• |
  • 極速報價
  • |
  • 會員
  • 產品服務 / 串流版
  • 設定

21/06/2021

《Online有話兒》富豪爸爸點教仔女?巴菲特訓練阿仔開推土機!

  • 加入最愛專欄
  • 收藏文章

  剛剛過去嘅父親節(20日)大家有無同爸爸慶祝呢?雖然一年入面有364日都係母親節,得返呢一日係爸爸大晒,身為爸爸就梗係要輕鬆吓啦!但原來,世界上好多富豪爸爸,對仔女管教都好貼地,今日就同大家盤點吓,富豪爸爸嘅管教方式啦!

 

(Shutterstock圖片)

 

巴菲特:阿仔去老豆公司開推土機

 

 

(Shutterstock圖片)

 

  作為「股神」巴菲特個仔,你肯定以為兩父子一定經常大曬金錢,衣食住行都係唔貴唔用!事實上,巴菲特出晒名「節儉」,早餐都係食個30蚊嘅老麥,間唔時飲罐可樂當娛樂,有錢人嘅生活果然係咁樸實無華且枯燥。

 

  至於佢點對自己個仔呢?雖然巴菲特16歲已經搵到自己第一桶金,但「節儉」呢兩粒字依然融入係自己嘅育兒理念,例如長女出世連BB床都無買,只係將梳妝台嘅櫃桶改造成嬰兒床;第二個仔出世雖然有BB床,不過都係問人借。

 

  巴菲特認為,希望仔仔們唔好畀金錢沖昏頭腦,佢地唔一定要做專業人士或者讀大學,但希望佢地可以用自己嘅才華貢獻社會,佢地搵到自己嘅社會價值。所以當年阿仔Howard係上大學期間Study Leave,之後唔再打算讀書,但呢位爸爸無怪過佢,重邀請阿仔到自己旗下公司開推土機,所以阿仔而家多才多藝,既係農民又係攝影師同作家!

 

貝佐斯:做人要追求夢想,而且要自己解決問題!

 

 

(Shutterstock圖片)

 

  亞馬遜創辦人貝佐斯就比較另類,因為佢嘅育兒方式好熱血!佢希望自己嘅仔女可以有堅韌毅力,就算面對各種失敗都可以企返起身再面對,而且要勇敢追夢。而當年貝佐斯被生父拋棄,係由養父一手養大,就算後生時貝佐斯創業資金不足,呢個後父都拎晒自己嘅積蓄幫佢,所以後父嘅支持令佢有自己一套嘅育兒理念。

 

  不過有時候貝佐斯會嚇死人,例如會畀自己仔女係四歲時候玩刀或者電鑽之類,因為連佢前妻都認為,佢情願要一個9個手指頭嘅細路,都唔要一個無解決問題能力嘅細路,好彩班細路嘅手指都健在!而貝佐斯希望人生要為自己選擇,好似揀啱一份自己喜歡嘅工作,先可以全力以赴,工作先會有快樂!

 

比爾蓋茨:14歲先開始畀細路用手機,身家唔會留畀仔女

 

 

(Shutterstock圖片)

 

  相比起前面兩位富豪,比爾蓋茨靠寫程式起家,按道理自己嘅仔女應該好早接觸科技產品;事實係,佢三個細路都係14歲先開始用手機,並且嚴格規管電話使用時間。連科技鉅子都咁嚴格對自己小朋友,各位父母經常用「電子奶嘴」,都真係要反省吓啦!因為有研究指出,小朋友太早使用電子產品會令佢地集中力出現問題,特別會對書本或者閱讀降低興趣!

 

  至於靠Windows系統賺到盤滿缽滿後,蓋茨更想自己嘅仔女靠自身努力去闖出一遍天,所以三個仔女每人大概都係拎到一千萬美金左右,蓋刺其餘身家都會捐畀慈善機構;而三個仔女都無令人失望,大女Jenn拎到生物學學士學位,目前係醫學院繼續讀醫;二仔Lory就係芝加哥攻讀法律;細女Phoebe目前為一個芭蕾舞演員,畢業林肯表演藝術中心!果然三個仔女都搵到自己嘅興趣,有時候「子承父業」未必一定好,最緊要搵到自己興趣,呢位爸爸真係唔話得!

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

我要回應

你可能感興趣

放大顯示

精選文章

  • 生活
  • DIVA
  • 健康好人生