《笑傲缸湖》牛年春節就地過年，麻雀機竟然係年貨之王？

　　《笑傲缸湖》仲有一個星期就過年啦！盈盈先祝咁多位缸友今年長賺長有，發過豬頭！新年流流各位「雀聖雀后」實會齊齊佈陣大戰三百回合，人人都會打返兩圈發個新年財，而農曆新年往往都係麻雀機銷售旺季，今年神州力推「就地過年」之下，直頭賣斷市！
　　淘寶噚日（３日）公布咗牛年春節十大年貨報告，家用麻雀機就位列榜首，係今年最受歡迎嘅年貨，每日銷量比舊年增長咗多過１﹒３倍！喺麻雀機產業重鎮杭州，有商家就透露今年成個區近２００間工廠都谷盡力出貨，就算係咁都就嚟出唔切貨，一來訂單堆積如山，二來發貨時間大趕搞到運貨都運唔切，連物流貨運可能隨時停運。
　　不過原來撇開春節旺季同「就地過年」加持，自動麻雀機依然好熱門，設計同功能都日新月異，依家嘅麻雀機有好多款，輕薄版、可折疊版、靜音版，甚至連ＡＩ語音控制功能都出埋，連天貓、小米（０１８１０）都叉隻腳埋去麻雀機行業，原來唔打麻雀整麻雀機都可以發達。
　　另外，原來麻雀機海外孖屐都發展得唔錯，天貓淘寶話今年年貨節，通過淘寶賣到海外嘅麻將機銷量按年升咗一倍有多，而新加坡、袋鼠國、花旗國、楓葉國買得最多，最誇張嘅係連馬達加斯加呢啲小島國都有人買，睇嚟買隻麻雀概念股仲好過開枱。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。