《小傳日記》雷軍效應，新車轉出租，小米SU7成吸粉引擎

　　小米(01810)SU7上月「千呼萬喚始出來」後，不單止超額認購，仲立即成為財經界及社會熱話。市場反應熱烈，就如雷軍尋日都講，有太多「萬萬沒想到」，包括訂單確實遠超集團最樂觀嘅預期、「霞光紫」成為最火嘅顏色，同埋女性車主佔比非常高等。　
　　其實，雷軍想不到嘅何止係呢啲。由於小米SU7實在太HOT，首批新車喺4月3日開始正式交付後，攞到車嘅車主們，見到有利可圖，已經開始攞駕車來賺外快。有人將新車攞來出租，每日租金大約2000至3000人仔。特斯拉Model 3租1日都不過係300人仔，俾小米SU7抛離九條街，今次仲唔俾雷軍威返次？
　　乜嘢人會來租車？除咗落訂小米SU7但仲未收到車嘅准車主之外，更多嘅係來蹭熱度，吸粉嘅網紅。據了解，首批開始交付嘅5000台車為小米SU7創始版，小米SU7標準版及Max版原定在4月底啟動交付，最遲嘅Pro版交付期要等到5月底。但從最新用戶提車周期睇，小米SU7 Max版本預計交付時間最遲排到第29周至32周，即係話可能要到12月份先攞到車，比官方預定交付時間慢咗7個月左右。
　　 一眾准車主自然心急想先試為快，小米汽車門店原定每日可以安排90至120人試駕，預約需時大約3至5日。但實際上，因為試駕需求太大，根本無法安排，線上約唔到，實體店電話無人接，排隊試駕一樣遙遙無期。因此，部分等唔切嘅人自然要走去「私人市場」。
　　首批車主中不乏網紅，有抖音博主喺一場向路人展示小米汽車嘅直播中，吸引到近30萬人睇，送禮人數過百人，博主甚至為呢條視頻配上「第一批買到小米SU7嘅人已經回本啦！」嘅誇張標題。作為雷軍親自開車門16位車主之一嘅抖音博主王化萌，更靠多條同小米SU7相關嘅視頻，喺唔夠一周內，漲粉超過10萬，其視頻評論區不乏「我就係睇到雷軍先關注佢」等留言。
　　自己有小米SU7車固然可以吸流量，無車嘅只要租一日，甚至乎租一粒鐘，一樣隨時返本。因此，市場又出現一啲時鐘小米SU7，每粒鐘收500人仔。聽講生意火爆，每日平均租金收入超過3000人仔。3000人仔係咩概念？以小米目前提供嘅首付比例最低15%、貸款期限最長60期為例，小米SU7標準版首付最低只需3.24萬人仔，月供不足3500人仔。即係話一日租金差不多夠供一期車貸，如果日日都咁好景，租返兩三個月就可以回本。
　　俗語話「雷聲大，雨點小」相反，可能雷軍把聲唔係好大，反而令小米SU7嘅震撼力咁驚人。從雷軍話要造車開始，市場一直存在唔少質疑嘅聲音。直到小米SU7推出後，質疑嘅聲音細到幾乎聽唔到。但小米SU7喺社會上所引起嘅回響相信唔會咁快消散。今次可以引發出時鐘租車呢樣嘢，可見雷軍同小米SU7嘅魅力。小米汽車將來係點無人知，但佢嘅第一步已經成功咗。呢個結果，唔單止如雷軍所講「萬萬沒想到」，相信好多人一樣估唔到。請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。