AI概念長炒長有，百度(09888)今個月中出完文心一言，雖然事先戴定頭盔話好多部分都未完善，不過用喺上嚟上面網民都係有好多意見，譬如早排就被人發現文心一言製圖功能原來係請槍用外國AI模型，當然令唔撐國貨嘅神州網民失望。
於是噚日百度就加碼推出「文心千帆」，好多報道都話佢係文心一言升級版。其實由字面都可以估到，升級嘅程度當然就係由「一」到「千」，當中已經包括埋成個文心一言喺入面，同時再加埋全套文心大模型，以至係相應嘅開發工具鏈，遲吓仲可以做埋開源大模型，即係將自己開放畀其他AI參考，好似而家文心一言用咗人哋個模型咁。
文心千帆主要針對企業級客戶，所以百度都係以閉門形式向企業客戶發布文心千帆。據有份參與嘅記者報道，文心千帆可以3分鐘自動生成簡報、虛擬主播直播帶貨、訂酒店機票等等都做得到，比起平民版嘅文心一言都做多好多嘢。
而且文心千帆係針對企業客戶，當然都係要收錢，將會以每1000 tokens收1.2分人仔，以調用輸入輸出總字數收錢。Token係聊天機械人計算字詞單位，以對手ChatGPT方式計，1個token約莫係4個字母，大約4分之3個英文字。而ChatGPT每1000 tokens收0.2美仙（折合大約1.37分人仔），計落文心千帆就平過ChatGPT。
當然做簡報訂機票呢啲都只係現時有報出嚟嘅文心千帆功能，可能仲有更多功能都未定，不過都要等更多幫襯咗嘅用家講用後感。百度老闆李彥宏就好有信心，話其實文心同ChatGPT唔係差好遠，學習量都只係差一兩個月，呢段時間日日開夜車都追返唔少距離。而文心千帆推出收費服務之後，相信就係開始睇得見聊天機械人變現能力嘅時候，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】本港主要銀行跟隨美聯儲減息，你對樓市前景有否信心？► 立即投票
