《小傳日記》樓市新政策，魚缸繼續發；磚頭佬得米，錢莊見升勢！

　　隔晚花旗國孖屐表現牛皮，因為《褐皮書》好似透露出花旗國經濟麻麻地，但反而對月尾減息預期升溫。魚缸今早高開１４４點之後就繼續攀升，一度掂到２６９５６點升２９２點，但尾市就開始升幅收窄。大家繼續追捧本地磚頭佬，主要炒《施政報告》新政策，特別係樓宇按揭同埋土地供應，連帶街坊本地錢莊都炒埋一份。最終恒指收報２６８４８點，升１８４點或升逾半巴仙，主板成交７２１﹒６２億跌一成二。國貨收報１０５８８點，升５６點或升逾半巴仙。
　　內地Ａ場走勢牛皮，上證綜指報２９７７點，跌１點；深證成指報９６４５點，升３點。兩市合共成交３６１２億人仔。
　　大隻藍戰士方面，生發發（００３８８）表現靠穩，微漲不足半巴仙，報２３７銀；ＱＱ（００７００）無升跌，報３３１銀；建行（００９３９）升近半巴仙，報６﹒３１銀；中移動（００９４１）早前係香港競投５Ｇ頻譜中最大收穫，股價抽升逾１巴仙，報６６﹒０５銀；ＡＩＡ（０１２９９）踢高近１巴仙，報７５﹒７５銀。

＊政府撐樓市磚頭佬雪恥，放寬做按揭錢莊升勢現＊

　　政府份《施政報告》嘅新土地同房屋政策推出之後，本地磚頭佬炒足兩日，瑞信發表報告話，政策終於放鬆按揭政策，首推恒地（０００１２）同新世界（０００１７），今日股價立即飛高高，恒地升逾１巴仙，報３８﹒７５銀，新世界飛起近４巴仙報１１﹒１８銀；新地（０００１６）漲近１巴仙，報１１６﹒１銀；會德豐（０００２０）升近半巴仙，報４６﹒８銀；長實集團（０１１１３）微升一亳半子報５３﹒８銀。
　　呢次放寬按揭政策之餘，如果過唔到壓力測試，有指話業主畀多１５巴仙按揭保險就搞得掂，本地錢莊又可以多返生意做，梗係立即炒返高。大象（００００５）開車抽高逾１巴仙，報６０﹒９銀；小象（０００１１）飛起近２巴仙，報１６５﹒４銀；東亞（０００２３）微漲近半巴仙，報１８﹒５２銀；中銀香江（０２３８８）踢高逾１巴仙，報２６﹒９５銀；渣打（０２８８８）進帳近１巴仙，報６６銀。

＊神州出政策內房繼續撐，物管齊上望二線股最旺＊

　　早前神州政府又出放鬆限購政策比大家買磚頭，加上又有大行加持，所以今日部分磚頭都識向上。祖國海外（００６８８）最威水，彈高近２巴仙，報２６﹒２銀；碧桂園（０２００７）及萬科（０２２０２）齊齊升唔夠１巴仙，報１０﹒８６銀及２９﹒０５銀；新城發展（０１０３０）同恒大（０３３３３）就唔生性，分別落半巴仙同接近１巴仙，報７﹒８７銀報１８﹒４８銀。
　　神州大行中金睇好內地磚頭佬，一班物管佬都唔執輸，跟著個勢一齊炒上，今日尤其係二線嘅物管佬表現標青。佳兆業美好（０２１６８）同奧園健康（０３６６２）齊創上市新高，靚仔齊漲逾５巴仙，分別報１６﹒８４銀同５﹒８７銀。永升生活服務（０１９９５）升近４巴仙，報４﹒３３銀；中海物業（０２６６９）揚２巴仙，報４﹒２７銀；最近一直強勢嘅雅生活服務（０３３１９）只係升逾１巴仙，報２２﹒４５銀。

＊大行谷唔起藥佬走得疲，人仔見反彈食品佬畀讚＊

　　早前大行麥格理就話睇好中生製藥（０１１７７）創新藥銷量，將佢提級至「跑贏大市」，刺激股價破一個月高，但係好景不長，今日倒跌近１巴仙，報１１﹒２４銀。而其他醫藥佬近日走勢都認真弱弱地，石四藥集團（０２００５）跌逾１巴仙，報６﹒３５銀；藥明生物（０２２６９）跌唔夠半巴仙，報８１﹒９銀；石藥集團（０１０９３）升逾半巴仙，報１６﹒９銀；三生製藥（０１５３０）叻仔有得升逾１巴仙，報１３﹒９６銀。
　　今日人仔又彈返起身，係神州食品佬即刻醒神晒！康師傅（００３２２）鏟高近２巴仙，報１０﹒７銀；旺旺（００１５１）升約１巴仙，報６﹒３２銀；日清食品（０１４７５）最犀利，飆近８巴仙，報７﹒１８銀；統一企業（００２２０）同達利食品（０３７９９）就唔爭氣，一齊碌低約半巴仙，報８﹒３４銀同５﹒１９銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。