《魚缸博客》大家樂盤數好似做到慈善機構咁，咁佛心得唔得㗎？

　　《魚缸博客》同朋友講起大家樂(00341)，立即開佢最近盤數出嚟睇，得出一個結論就係：盤數好似做到慈善機構咁，咁佛心得唔得㗎？

　　點解我會咁講？做81億生意，純利得1.6億，毛利率得9點幾%，仲要增加派息，又回購股份，唔講以為佢係科技公司。

　　老實講，以內地餐飲有錢賺，都有四五成毛利率，就算遇到逆風嘅海底撈(06862)，都有兩成幾毛利率；而大家樂可以做到個位數，其實意味住警號已經響起，難聽講句幾乎係白做咁際。
　　
　　集團首席執行官梁可婷俾出解釋就係：鑑於環球市場不明朗及亞洲經濟未完全復甦，市民在長假期外遊、周末北上消費已成常態。但我成日見到壽司郎都門庭若市，就算做快餐麥當勞都無話艱難，稻香都識搞90幾蚊邊爐走去引流，大家都努力生存緊。

　　大環境來講，其實成個餐飲業已經唔同格局：統一用預製菜、玩加盟收費、做原料供應商，其實即係「麥當勞化」，只係應用係中餐上面咁解。大家樂仲停留係20年前（個人意見），相信唔少近年食過大家樂嘅朋友仔得出一個結論：點解好似難食左咁多？

　　博客認為，並唔係難食左，因為大家樂工廠十年如一日，品質都係咁穩定；而係而家坊間餐飲進步，嘢食好味左，咁個世界就係不進則退，所以係「對手太強」。特別係而家咁多過江龍落香港，又蜜雪冰城、又遇見小麵、又袁記雲餃，人地係打低左幾多個對手先落香港上市開鋪？

　　所以話大家樂繼續呢種經營方式，真係遲早變社福機構。

《編者按》本欄搜羅即市傳聞，惟消息未經證實，《經濟通》亦不保證內容之準確性。