醉爆楊怡 信任羅仲謙大髀

  28歲的羅仲謙與33歲緋聞女友楊怡，大前晚被拍得同車返閨期間，楊怡被指全程伏在男方雙腿中間「動作有異」，事件震驚全城。男女主角昨午在無線電視城召開記者會，首度承認雙方「互相了解中」，但楊怡否認，澄清只是醉酒伏在羅仲謙大髀嘔吐，她直斥事件涉及誹謗令其聲譽受損，故已交律師處理。

羅仲謙和楊怡昨午會見傳媒否認「車廂」事件。

　　昨日下午五時許，羅仲謙和楊怡在兩名無線高層、經理人及助手陪同下，結伴現身無線電視城會見傳媒，兩人神情輕鬆兼臉帶微笑，大方讓記者拍照後，楊怡首先發言，她透露大前晚相約了第13期訓練班的同學聚會，由於事前得悉羅仲謙會前往接載自己，所以很放心喝下不少酒，眾人之後乘的士到張美妮住所繼續狂歡，楊怡表示：「當時大家都飲到醉醺醺，佢（羅仲謙）仲同我講出面有疑似狗仔隊，到我離開張美妮屋企已經嘔到斷晒片，係佢扶我上車。」

嘔落碗麵 嘴角濕濕

記者會吸引半百傳媒採訪，無線高層樂易玲和曾醒明陪同現身。

　　楊怡續說：「當時對方係自己最信任的人，伏喺佢大髀係毋庸置疑，但我想澄清一件事，因為佢等咗我好耐，於是買了碗麵在車上食，到我一上車就打開碗麵的蓋嘔落去，所以才會嘴濕濕，並唔係報道所指的事。其實返到屋企附近時，佢已發現有狗仔追車，就拍醒我，藝人本能反應一定係用帽遮自己塊臉。」

　　羅仲謙在記者會上全程維護楊怡，他表示有責任護送女友返家，故早到等候女友：「我都知好似有記者，所以去張美妮屋企接佢，佢上車時已經暈暈地，所以伏喺我大髀，期間我將架車開到好慢，亦無扶開佢，因為知道扶開佢會嘔，會好辛苦，但送佢返屋企途中發現有記者跟，當時佢好急戴返頂帽，件事係佢咁講，一起身就嘔落我買來碗麵度。」

記者發問環節

記：記者　羅：羅仲謙　楊：楊怡

記：宣布正式公開拍拖？

羅：我們仲係處於互相了解階段，順其自然的方向去進行。

記：有機會發展？

羅：感情事隨緣，總之同阿怡正面培養感情，互相了解當中。

記：有沒有為這件事喊？

楊（裝輕鬆哈哈大笑）：你話呢？喊係好基本動作，女仔受了委屈，喊係解決唔到問題，所以要講清楚成件事，今日都諮詢咗法律意見，目前會保留法律追究權利，報道字眼造成誹謗，所以搵律師跟進。

記：這幾天不用開工？

楊（好緊張）：開，點會唔開？劇就一定拍。

記：方中信話你無開工，累佢甩咗兩組戲？

楊：我氹番佢囉，都要叫佢氹番我，工作還工作，分得好清楚，我無打算要逃避，開工係需要的。

記：你們同居？

楊（笑）：我同我媽咪就同居，同居呢個字眼大家想太多，影到一齊出入又話同居，同一架車又話同居，總之有進一步發展，我一定話畀大家知。

羅：當日送了她返家，auntie安頓她之後我都即刻走，成篇報道最大傷害都係佢，咁樣傷害個女仔，真係好大侮辱。

記：楊怡車內無扣安全帶？

羅：真係唔對，其實都唔想佢長期伏喺度。

楊：咁佢知我飲醉酒跌低咗，伏喺佢度無可厚非。

羅：當時應該將佢放後面。

記：但你嘴角濕濕地？

楊：之前講咗係嘔吐物，嘔就一定有水。

記：你微博所指的真相是講這些？

楊：係，真相就係呢啲，簡單到唔簡單，我唔係要挑戰任何事，係要將事實話畀大家知，咁樣做會更加好，總之對得住自己良心。

記：擔心有更清楚的相漏出？

楊（好肯定）：我唔驚！

記：有兩張相影到異物？

楊：你有冇睇到先？

記：有相你唔介意？

楊：唔介意，無做過就完全唔使介意。

楊怡微博回應

  楊怡出事前與一班訓練班同學聚舊，報道出街後，她在微博留言：「身為一個公眾人物，我們時刻反省自己的行為操守，但身為一個傳媒工作者，你們有基本的道德操守嗎？一支筆寫出來的文章可圈可點，難道香港傳媒已到了末落的地步？為何你們不是報道事實的真相，而是要歪曲事實？良心何在。」

網民回應

　　pollybell：一早認咗咪無人跟你。

　　chicken：我都要練大隻D同晒黑D先得。

藝人半信半疑

　　郭羡妮：藝人都是人，都須要拍拖。如果是真的拍拖值得恭喜，相信楊怡只是想避鏡頭。

　　楊卓娜（楊怡家姐）：我冇嘢講，唔關我事，今日好忙，咩都睇唔到，唔知發生咩事。

　　陳百祥：我覺得報道應該是作出來的，傳媒要有界線，藝人私生活是他們自己的事，不應該加鹽加醋。

　　方中信：已經有很多記者打電話來，要唔要給楊怡電話你哋？只係小朋友太緊張，搵地方躲避記者啫。

　　
　　陳錦鴻：相信兩人不會在大庭廣眾下做出瘋狂的事，他們應該是太驚慌唔記得笑，如果一開始笑就是普通事，不會有太多遐想。

撰文：倪小珊　採訪：Pauline　攝影：Lego
轉載自晴報http://skypost.hk