《魚缸博客》傳內地放寬部分城市購房限制，內房股回暖了？

　　內房股今朝升到嘭嘭聲，碧桂園(02007)曾經升超過一成，中海外(00688)、潤地(01109)亦一度升超過4%，好大可能同阿爺提振樓市嘅政策有關。
　　有傳媒引述消息人士報道指，國家主席習近平支持放寬除咗北京、上海、廣州、深圳四個一線城市以外嘅所有內地城市嘅購房限制，鼓勵地方政府按每個城市具體情況制訂計劃，以提振遭受重創嘅住房市場。
　　另外，內地官媒《經濟日報》早前發表評論文章話，隨住促進房地產市場平穩健康發展嘅政策舉措「落地見效」，房地產市場築底企穩值得期待，而融資環境有望進一步好轉。
　　近期其實有唔少城市都推出樓市鬆綁措施。有指蘇州市六區對外地人購買首套房嘅政策略為放寬，佢哋唔需要出示社保證明或個稅證明，據報廣州或將調整新房備案價政策，價格最多可較樓棟均價下浮兩成，上浮一成，被指有利增大房企促銷空間。
　　自斷供「爛尾樓」事件爆發之後，民眾對買樓嘅信心一度出現危機。依家多個地方政府逐步鬆綁買樓措施，阿爺相信都希望盡快挽回民眾嘅信心。呢啲政策唔敢講可以好快見效，但至少唔會再令內房危機惡化落去，亦緩和到市場對內房股嘅不安情緒。
　　睇番中海外、龍湖(00960)、潤地等內房股，今個月走勢都幾好，持續守穩喺10天線以上，近日嘅成交回升，帶動股價上揚。內房股走勢轉強，依家都可以入場買小小博繼續升，中海外目標可以留意7月5日高位25.6銀，潤地就睇住7月8日高位37銀。

《編者按》本欄搜羅即市傳聞，惟消息未經證實，《經濟通》亦不保證內容之準確性。