《魚缸博客》米字國脫歐協議被國會否決,雖然結果大家都預咗,但首相文翠珊就要面對在
野工黨嘅不信任動議,英鎊兌美元已經跌緊,現時脫歐方向未明,環球股市再現暗湧,傳統智慧
教大家可以買入一啲黃金作避險,其實喺魚缸入邊又有無邊隻金股缸友可以考慮吓呢?
睇返全球最大嘅黄金上市交易基金SPDR金ETF(02840)近排走勢十分凌厲,睇
返公仔圖圓底接近完成,頸線喺970銀嘅位置左右,而MACD同樣配合,股價最近都企喺所
有平均之上,缸友們不妨留意睇睇。
現貨金上年避險吸引力不敵美金,所以2018年就錄三年來首次年度下跌,跌幅
達1﹒6巴仙,不過自聯儲局話放慢加息開始,金價已經上漲,上個月漲5巴仙,喺2017年
1月以來最大月度漲幅,而且SPDR Gold Trust黃金持有量近排亦有上漲嘅勢頭
,反映投資者開始逐步買入黃金。
其實,上年因為大家憧憬聯儲局會加息,相對之下無息嘅黃金避險吸引力自然唔及美金,但
繼主席鮑威爾「放鴿」,前聯儲局主席耶倫喺出屆研討會亦講到,花旗國可能已經經歷本次加息
周期內最後一次加息,並預計低利率會維持一段長時間。而現任聯儲局副主席克拉里達亦暗示,
今年加息次數都會較局方早期預期嘅兩次為少。睇埋現時利率期貨市場數據顯示,「孖屐」普遍
相信聯儲局今年唔會加息,到年底甚至有28巴仙減息。
隨住今年神州同花旗國經濟都有下行壓力底下,月頭金價已經上過接近上年六月中高位
(約1309美金),喺美金走弱下金價都會有支持,缸友不妨現價買入SPDR金ETF,變
身金牛股不是發夢,不過如果穿廿天線(約945﹒17銀)嘅位置就要識走人!
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】本港主要銀行跟隨美聯儲減息,你對樓市前景有否信心?► 立即投票