世事好多嘢都估唔到，好似今日（２１日）Ａ仔終於「入摩」，但魚缸一開市跌成二百幾點之後，又倒升返少少，跌幅一度無晒咁滯，邊個估到吖！不過，見到魚缸呢排又有返Ｄ好友出嚟撐場，令到孖屐氣氛好咗些少，阿臣持貨嘅信心又變得再堅定返。
＊李超人功德無量，又傳將會退休＊
踏入六月，又係考完試就準備放暑假嘅日子，長和（００００１）主席李超人又對莘莘學子行善！李嘉誠基金會上個周末再公布，將「善用錢」計劃擴展到屯門，令４區一共過萬名學生受惠，可惜阿臣太早出世，當年仲未有呢Ｄ計劃，可以蒙受超人護蔭。
估唔到，有份打造今時今日香江繁榮嘅李超人，噚日（２０日）就被傳話將會退休，喺出年前卸任主席一職，下個月將會８９歲嘅超人，可能會喺９０歲生日前退落嚟，轉做集團嘅高級顧問。
不過，長江１號發言人就話，李超人身體健康非常好，但而家仲未有確切嘅退休時間表。超人今朝就話如果退休，一定會宣布。阿臣真羨慕超人，羨慕嘅唔係佢有咁多錢，而係佢仲有咁好魄力！阿臣一定會好好向超人學習！
而所謂「長江後浪推前浪」，或者李超人將來嘅退場，意味住一個新時代嘅展開。阿臣感覺到，隨住上一代嘅退下，加上科技、內地同環球局面嘅巨大變化，魚缸將會一步一步改頭換面，迎來新局面。
＊過往公司重組，皆為退休而鋪路？＊
查實早喺長和重組，就已經有人覺得係李超人為退休嘅鋪路。而早前和記電訊
（００２１５）出售和記環球電訊，有外媒話暫時有意向嘅買家包括香港寬頻（０１３１０）、匯港電訊。有消息估計和記環球電訊估值約１５億美元，折合大約１１７億港元，不過既然有興趣買家唔止一位，咁出價應該會高過呢個估值，難怪和記電訊股價節節上升。如果從「超人退休會整頓系內業務」呢一個思路出發，咁同系嘅長建（０１０３８）、電能（００００６）或者都係唔錯嘅吸納對象。
檢討今個星期嘅倉位，由於潤地（０１１０９）股價無跌穿２１蚊，即係張認沽期權暫時仲係處於虧損狀態，不過既然大市升，呢少少成本就當買保險，反而阿臣寄望嘅係長和，似乎後市仲有力試上返１００蚊關口！
表列截至６月２１日止投資組合表現：
－－－－－－－－－－－－－－－－－－－－－－－－－－－－－－－－－－－－－－－－
股票倉
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
長和 ５００股 ９９﹒６元 ９８﹒７０元 ４９３５０元
－－－－－－－－－－－－－－－－－－－－－－－－－－－－－－－－－－－－－－－－
期權倉
股份 種類 張數 行使價 到期日 買入價 總成本 盈虧
－－－－－－－－－－－－－－－－－－－－－－－－－－－－－－－－－－－－－－－－
潤地 認沽期權 １０張 ２１元 即月 ０﹒１元 ２０００元 －１０００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：４９３５０元
期權市值 ： １０００元
剩餘現金 ：２６９８０元
組合淨值 ：７７３３０元
組合本月收益表現：－ ３﹒１％（截至上月底止組合淨值：７９７８０元）
組合累計收益表現：＋１９﹒０％（本金６５０００元）
＊數據截至今日１１：３０ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
