東瀛遊執行董事禤國全（Steve）接受本刊專訪時表示，公司早期已聘請過食神梁文韜（韜韜）、藝人裕美、「美女廚神」Kit Mak（麥潔兒）等人帶團，「當年播完《日日有食神》，搵韜韜合作帶美食團，希望以明星的知名度，帶動更多人認識東瀛遊。」旅行社發展至今，已儲下一定名氣，現時聘請明星帶團，主要用作推廣旅遊新地點。
自2009年起， 東瀛遊執行董事禤國全每年都會帶美食團，平均一年帶7團。他笑言自己帶團，同事最開心，「因為搵藝人有成本，但我帶就唔使計成本嘛！」
Profile
禤國全（Steve）
•東瀛遊旅行社執行董事兼品牌代言人，有30多年經營旅行社經驗
•自2009年起帶美食團，平均一年帶7團，有「瀛遊達人」之稱
團費貼地 名人效應奏效
去年底，旅遊節目《森美旅行團》在無線播出後，觀眾反應熱烈，東瀛遊趁勢聘請主持兼名DJ森美，以「森美去德島，您都玩得到」的押韻口號作招徠，在今年2月帶團到日本德島旅行。雖然有藝人加持，但團費非常貼地，約1.6萬元有交易，吸引39名團友報名參加，「在推廣新旅遊目的地，名人有一定效應。」
近年，大台播出旅遊節目大熱，連帶主持的藝人名氣大增，尤以日本旅遊節目最為受落。《關西攻略》主持杜如風，曾與縱橫遊合作，推出團費逾12萬元的旅行團遊東京。今次森美帶團玩德島，貼地的團費吸引大批客人報名，及後更在3月加開一團，並增添一天大阪遊元素，團費亦不過2萬元。
自言小時候發過導遊夢的森美，雖然未曾做過導遊，今次帶團亦只是半玩半導遊的形式參與其中，但在出發前，森美落手落腳幫團友掛好行李牌、派發護照，並提醒團友集合時間。旅行期間亦不時娛樂團友，炒熱氣氛，就連老細禤國全都大讚森美「跟得好足」。
第一次做領隊的森美帶團遊德島，不時幫忙派發護照，亦細心向團友講解集合時間。
雖然聘用藝人帶團有助推廣，不過要與藝人「夾旅行團時間」亦是一大難題。以森美為例，他既有固定主持的電台節目，亦有其他工作，「適逢去德島，出發的航班時間上亦有限制。」遷就時間上非常困難。
森美不時炒熱氣氛，就連老細禤國全都大讚森美「跟得好足」。
老細出馬 捧場客遊世界
「紅褲子」出身的禤國全有多年領隊經驗，雖然是老細，但他並不止坐在辦公室「涼冷氣」，自2009年起親自帶美食團，平均每年帶7個團，高峰期時更試過一年帶10個團。「搵藝人去做有名人效應，但佢哋始終唔係做旅遊，點都唔夠我本人熟。當我哋睇到呢個市場（有得做），而請名人帶團有成本，倒不如自己親自接觸多啲客人，知道佢哋想要啲咩、有乜嘢要改善，遂開始做美食團。」這些豪華美食團，力sell可坐商務客位來回目的地，不論食物、住宿和體驗都是5星級享受，團費動輒10萬元以上，仍有價有市。
「我自己會睇住安排俾客人食嘅嘢得唔得，如果你唔即時Action，客人喺背後已經咬緊耳仔，講呢樣講嗰樣，輸晒㗎啦。」舉例說，有一年聖誕帶北海道團，晚上劏了一條重逾70公斤的金槍魚予團友享用，Steve眼見魚太瘦，油份唔高，馬上跟客人說，「我聽日會再劏過一條金槍魚俾大家，因為條魚比我身形仲好，個腩唔夠肥，食落唔滿足。如果你搵藝人帶團，佢唔會同你決定，因為要自己攞錢出嚟，最後邊個畀錢呢？」
顧客有求 老細立即開團
旅行社舉辦的美食團多年，有一群忠實粉絲，跟隨老細Steve走遍全世界，法國、意大利、西班牙、北歐、澳洲等地都踏足過，「其實客人好多地方都去過，佢哋要嘅唔係行程豐富，節目緊湊，而是要（行程）特別、舒適和豪華。」部分「刁鑽」的客人更親自落Order，希望老細帶團到印度，「當時，有客人話︰『Steve我想去印度，不過我唔敢去，不如你搞啦，你帶團我就敢去啦。』」結果在2010年，旅行社真的舉辦印度團，報名參加的團友逾40人。
舉辦這些豪華團前，Steve和團隊均會在出發前9個月，親自到當地勘察，「我經常同同事講，我哋搞呢啲團，真係要畀足嘢客人。因為客人從來無同我哋講過價。」旅行社亦會在宣傳單張上清楚寫明所有的行程，減少誤會和爭執，「如果做Long haul，更會做一本書仔，寫清楚每日觀光地方、酒店、餐廳地點，甚至連菜單都放埋喺裏面。」
今年暑假，旅行社將舉辦東非團睇動物大遷徙，當中更會坐兩程私人專機和一程直升機觀光，以減省交通時間，這個9日的東非團團費高達17.3萬元。除了豪華團外，旅行社近年亦舉辦中檔旅行團吸客，「好似一般去日本，平均團費是8,000至1萬蚊左右，我哋近年做咗啲2萬幾蚊嘅亞洲團（如韓國、日本），住和食都高級少少，由一般導遊帶領。」客人亦可以要求升級成商務客位，以換取更舒適的旅遊享受。
