《魚缸博客》車股係咁跌，咁啱官媒發文要求外賣平台唔好內捲

　　《魚缸博客》今日車股係跌，寶馬又話下調在華預估量，吉利又話有新車款，其他車商又打價格戰，真係「捲」到無朋友。

　　博客而家聽班中產有錢朋友講，話發現原來搞「港車北上」真係穩笨，乜費物費夾夾埋埋都已經接近一萬；倒不如係內地買部車，新車都係十萬左右，二手車五六萬就可以，就算長期泊停車場，都係一兩千嘅使費。

　　雖然消費都係接近，但唔使每年走去排隊續牌，過個關口就可以去拎車周圍玩，而且港車北上又唔入得深圳，相反你就算抽個「粵Ｋ」嘅「飛機牌」都可以周圍去無限制，實際抵玩到爛，續牌買保險可以搵人代辦，方便至極。最近內地都開放左俾港人北上買車抽牌，反映出內地汽車市場可能真係到「危急存亡之秋」（可能博客誇張啦），要搞埋港人北上買車，分分鐘消費力都強勁！

　　不過剛好，今日人民網發文，召見幾大外賣平台／電商平台，「呼籲」佢地唔好內捲，要穩打穩紮咁做。但唔「捲」又有無可能呢又？大家都係鬥燒錢搶客，你補貼一蚊我補貼兩蚊，總之燒到對家乾塘為止，唔死唔心息。

　　唔好以為召見平台公司，就唔關汽車商事，皆因汽車市場都係另外一個「捲」嘅市場，大家都係割價加國補咁賣車，其實呢次人民網發文，都係一個信號俾全中國「內捲」嚴重嘅市場：大家適可而止就好啦，唔好到官方真係出手，唔係大家無飯開個陣，就唔好怪阿爺無手下留情啦！


《編者按》本欄搜羅即市傳聞，惟消息未經證實，《經濟通》亦不保證內容之準確性。