【晴報專訊】29歲的陳凱琳（Grace）已是人妻兼靚媽，其孖生弟弟Derek前日與拍拖多年的女友Wing低調註冊結婚，Grace與老公鄭嘉穎到場賀一對新人。昨午Grace接受《晴報》訪問時表示非常喜歡弟婦，並稱︰「如果佢哋想生小朋友，就嚟我屋企湊下仔（實習）先。」這位姑奶認真開通。

　　Grace與龍鳳胎細佬Derek一向感情甚佳，二人一起成長，雙雙擁有得天獨厚、勁似混血兒的靚樣，Derek曾跟家姐走到幕前，姊弟檔拍廣告及短片等。Derek亦在Grace敦促下開設了IG帳戶與網友互動，雖然他身為圈外人，現時已有逾一萬追隨者，非常犀利。

Derek擁有黝黑皮膚兼健碩身形，經常上載男神照派福利。

新郎哥Po相分享喜悅

Grace與老公鄭嘉穎見證Derek完成人生大事，嘉穎更笑到見牙唔見眼。（受訪者提供）

　　前日，有傳媒拍到Derek原來已低調在金鐘紅棉路婚姻登記處註冊結婚，Derek的父母、Grace與老公鄭嘉穎、Grace的大家姐兩公婆也有出席婚禮。不過，鄭嘉穎與Grace卻沒有帶同兒子Rafael（鄭承悅）及Yannick（鄭承亮）同行，未知是否不想兩位公子搶鏡。陳爸爸當日受訪時，強調不會給乖仔造人壓力，又透露已送金器給愛兒及媳婦。至於新郎哥Derek全程表現低調，直至昨午才po相分享與太太的甜蜜婚照。

Grace讚弟婦好女仔

Derek與Wing郎才女貌，未知是否已出力展開造人大計。（受訪者提供）

　　昨日，陳凱琳接受本報電話訪問，提到榮升姑奶，她表示︰「細佬結婚我當然好開心，大家都知我哋感情好好。佢同佢老婆仔拍拖已經有一段時間，我都好鍾意呢個女仔，我覺得佢哋好夾，大家互相補足，喺埋一齊係一件好美好嘅事。祝福佢哋，希望佢哋結婚後喺一家人呢種新環境、新角色下，更能夠互相體諒，相處開心！（催一對新人為Rafael、Yannick添表弟妹？）生小朋友唔急喇，Derek佢哋好細個，順其自然！如果佢哋想生小朋友，就嚟我屋企湊下仔（實習）先。」Grace與大家姐早已出嫁，如今Derek亦成家立室，相信陳爸爸、陳媽媽最高興。

陳凱琳一向照顧細佬，相信已傳授不少夫妻相處之道。