《魚缸博客》舜宇手機鏡頭表現麻麻，但技術走勢有好轉？

　　《魚缸博客》手機設備股今朝走勢麻麻哋，比較多人留意嘅舜宇(02382)曾經跌近8%，可能同公司最新公布嘅手機鏡頭出貨量數據有關。
　　舜宇公布，11月手機鏡頭出貨量按年跌26.4%至9103.4萬件，按月亦跌9.3%，主要因為依家整體智能手機市場需求比較淡。手機攝像模組出貨量按年下降23.4%至3468.2萬件，按月下降21%，按月下跌主要因為上個月因個別客戶嘅備貨需求，而出貨量基數較高。期內，車載鏡頭出貨量按年升47.4%至740.5萬件，按月就跌5.3%。
　　公司再三提到，依家智能手機市場需求比較淡，而今年「雙11」消費旺季期間，內地智能手機銷售額按年下滑11%，表現相對疲弱，手機鏡頭出貨量嘅數據好難會靚仔。相反，車載鏡頭出貨量按年上升，連續多個月有好表現，可能因為上游缺芯情況逐步好轉，相信嚟緊可以抵銷手機設備業務嘅不足。
　　睇番日線圖，舜宇由10月低位65銀反彈，走勢反覆向上，目前仲守到喺100天線樓上，20天線亦有幾強支持。再睇周線圖，10周線有回升跡象，並且逐步貼近20周線，整體走勢有啲改善。如果喺低位買咗貨嘅朋友，未失守85銀仲可以揸住，目標睇8月高位125銀附近。

《編者按》本欄搜羅即市傳聞，惟消息未經證實，《經濟通》亦不保證內容之準確性。