《經濟不停學》在岸離岸有價差，中間價即預示價？
上集我哋講過喺香港銀行唱人民幣現鈔抑或儲定期，統統都係用「離岸」計算，咁「在岸」又係點呢？
在岸離岸要分清，賺取價差更加醒
(Shutterstock圖片)
所謂在岸價（CNY）人民幣，其實係根據中國外匯交易中心所公布嘅價格，即係當日中國境內人民幣兌外幣嘅匯率，並以人民幣中間價同參考一籃子貨幣（包括美元、歐元、日圓）所制定，但係匯率浮動係有限制，浮動範圍為人民幣中間價嘅上下各２％。
我哋可以理解為，在岸人仔受嚴格管控，所以價格唔容易浮動；但離岸人仔則因為喺國際市場自由買賣，比較容易受金融或者政治事件所影響。由於在岸、離岸好容易造成價差，亦有人借價差進行套利。
債券市場夠龐大，債券、滬深港通睇在岸價
(Shutterstock圖片)
香港兌人仔現鈔又或者兌換做定期都係用離岸價，咁係咪唔需要理在岸價呢？其實好多香港人都有投資內地資產，其中最大投資包括中國債券，而在岸人民幣債券係比較龐大，目前市值高達13萬億美元。所以，經「債券通」買中國在岸人仔國債，都要睇實在岸價為主，亦都好多外資大孖沙留意。
人民幣中間價影響匯率
(Shutterstock圖片)
「中間價」又係乜東東？其實就係中國外匯中心每日訂立出嚟嘅「指導價」，係外匯中心每日向中國所有銀行詢問佢地嘅匯價，刪除最高同最低報價後，再用加權平均計算出嚟，並會參考一籃子貨幣同逆周期因子，而呢個價就給予在岸人民幣指導性，在岸人仔只可以係中間價上下各2％之間浮動。
中間價預測人仔未來走勢
(國家外匯局官方網站截圖)
點解要睇實中間價呢？因為佢有一定嘅預測性作用，假如外匯中心公布嘅中間價連續大升或大跌，都可以解讀為人仔升值／貶值趨勢，並會對在岸同離岸人仔有一定程度的影響。呢一期中美貿易戰打到勢成水火，參考中間價其實都可以理解到央媽對人仔嘅意圖，好似美國上年向中國商品徵收關稅，人仔跌破「七算」以應對。
撰文：李皆穎
【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！
立即下載>>
etnet財經﹒生活App
iOS : https://apple.co/2PCaN4b
Android: http://bit.ly/38h135T
etnet MQ強化版App
iOS : https://apple.co/2VEjoHl
Android: http://bit.ly/32RGk7G