《魚缸博客》恒指50天線後市關鍵，來凱醫藥或呈雙頂回調再部署

　　《魚缸博客》恒指上周四單日轉向，後上周五再以裂口回穿50天同10天線後，今朝裂口高開171點後逐步回調，執筆時已重上50天線(現約17616)。恒指技術形態亦無太大變化，目前仍然維持10月24日展開嘅一浪高於一浪走勢，後市如可重新守穩50天線，恒指有望重拾反彈浪。
　　由藥明生物（02269）分拆出嚟嘅藥明合聯（02268）首日掛牌收報28銀，較招股價20.6銀高出36%；成交6377萬股，涉資17.15億銀。高低位分別為29.25同26.8銀。今朝股價稍欠方向，28銀成為好淡雙方拉鋸戰地。
　　藥股呢期有勢，今日講吓隻來凱醫藥(02105)，集團主要從事生物製藥業務，專注於癌症治療。集團公布，截至2023年6月30日止中期虧損收窄至2.17億人仔，舊年同期虧損3.02億元；每股基本虧損2.63元，舊年同期每股基本虧損4.08元；唔派中期息。期內，其他收入324.3萬元，升11.5倍。
　　中國證券報喺11月初嘅報道指，來凱醫藥早前喺美國加州聖地牙哥開幕嘅腫瘤免疫治療學會（SITC）第38屆年會上，以壁報形式公布咗兩款自主研發嘅新型雙特異性抗體臨床前數據：調節T/NK/髓系細胞功能的LILRB1-B2雙特異性抗體(LAE111)，以及調節T/NK細胞功能嘅TIGIT-PVRIG雙特異性抗體(LAE113)。
　　集團首席科學官顧祥巨博士表示，目前來凱醫藥內部已經發現咗多款好有潛力嘅臨床前候選藥物（PCC），其中LAE111和LAE113都展現出優於目前同類抗體嘅抗腫瘤活性，並且具有與其他藥物聯用、逆轉PD-1/PDL1抗藥性嘅潛力。
　　根據公開資料顯示，SITC年會係專注於癌症免疫治療相關嘅國際性大會，每年都吸引好多來自學術機構、研究機構、臨床、監管部門及企業等各界人士嘅關注和參與。消息刺激來凱醫藥股價喺11月2日高見26.45銀，較12.41銀招股價高出一倍有多，技術上亦已突破19銀橫行區頂。
　　今朝股價最高見過25.4銀，執筆時做緊25.15銀，升逾11%，似要再試前高26.45銀，投資者需慎防形成雙頂，建議等股價回調至20天線（現約20.96銀）再部署，最理想係回調至19銀前橫行區頂，屆時買入更值博，上升目標28銀。(pc)

《編者按》本欄搜羅即市傳聞，惟消息未經證實，《經濟通》亦不保證內容之準確性。