撑維基 寸TVB「玩晒」 網民激讚阮兆祥真漢子

　　「魔童」王維基的香港電視（HKTV）於本月19日開台，打正旗號力撼無線《萬千星輝賀台慶》，搞到無線台慶收視創下17年新低點；正當不少觀眾掙扎在撑港視抑或繼續睇無線之際，身為大台人的阮兆祥竟在個人棟篤笑上憑歌撑王維基，獲網民大讚無懼得罪公司是真漢子，究竟敢言的祥仔是真心撑港視？還是只為棟篤笑搞噱頭？

祥仔扮金正恩，維妙維肖。

 祥仔即席變裝，以「下陷BB」的身份，嬉笑怒罵大談近日的熱門社會話題。

　　《阮兆祥2014硬食博覽棟篤笑》日前在灣仔伊館舉行，祥仔以多個惡搞造型示人，包括模仿都敏俊、金正恩及黃偉文等，又惡搞改編歌大放笑彈。然而貴為大台藝人的祥仔，竟公然在台上力撑港視，完全不放無線在眼內。

憑歌捧港視「變陣快」

祥仔化身黃偉文唱出惡搞歌詞撑王維基。

　　變身光頭黃偉文的祥仔，寫了一首惡搞歌賀王維基開台：「見到他等了59個月，他終於得到牌照，這一位是王維基。」隨即高歌：「發牌也有苦惱，艾威好鬼躁，看看兩三億，似垃圾快快燒完，龍門又要搬埋，港視高質料不發牌，最好兩台玩晒，是否偷偷向大台說，其實願意畀佢就怪，絕招，基基變陣明快，求其用個apps掂晒。」祥仔是綜藝組藝員，今次竟然借王維基落余詠珊面，認真夠「沙膽」。

祥仔和嘉賓曾志偉在台上聯手寸TVB。

　　而盛傳與大台高層余詠珊不和的曾志偉，當晚以嘉賓身份上台，志偉提議祥仔娶梅小惠時，又與祥仔聯手寸無線：「嗰日可以好似歡樂滿東華咁，直接籌埋款，為TVB仆心仆命，天下間最衰的電視台。」

　　祥仔今次狂寸無線，獲大部分網民公開力撑，有網民大讚祥仔：「真漢子！呢幾十年畀無綫所謂簽約，實際上綁手綁腳。」不過亦有網友不太支持，並留言：「感覺佢夾硬搵嘢嚟講，同黃子華冇得揮。」

志偉爆祥仔想跳槽

　　祥仔咁夠膽寸娘家，原來他明年二月就約滿無線，莫非就全無顧忌？有網民表示：「如果維基肯要佢應該有得發揮，起碼唔使扮女人扮小丑。」唔知祥仔會否考慮過檔港視呢？當晚志偉亦忍不住寸祥仔：「到依家都未續約，睇你都過港視多啦！」