《小傳日記》恒大停擺車廠有人吼？有傳被廣汽華為新車品牌睇中！

　　《小傳日記》久違嘅恒大汽車(00708)忽然爆升！原本以為恒汽窮到燶連核數師都請唔起，出唔切業績就會4月準時停牌，點知臨尾竟然炒一轉，唔通又搵到白武士aka水魚？

　　摷返今日最大單料，應該就係同廣汽(02238)有意收購恒汽南沙車廠有關。廣汽最新成立新廠牌華望，註冊資本15億人仔，天眼查資料話華望經營範圍包括汽車銷售、汽車零部件及配件製造、新能源汽車生產測試設備銷售、新能源汽車整車銷售等等，基本上都係一條龍新廠牌。而最重要係，廣汽講明呢個係GH項目公司。GH項目係今年1月廣汽宣布同華為「深度合作」而推出嘅全新廠牌，定位高端車型，生產30萬銀級嘅豪華智能新能源車，傳計劃出年會上市首款車型。

　　除咗智能駕駛，「華為」都係車廠趨之若鶩嘅概念之一。華為一直無表明會自行造車，但就一直周圍賣自己技術作為「軟件」，同唔同車廠合作作為「硬件」，簡單理解其實就係新能源車嘅OEM。自從問界嘅成功面世，唔少傳統車廠都會想跳過研發，同華為合作加速轉型，咁先追得上新勢力。而且「華為」夠晒愛國，符合愛國民眾嘅需求，而掛個「華為合作」嘅牌話唔定會賣得好啲。

　　新嚟新豬肉，想跳步驟最緊要捨得駛錢。既然都同得華為合作，要快手搞起不如車廠都買啦，空有車廠無車出廠嘅恒大汽車廠當然就係首選，循環再用的確非常方便，所以都算得上合情合理。不過根據資料，恒大汽車只有天津工廠具備生產資質，如果要通過南沙車廠開發新品牌，咁就要傷腦筋去搵個牌番嚟。

　　而針對傳聞廣汽都即刻回應咗，但呢個回應就可圈可點。有記者向廣汽方面查詢，得到回覆係廣汽會「優先利用埃安、傳祺品牌產能」，要坊間「不要輕信任何傳言，以公司公告為準」。如果真係假傳聞，何不正面否認？廣汽方面目前叫人要「以公司公告為準」，即係唔排除未來會有公告，如果係咁上面嘅推測都係合情合理。而家咁嘅時勢，如果恒汽真係可以賣車廠套到現其實最著數，刁得到其實對雙方都利，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。