《魚缸博客》寧王腳軟帝王升天，曾經合股又供股五日翻倍有乜出奇

　　《魚缸博客》寧德時代(03750)H股上市兩日，股價累計升三成，升幅之大出乎好多人意外。不過，噚日臨收市嗰陣，有股壇長毛之稱嘅David Webb表示，寧王H股股權過於集中，只佔公司總股本3.42%，如果扣除禁售期持有嘅股份，自由流通股數只得7846萬股，約佔公司總股本約1.7%。David Webb講嘢一向有份量，所以報道一出，即刻引起市場關注。撞啱大市下跌，寧王股價今早腳軟，最多曾跌近4%。

　　不過今日博客想講嘅係另一個王--帝王實業(01950)，帝王今日股價最多飆50%，大部分時間佔據升幅榜榜首，所以引起博客注意。股價升咁多，但又唔見有任何重大事項公布。博客睇番帝王公司資料，原來係神州人工革化學品製造商，主要從事研發、製造及銷售塗飾劑及合成樹脂，客戶對象係合成革製造商、貿易實體及分銷商。但舊年公司總營業額中，白酒反而佔比高達53.7%，人工革化學品佔46.3%。

　　帝王2020年3月上市，當時上市價0.52銀，今日股價大升，執筆呢刻做緊0.234銀，即係股價跌咗一半？梗係唔止啦！由於公司2023年股份曾五合一，再嚟二供三，即係話現時股價已經是放大幾倍了，簡而言之，現價已經比上市價蒸發九成。點解跌得咁慘情？唔通公司蝕大錢？咁就錯啦！公司2020年做1.34億人仔生意，蝕咗3百萬人仔。到2024年，生意額升到5.66億人仔，扭虧轉賺3千萬人仔，盤數咁靚，又有錢賺，但公司一毫子息都無派過，仲要掉返轉頭使出合股供股呢啲技倆，股價大升大跌真係唔值得大驚小怪！

　　如果話寧王H股係高度集中，咁帝王股份表面上就「高度唔集中」。根據港交所資料，帝王最大股東只持有7.22%股份，其餘超過九成股份邊個持有就真係天曉得。如果係重磅股，股權分散無問題，因為持有成本高，要令股價大升大跌唔容易。但係股仔成本低，求其幾千萬都可以買起成間公司，更莫講話令到股價大升大跌。以帝王為例，今日升咁多，市值都不過1.6億銀。如果睇返上個禮拜四（15日）收市價8.3仙，市值約6千萬銀，要炒上炒落真係話都無咁易。不過，股價由上個禮拜8.3仙，炒到而家0.234銀，短短五個交易日升1.8倍，都咪話唔驚人。6千萬身家變1.6億銀，誘惑大過去KK園區。不過，博客有自知之明，呢啲錢唔到我賺！

《編者按》本欄搜羅即市傳聞，惟消息未經證實，《經濟通》亦不保證內容之準確性。