立法會財委會今個立法年度最後一次會終於開完，主席陳健波一早講明唔加會，泛民又一早講明唔會畀個教育新資源撥款話過就過。Jenny喺立法會等足一日，連書展都冇去，就親眼目睹36億元新增教育經常開支毫無意外終於過咗，驚喜嘅係三間醫院重建及擴建撥款都過埋。不過，今日泛民「拉布大法」爭啲玩出禍，皆因建制派一於順住你去「拉」，好彩最後過到個教育撥款，如果唔係泛民切腹謝罪都唔掂呀！

開完財委會，泛民（上）、建制（下）輪流出場互數不是。

泛民計錯數「拉布大法」爭啲拉出禍

　　今次過到教育經常開支撥款Jenny覺得泛民真係執返身彩！今日泛民本來想用拉布嘅方法去令到財委會只能通過教育呢一項議題，但係唔知係咪條數計唔清，拉吓拉吓拉多咗幾下，建制派亦一於順住個勢，你想拉？我就畀你拉啦！我係都唔要求縮短表決時間呀！Jenny估泛民點都諗唔到建制有呢一著。

　　結果臨完會仲有一堆37a#未解決，如果照平日5分鐘表決時間，今日一定過唔到教育撥款，學生冇學費資助、超額教師又要執包袱，咁泛民就會成為千古罪人，他日補選立法會選情可想而知。呢個時候，民主黨黃碧雲即刻淆底，主動話要將記名表決鐘聲縮短至1分鐘。呢個由民主派提出的議案，咁就罕有地獲得通過，仲畀麥美娟有位入串佢哋，話民主派下次記得都要咁做。老實講，Jenny覺得泛民今次咁樣真係好樣衰囉！

　　財委會就開完喇，而家仲有至少5項撥款申請未處理，包括東涌新市鎮擴展、興建沙嶺骨灰龕場、公務員加薪、中九龍幹線、油麻地戲院重建等，要到10月放完暑期返來先再傾。

麥美娟：我哋冇「鬥氣」呀

　　咁嘅情況，建制派雖然成功「陰」咗泛民，但點都要循例譴責一下拉布。民記李慧琼（琼子）一出場就同Jenny批評民主派議員騎劫會議，只肯通過追加36億元教育經常開支呢項撥款， 對其他如民生相關撥款置諸不理，感到極度遺憾及憤怒。

　　琼子話，民主派將民生撥款當「人質」，唔理部分撥款申請流產嘅後果，第時工程開支大咗又要納稅人埋單。佢哋成班建制派已經非常包容，作出最大嘅忍耐。

　　對於專登唔提出縮短表決時間，係咪有心同泛民鬥氣？麥美娟就同Jenny講唔應該視為「鬥氣」，佢哋只係想息事寧人，等撥款快啲過;陳恒鑌仲解釋話，如果佢哋提出縮短，泛民萬一唔同意，又咪拖長來搞，所以先唔出聲。啊？實情原來係咁？真係至於你信不信……

　　不過大家識咗建制咁多年，都知佢哋講嚟講去都係三幅被。反而泛民就因為今日個會似乎內訌喇，事關阿涂涂謹申都話有啲同事連第一項（教育撥款）都唔想過，佢哋平衡大家意見之後先決定集中火力過第一項，不過見記者個陣，民主黨、公民黨就一齊，進取啲嘅就另一堆，阿涂就話唔係內訌，又強調有結合大家嘅建議喎。

泛民疑內訌 波叔成日得幾塊餅落肚

　　到朱凱廸（阿廸）、陳志全（慢必）同毛孟靜（Miss Mo）佢哋見記者，佢哋都講話其實唔應該畀議會正常運作，因為DQ是挑戰憲制基礎，冇咩事係大得過呢樣。呢頭否認係內訌，不過嗰頭就話希望「只此一次」，咁咪即係承認？

　　唔同陣營互數完，終於到主席陳建波講幾句，佢話今日好陰公豬呀，因為自己對啲議員千般忍讓，又「頭痛到飛起」，Lunch淨係食咗幾件餅咁喎！佢好自信咁話唔覺自己有咩問題，又自問好容忍、好遷就，仲同Jenny大呻「做咩要糟質我」！波哥，主席真係唔易做㗎！

#根據議事規則37a:在審議某議程項目期間，委員可在有關該議程項目的待決議題付諸表決前，無須經預告而動議一項議案，就該議程項目表達意見；惟該議案須獲主席認為與該議程項目直接相關，並獲過半數委員同意應立即予以處理。任何擬提出的議案或該議案的修正案，應以書面形式提交。委員可在合併辯論中就該議案及該議案的修正案（如有的話）發言。