取消強積金對沖可謂前朝梁振英政府留畀林鄭月娥呢屆政府嘅一大考驗，皆因最初個方案一出，兩面不討好已經係鐵一般的事實。好啦！林鄭個新班子上場，即刻諗過個新方案，希望可以順得哥情時，都唔好失嫂意。如何去游說勞資雙方呢個任務，落喺同唔同黨派都
「有計傾」、ＩＱ１６０嘅勞工及福利局局長羅致光身上，可惜之前一眾商會對個方案話「麻麻」，今日自由黨仲擺明車馬話「Ｄｉｓｌｉｋｅ」，睇嚟今勻一向「好好先生」形象嘅ＣＫ都好頭痕，可能最後要做一次醜人喇！
＊林鄭見自由黨，會上冇乜嘢講＊
林鄭月娥繼續為咗１０月發表嘅《施政報告》周圍見政黨收集意見，今日嘅主角就係代表商界聲音嘅自由黨喇！自然就梗係講吓經濟、營商呀之類嘅話題。
自由黨立法會議員鍾國斌同Ｊｅｎｎｙ講，佢哋同林鄭主要傾咗一堆經濟產業發展問題，好似稅務優惠二級制、公私營醫療合作、學券制、撤銷限奶令、引入海外醫生及適量輸入外勞等等
，大家會面氣氛都幾好㗎。
張宇人仲話畀Ｊｅｎｎｙ知，林鄭今日其實好少就佢哋嘅意見回應自己看法，因為林鄭今日主要係想聽政黨意見，但就覺得林鄭對自由黨唔陌生，大家理念接近咁話。
＊取消對沖新方案？商界：接受唔到囉！＊
語鋒一轉，鍾國斌就講起商界最關心嘅，取消強積金對沖問題，話商界始終都未接受到羅致光提出嘅新方案。佢同Ｊｅｎｎｙ解釋，話而家即使有十年過渡期，咁其實個問題只係變咗喺第１１年出現，並唔係解決問題嘅方法云云。不過，鍾國斌話晒做咗咁多年議員，佢都睇得好透徹㗎！佢話相信政府已經係事在必行，咁喺立法會就係會夠票通過。
其實，ＣＫ近來真係好努力去游說勞資雙方㗎喇！好似之前就同咗工聯會傾，工聯會就讚佢答覆有「新驚喜」、「貼地」。之不過﹐商界就對方案有啲保留喇！今次自由黨講到咁白，聰明如ＣＫ其實又點會唔知「棘手」吖！睇嚟佢要繼續諗計喇，好彩而家有副局同政助幫手，同政黨「講數」唔駛再一腳踢。不過，想喺１０月《施政報告》有詳情就難啲喇！畀啲耐性等年底啦！唔係Ｊｅｎｎｙ講㗎，係ＣＫ同張建宗之前講嘅！《Ｊｅｎｎｙ Ｙｉｎ》
【你點睇】本港主要銀行跟隨美聯儲減息，你對樓市前景有否信心？► 立即投票