90後創旅行公司 邀學者旅人領深度遊
4年前成立的GLO Travel，由九十後陳成軍（Rubio）和張振華（Jamie）創辦，主打冷門旅遊地如北韓、緬甸、烏克蘭等國度的知性遊，創造一種新旅遊模式需求。後來二人把知性遊變得更立體，加入熟悉當地的專家隨團出發，如找來學者沈旭暉和戰地記者張翠容隨團去烏克蘭，還安排團友與切爾諾貝爾核電廠生還者傾偈，了解當年故事。
專家隨團旅程夠深度
「張翠容2014年曾到過烏克蘭採訪橙色革命，有第一身觀察。她又邀請當時遇到的一位當地記者朋友做（知性遊）導賞，讓團友有置身現場感覺，了解當時事件和脈絡。這（體驗）與去到一個地方，只望一望廣場好唔同；通過拜訪，團友可知道背後更多小故事，因為好多時候，好多小故事係唔可以透過新聞睇到，但透過當地人分享，可加深團友印象和了解，這是好重要的賣點！」去年才加入GLO，負責項目策展的九十後邱港南（Marco）曾跟沈旭暉和張翠容帶團友到訪烏克蘭，他認為如何帶到體驗給團友更為重要。
沈旭暉（右）與團友到訪切爾諾貝爾核電廠，與生還者傾談，了解當年事故。
最近，前天文台台長林超英以專家身分隨團出發到烏茲別克，他由唐玄奘西遊、烏國著名數學家Algoritmi ，到蘇聯中亞政策失誤等話題，每天跟團友分享他們可能從未聽過資訊。「林超英曾寫過文章，以Google Earth睇番當年大唐西域記，唐玄奘由古中國行去古烏茲別克撒馬爾罕，到中亞鹹海（面積）縮到冇的生態災難，他有那麼強知識的投入，（烏茲別克團）係好適合他去講。」Rubio說。另剛推出新書《西藏西人西事》，分享旅居西藏10年奇聞的薯伯伯（Pazu），最近亦以專家領隊身份，帶領團友去西藏和不丹。
著名旅人薯伯伯（右）旅居西藏10年，帶領團友遊不丹，發掘幸福國度背後的真實面貌。
曾到過烏克蘭採訪的張翠容（右）亦有隨團出發，重遊舊地。
林超英（前排左二）以專家身分隨團到烏茲別克，與團友分享唐玄奘西遊、由古中國行去古烏茲別克的有趣故事。
「（專家）長輩重視唔係你俾幾多錢，而係你團隊做事認唔認真，理念係咪同佢一致。（隨團專家酬勞）金額不便透露，但有前輩將我哋預備俾佢份錢，捐俾善慈機構。（我們的合作模式）未必完全係商業世界，我傾吓你幾多錢，又摸下底，我地冇做呢樣嘢，可能係咁令大家一拍即合。」Jamie分析與隨團專家的合作關係。而旅行公司在接觸專家時，會跟對方決定前往哪一個國家地方，以及建議初步行程，專家如有想去的地點可要求修改，務求達到平衡。「我相信係大家的着眼點不同，一般KOL重視購物或佢成日去一個地方的觀察，而我哋係對社會文化本質有深入理解。」
學者議員旅人作專家
Rubio分享最近看過一篇的Blogger文章：「有人問這位去過伊朗旅遊Blogger，點解當地女仔有些戴五顏六色頭巾，但有些又好保守，戴着遮剩個頭的黑色頭巾？Blogger回答：『帶頭巾時鬆時嚴，冇乜所謂』，但其實背後唔是咁簡單，我Research過係分城市，如聖城庫姆，差不多百分百是戴最傳統（頭巾），而宗教文化重的伊斯法罕亦比較保守，德黑蘭首都或南部設拉子則可以五顏六色，其實係有得解釋，我哋會透過專家行程去了解社會的面貌脈絡。」
他們不諱言，初期的隨團專家是在圈子以內尋找，如找來股東之一的沈旭暉和前政助陳智遠，後來擴闊至圈子以外。除了薯伯伯、林超英、張翠容，曾經或將會隨團的專家更包括建築師黎雋雄、中大教授王劍凡、環保專家古偉牧、中大學者梁啟智和前立法會議員「長毛」梁國雄等。
知性遊瞄準市場缺口
至於會否找學者或專家以外的KOL隨團？Jamie有這看法：「我諗係個形象，或雙方所需要的係一致。如我哋群眾有興趣而佢又認識，我哋不想定型，一定係要教授或學者，如薯伯伯本身對社會文化有好深厚認識，我地唔一定搵有學術背景的人，而佢專長的是要同我哋的群眾一致，不會話排除邊啲人。」
目前，有專家隨團的旅行團佔總旅行團團數三分一，團費比沒有專家隨團高約10%至15%，但已有一班捧場團友。「隨着熱門地方愈來愈容易去，覺得傾向係會有更加多人對冷門少少國家有興趣，但如傳統旅行社只代訂機票和酒店係會式微，旅客對旅行團形象想像，比十年前有好大變化，我哋想做呢件事（專家隨團的知性遊），相信也是帶領潮流。」兩位九十後老細不諱言，去旅行主流仍是玩樂，但能體驗的知性遊，才是旅遊，也是二人的初心。
轉載自《iMONEY智富雜誌》