《魚缸博客》六大澳門賭牌牌主「冧莊」，依家可以買邊隻賭股？

　　澳門新賭牌「7爭6」結果揭曉，現有6大澳門賭牌牌主成功「冧莊」，獲當局發出博彩經營批給臨時判給，有望再續牌10年，依次係美高梅金殿超濠、銀河娛樂場、威尼斯人澳門、新濠博亞(澳門)、永利度假村同澳娛綜合。反而，新加入爭奪澳門賭牌嘅馬來西亞雲頂集團旗下GMM就未能入選。
　　大行瑞信認為，博彩稅、牌照同非博彩承諾對盈利可見性有正面影響，好似美高梅中國(02282)、永利澳門(01128)呢啲小型營運商應該會有更強勁嘅股價反彈。另外，該行認為因為牌照風險有所緩解，首選金沙中國(01928)。
　　賭牌問題一天光晒，濠賭股當然升得勁喇。當中，永利澳門早段曾經升超過一成。今日永利澳門嘅成交額急增，帶動股價急升，依家重上100天線，但喺5.5銀附近都有幾大阻力，有貨嘅朋友建議食一食胡先。至於銀娛(00027)今日低開，但之後跌幅逐步收窄，甚至曾經倒升超過1%，暫時股價喺20天線、50天線同250天線附近爭持。今日可以升住收市嘅話，短線相信可以挑戰48銀水平，現價買入仲有一定值博率。

《編者按》本欄搜羅即市傳聞，惟消息未經證實，《經濟通》亦不保證內容之準確性。