《小傳日記》呢排身邊嘅缸友都話好難搵食，孖屐仲係處於「呆滯期」，又無咩消息刺激，
總之就係「炒市悶，炒股難」。今日（２４日）大隻佬全日波幅都只係得１１０點，又點會唔悶
到瞌眼瞓呢？！
不過，大家要小心為上，噚日（２３日）魚缸突然升轉跌，百天線已經正式陣亡；今朝阿爺
又抽水８５０億人仔，好彩大隻佬表面上都叫做仲企得穩。恆指全日埋單升５３點收２２５６２
，國貨指數就輕輕踢高３５點收９９４０；全日總成交又跌番落去，約５０３億銀。
淡友喺不知不覺間，已經一度攻陷咗廿天線（約２２５４８），大隻佬今日最低去到
２２４６１點，差１點就連牛熊線（約２２４６０）都要舉白旗，所以千萬唔好掉以輕心。
＊魚缸極沉悶落鑊甚艱難，最怕眾淡友靜市中發難＊
個市咁悶，暫時又無咩方向，重磅股都係行埋一邊唔講住。先講「小賭王」何猷龍隻愛股凱
升（００１０２）。正所謂「虎父無犬子」，「賭王」何鴻燊喺澳門叱吒風雲，如今「小賭王」
亦遺傳阿爸本色，除咗掌舵新濠國際（００２００）外，凱升就喺俄羅斯大展拳腳，配股抽水加
碼搞賭場！花旗就即刻出報告唱好，升目標價至２３銀。凱升今日已經成功寫下光輝一頁，以
１４﹒６４銀創上市新高，雖然完場回順只升逾６巴仙進帳收１３﹒６６銀。
其他一線濠賭股都唔錯，金沙（０１９２８）阿媽今晚會派成績，囝囝以近全日高位收市報
６３﹒４５銀升逾１巴仙，銀娛（０００２７）就靠穩。
＊俄國搞賭場凱升高高高，魔童與阿信密斟跳隻舞＊
這邊廂有「小賭王」力攻俄國賭業，呢邊廂有打不死嘅「魔童」，搵曾力抗霸權嘅「阿信」
密密斟。話說「魔童」計劃搞２４小時網購，又喺呢個時候，竟然上載咗一張同ＣＥＣ
（００７５９）主席林偉駿嘅合照。雖然林老闆話同魔童合作，都只係初步構思；不過餓咗咁耐
嘅炒友，又點會放過呢個黃金機會，一於不問價照衝入去掃貨。結果，ＣＥＣ完場就飆升１８巴
仙收２﹒６３銀，成交七千幾萬銀。
而港視就無咩鑊氣，始終大家都知道搞免費電視先係佢哋真正大茶飯；依家魔童就透過司法
途徑解決牌照問題。不過，見到魔童打不死嘅精神，缸友都肯出小小力支持，港視埋單都倒升近
１巴仙收２﹒３５銀，成交就有近２９００萬銀。
＊中移失光芒街坊放異彩，聯通中電信齊漲四巴仙＊
祖國電訊業都上演緊「天與地」，龍頭祖國移動（００９４１）風光不再，率先公布令人跌
眼鏡嘅首季業績之後，就連日捱沽，今日開市更穿埋７０大關，低見６８﹒６銀，好彩慢慢有買
盤支持，完場時只係跌０﹒４巴仙，總算挽回番啲面子。
昔日不被放在眼內嘅對手，中電信（００７２８）同聯通（００７６２）就抬起頭來！聯通
之前已經公布首季多賺７４巴仙，成績表夠晒省鏡，今日股價又抽高４巴仙報１０﹒３８銀，成
為最威水大隻佬。中電信就下星期一（２８日）放榜，缸友可能憧憬有驚喜，一於入定貨等慶祝
，埋單就彈高４巴仙收３﹒６銀。
＊國喜發盈喜有貨真歡喜，阿爺來關顧芯片更歡喜＊
國美（００４９３）粉絲一樣咁開心，皆因公司又再發盈喜，估計今年首季盈利將會激增
２﹒４倍以上。睇番舊年盤數，首季扭虧為盈賺７６３３萬人仔，如果按照盈喜幅度計算，今年
首季即係至少賺２﹒６億銀人仔，雖然按季減少至少１６巴仙，但都證明公司的確已經走出谷底
了。難怪今日完場踢高５巴仙收１﹒５銀，創一年高位啦！
仲有芯片股都喺度開Ｐａｒｔｙ，事關孖屐傳出阿爺將會成立一個高達１２００億銀人仔嘅
芯片業扶持基金，憧憬得到阿爺關照，中芯（００９８１）就以５﹒４億銀急升一成，收
０﹒６７銀，而晶門科技（０２８７８）都炒高１７巴仙收０﹒４２銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
樂本健【秋日開倉26 - 27/9】保健品低至$20！► 火速行動
