《小傳日記》港股新丁綠茶餐廳話自己現點現做，招股書點講？

　　《小傳日記》最近行商場有時會聽到有人彈古箏，原來係神州「初代網紅餐廳」綠茶嚟咗香港開分店，喺香港開分店只係gimmick嘢啫，戲肉自然係來港上市啦。綠茶餐廳經營方綠茶集團(06831)今日上市，雖然掛牌第一日已經破發，但公司招股成功，孤舟已過萬重山，把悲傷留給小股東！

　　綠茶餐廳可以話係神州好多連鎖餐廳嘅模板，業績一度非常輝煌，首家綠茶喺2008年曾創下14次/日嘅翻枱記錄，直到2014年，官方數據話單店客流量日均仍然高達1500人，人均排隊兩個鐘，創始人王勤松話，「一日嘅翻枱率4次係保本，最高達7次」。

　　不過後浪推前浪，綠茶近年已輝煌不再，從招股書嘅數據嚟睇，客單價、翻枱率、同店銷售額呈下滑趨勢，整體人均消費從2022年嘅62.9銀人仔連年下降到2024年嘅56.2銀人仔，整體日均翻枱率由2023年3.3次下降至2024年嘅3次，2024年嘅整體同店銷售額同比下降10.3%。

　　香港近年多咗好多神州連鎖餐飲品牌搶攻市場，大家一定可以理解到競爭有幾激烈，神州休閒中式餐廳市場高度分散，綠茶按餐廳數目計排第三、按收入計排第四，但市場份額卻只佔0.7%。

　　綠茶關鍵指標亮紅燈，其背後嘅問題從招股書中亦可以睇出一二，招股書中將問題嘅原因歸類喺當前經濟環境下消費者行為普遍改變，減少外出用餐嘅指出及次數，哩個肯定係原因之一，但仲有一個問題係菜品。作為一間融合菜，菜品新穎先夠吸引顧客，但其招股書顯示嘅人氣菜品仍係十年前嘅舊菜，例如綠茶烤雞，綠茶烤肉，麵包誘惑，綠茶一直求變但始終不受待見，餐廳每年至少推出170道新菜品，相當於每兩日就有一款新菜品推出，但新品冇一個成功上位。

　　神州市場係出咗名嘅內捲，曾經綠茶另外主打嘅「性價比」，如今已唔再係專屬特色，曾經令綠茶一炮而紅嘅超高性價比餐品，例如5蚊青瓜、10蚊東坡肉，而家都唔係咩獨門秘技，個個餐飲品牌都要優化供應鏈，而且大肆轉用預製菜，要鬥幾平都得。

　　講起大行其道嘅預製菜，神州老饕就把鬼火，更有人豪言自己要對預製菜say no，以後唔會再去商場食飯咁話。綠茶喺舊年3月被內地臥底記者踢爆售賣嘅佛跳牆係預製菜，但冇喺菜單中標註，亦都冇主動告知顧客，引發信任危機咁話。

　　其實呢要做到規模經營，部分烹飪工夫轉移到工場統一處理係難以避免，只不過工場製作過程中有幾多「科技與狠活」，好難講。總之宜家綠茶會標榜自己大部分菜式都係現點現做，不過招股書有講，公司計劃將其中2億港元用於設立中央食材加工設施，嗯……睇嚟點樣謂之預製菜，老闆同食客之間有唔同定義，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。