《小傳日記》食穀唔係食穀種！資金炒作「穀子經濟」你又明唔明？

　　神州股市最愛輪炒題材，近日轉炒「穀子經濟」，相關A股概念股走高，連帶相關港股走高，例如KEEP(03650)升咗11%，名創優品(09896)升咗8%，嗶哩嗶哩(09626)就升4%。

　　穀子經濟咁火爆，咁究竟咩係「穀子」？此穀子非我哋平時講嘅穀物吖，如果用普通話嚟讀，其實就係「Goods」嘅諧音，穀子通常指二次元文化、動漫、遊戲、影視等IP衍生出嚟嘅周邊商品，好似徽章、明信片、玩偶、立牌等等各種小物件都算嘅，例如KEEP出圈嘅三麗鷗聯名獎牌、名創優品出嘅loopy公仔等。IP粉絲買周邊商品嘅行動，喺內地就叫做「吃穀」，而近日最吃香嘅「穀子」，當然就係風靡中日韓嘅Chiikawa啦。

　　「穀子經濟」主打年輕人嘅情感消費，都可以話係「為快樂買單」，追求情緒價值。對於吃穀人嚟講，穀子唔單止係商品，更加係佢哋對作品、對角色嘅喜愛嘅體現吖。

　　宜家二次元市場嘅規模愈嚟愈大。中研產業研究院有份報告講，2021年，中國嘅泛二次元用戶群就已經達到4.6億人，市場規模約632億銀人仔。到2024年呢個數字一下子就增長到1200億銀人仔，連帶神州大地都變成全球最大嘅二次元市場啦，可想而之，穀子經濟嘅商機有幾大。

　　穀圈有一句話叫做「一入穀圈深似海，從此錢包是路人」，穀子亦被吃穀人自嘲係「塑料黃金」。原本一個徽章可能成本只係幾十蚊，但係疊加「限量」同「熱門IP」等buff，一個徽章炒到上萬蚊都唔出奇。例如《排球少年》嘅徽章，喺內地二手買賣App閒魚就曾經賣出7.2萬銀人仔嘅天價，要知道一個動漫徽章只係重20克，按克重認真係貴過黃金。

　　要跟風炒穀子經濟，而家加入可能有啲遲，如果要炒長線嘅話，不妨留意下呢啲所謂嘅概念股「含穀量」有幾高，就好似KEEP咁，之前炒AI嘅時候就話有AI教練，結果最尾被大家發現係假嘅，宜家炒AI都唔再帶上佢。

　　最尾提提大家，名創優品今個星期五就出業績啦，成績表現真係唔係太重要，最緊要嘅就係高管會喺業績會上進一步解答，點解要用63億元人幣嘅現金入主永輝超市(滬:601933)，明明已經轉型賣公仔周邊，點解又回頭搞零售百貨？股民敬請期待，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。