《魚缸博客》陽光房託股息回報吸引，較資產淨值折讓逾三成七！

　　《魚缸博客》噚日（６日）魚缸先收復嘅二萬九關口，今日又再失守，不過其實魚缸已經連漲四日進帳４０４點，現時二萬九關附近整固一下都叫正常啊！而且再睇遠啲，由一月升到依加都未有一個似樣嘅調整，缸友們繼續炒股唔炒市嘅策略可能會好啲啊。
　　要講幾隻年頭都依加嘅焦點股，點少得領展（００８２３），佢頻頻破頂，唔少缸友高追再高追！而另一隻博客之前推薦過嘅置富（００７７８）亦喺高位徘徊。加上而家市況未算好穩陣，料房託基金都會陸續有資金追捧，所以博客今日想同缸友們一齊睇睇另一隻亦都十分強勢嘅房托基金－－陽光房託（００４３５）啊！
　　睇公仔圖，呢隻魚毛喺１２月魚缸大跌嘅時候，佢都持續喺上升軌上面，由１１月４﹒５銀嘅位置，到今日已經升到近５﹒８銀嘅位置。佢自去年１１月以嚟，大部分時間都係喺保力加通道中軸至頂部之間，而近排股價開始出現調整，可以等股價回至中軸，即５﹒６銀附近吸納。

＊旗下物業正籌備資產增值工程，有望提高租金回報＊

　　呢隻魚毛喺上個月就公布咗中期業績，收益同物業收入淨額分別錄得按年增長６﹒４巴仙及９﹒２巴仙，至４﹒２４９億銀同３﹒３８７億銀。另外，可分派收入按年亦升８﹒２巴仙至２﹒３１６億銀，每基金分派單位係１３﹒２港仙，按年增加４﹒８巴仙。
　　值得一提陽光房託嘅出租率向來相當高企，不論係零售同寫字樓物業都接近全部出租，嚟緊佢旗下嘅寶恒商業中心會籌備資產增值工程，長遠有利提升佢租金回報。加上近排人仔展升勢，而美金今年似乎因為唔加息難有反彈空間，人仔今年應該會繼續上漲，咁亦意味住神州缸友嚟香江消費會更豪爽，而陽光旗下嘅上水中心購物商場自然就近水樓台，可以受惠人仔上漲嘅優惠，咁喺加租上都會有牙力啲啦。
　　以預測股息率有４﹒７９巴仙嚟講，股息回報相當吸引，而「孖屐」亦都相信聯儲局今年息口會維持不變，所以短期嚟講呢隻魚毛有機會上埋６蚊嘅位置。加上現價較每基金單位資產淨值９﹒０３銀折讓超過三成七，缸友睇好不妨喺５﹒６銀附近吸納，如果穿廿天線嘅位置（５﹒６０１銀）就要走人喇。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。