《小傳日記》ＧＤＰ嗒得杯落，好友卻有點失落！

　　《小傳日記》阿爺「吹雞」，缸友就例必埋位？又未必！阿爺今日公布首季ＧＤＰ，今鋪好
威水，錄得增長７﹒４個巴仙，勝孖屐預期。但可惜，而家班缸友個心都情傾他處，
Ｈｏｌｉｄａｙ　Ｍｏｏｄ濃到不得了，炒完一浸之後就速速回塘。
　　恆指今日一度升過近２００點，但最終只係微升２４點，收２２６９６點。至於國貨指數，
曾跌穿一萬點大關，但可幸失而復得，收報１００３５點，都算係萬幸。
　　臨近長假期，今日成交只係得５４５億，睇怕聽日（１７日）都係悶下悶下咁過囉。

＊先升後回吐個場悶到暈，臨近長假期大家放放蚊＊

　　「生發發」（００３８８）喺噚日「割禾青」式走鬼後，隨即再現趁低吸貨盤撐場，食飯前
更曾炒高３﹒５巴仙；但可惜好友後勁不繼，最終今日埋單升２巴仙，收１４４﹒７銀。
　　另一方面，華潤系又再是非纏身，搞到股價走勢相當無癮。話說有記者喺舊年大爆華潤集團
舵手宋林涉瀆職，股價插過一輪後，滿以為件事被掉淡，華潤系可以重新上路；點知位記者噚日
（１５日）再喺微博爆料，指宋林包二奶，更指佢涉嫌貪腐添。雖然舵手例必出嚟否認、澄清，
但淡友有理無理，先出招為快；其中潤電（００８３６）就跌得最傷，全日低３巴仙，收
２０﹒９銀，而潤泥（０１３１３）亦跌１﹒９巴仙。至於潤燃（０１１９３）、華創
（００２９１）同潤地（０１１０９），亦跟大隊跌１巴仙唔夠。

＊是非再纏身華潤系頭痕，生發發反彈開支細香檳＊

　　雖然「燈神」阿里巴巴上巿路好事多磨，話嫁唔嫁，搞到孖屐想睇盤數亦非易事。但好彩雅
虎揸住佢２４％股權，喺佢發業績時，亦可旁敲側擊，一探「燈神」嘅玄機。據雅虎指，「燈神
」喺舊年第４季賺１４億美金，按年升一倍，勝孖屐預期。
　　電貿生意搵到食，但今日科網股就只係開支細香檳。先講番「股王」騰訊，佢喺近期捱沽一
輪後，今日亦只彈高１﹒１巴仙，收５２１﹒５銀；而金山軟件（０３８８８）同擎天
（０１２９７）反跌近１巴仙。相對而言，一眾手遊股嘅走勢就靚過晒行業龍頭，雲遊
（００４８４）同ＩＧＧ（０８００２）都踢高近２巴仙。

＊阿里業績靚科網輕踏前，萬洲未見熱影子各走各＊

　　雖然魚缸近期由低谷回暖，看似生氣勃勃，不過，一啲半新丁就走哂樣？就拎隻早輪最火熱
嘅保利文化（０３６３６）嚟做辦；當日保利文化曾喺缸友嘅掌上明珠，但熱情過，炒風迅速回
潮，跌穿３３蚊「招股價」。佢今日輕輕碌低１﹒７巴仙，收３２﹒５５銀，為第二次「潛水收
巿」。
　　有望問鼎今年「新丁王」嘅萬州（００２８８）已喺噚日開始招股，本以為實力夠，坐定粒
六係「皇帝女、唔憂嫁」；點知孖屐一反大家預期，首日孖展只得１８球，旋即慘變「陰功豬」
。
　　睇番班「影子股」，前排搶閘登場嘅另一豬肉股惠生（０１３４０），今日輕跌０﹒６巴仙
，交投只得３６宗，悶到呆咗一樣。至於兩位魚缸老前輩兩潤（０１０６８）同普甜
（０１６９９），前者跌１﹒５巴仙，後者就下抽高８﹒３巴仙。

＊八號沽盈大套現五千萬，囝囝碌呀碌媽咪痛在心＊

　　雖然大巿今日悶下悶下，但就有唔少「小風波」突襲個別股份。其中，盈大（００４３２）
畀「８號仔」（００００８）掟貨，套現５０球茄殊，搞到盈大成走鬼熱點，全日插低１１﹒８
巴仙，收４﹒０３銀；而「８號仔」雖滿手現金，但股價亦跌１﹒３巴仙。
　　然而，孖屐又唔係咁慘寂嘅，起碼都仲有「鹹魚翻生」嘅希望，講緊嘅係剛終止「１２連陰
」嘅鐵聯傳媒（００７４５），今日以報復式反彈２６﹒９巴仙，收０﹒２３６銀。但補充一句
，隻股自１月高位起計，期間股價累蒸發９１﹒６％，故「鯉魚翻身」仍漫漫長路呀。
　　但點都好，喺魚缸買嘅除咗係公司嘅前景，更緊要嘅係希望呀嘛！Ｒｉｇｈｔ？請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。