《魚缸博客》和譽橫行整固待破，中長線上望7.38銀

　　《魚缸博客》美國感恩節過後，美股三大指數近日維持喺高位徘徊，向上突破定係向下調整，真係行咗出嚟先知。
　　港股好似打咗慒仔針咁，間中醒下就彈一彈，之後又再呆呆滯滯，就算外邊有咩刺激都冇反應。個股方面，今日都係捉隻有消息、有反應嘅醫療股和譽(02256)講下。
　　和譽主要從事研發、製造及商業化生物製藥，專注於小分子腫瘤療法。集團尋日發公告話，集團嘅CSF-1R抑制劑Pimicotinib治療晚期胰腺癌II期臨床試驗完成國內首例患者給藥。
　　集團喺通告指出，Pimicotinib係和譽醫藥獨立自主研發嘅全新口服、高選擇性、高活性CSF1R小分子抑制劑。研究表明，阻斷CSF1/CSF1R信號通路可調節同改變巨噬細胞功能，有助於重塑腫瘤免疫抑制性微環境。
　　和譽喺2021年10月13日上市，招股價12.46銀。集團截至今年6月30日止半年度，收入1906萬人仔，主要來自集團向艾力斯收取作為預付款項嘅授權費收入。股東應虧損逾2.08億人仔，舊年全年就虧損逾4.95億人仔。集團現金及銀行結餘逾21億人仔，較截至2022年12月31日止減少1.564億人仔。
　　暫時睇，和譽未有咩收入，不過集團話喺今年7月，Irpagratinib嘅II期臨床試驗申請獲受理。係Irpagratinib喺單藥肝癌二線治療取得優異初期結果後，即將開展嘅一個聯合用藥臨床試驗。投資者要俾啲時間等下喇！
　　股價走勢上，和譽喺11月6日升破3.5銀收市，之後維持喺3.5至4銀之間橫行整固，似準備向上突破，不妨等股價試番3.5銀先入市，止蝕訂喺3.3或3.1銀，短線上望4.5銀先，中長線上望7.38銀。(pc)

《編者按》本欄搜羅即市傳聞，惟消息未經證實，《經濟通》亦不保證內容之準確性。