《小傳日記》望住「滬港通」南北行線每日餘額，真係好難唔令人失望，今日（２０日）南
向資金竟然用咗唔夠２億銀！真係順手一隻熱爆炒股嘅成交都可能仲多。雖然生發發
（００３８８）兩大「揸Ｆｉｔ人」周松崗同李小加，都齊齊向孖屐派定心丸，叫缸友唔好心急
，要著眼長遠，但係望住一日比一日冷清嘅數字，生發發一日比一日低嘅股價，就知道呢粒定心
丸有無效喇…
再望埋全日成交額仲係咁冷清，只得約６１１億，係呢個月第二少成交嘅一日。又難怪嘅，
通車熱潮全退，今日匯豐中國１１月ＰＭＩ初值又創半年新低，想搵個好消息沖喜都難，搞到魚
缸差ＤＤ就跌穿牛熊線（約２３２３２），埋單倒跌２３點收場，報２３３４９，國貨佬就輕輕
跌１點收１０３７９。
＊開通第四天港所天天曳，南北兩行線繼續冷清清＊
見到「滬港通」面無血色，李小加解畫話，滬港通可能仲要靜多一段時間，無計啦，啲水源
只有北上無南下。「滬港通」幾時先可以令魚缸水漲船高，真係要耐心等，等，等…依家就睇住
生發發股價先，今日一度低見１６２銀低位，雖然曾經努力爬番上１６８銀，但埋單都係唔見逾
１巴仙，收報１６５﹒８銀，連續跌咗五日，公仔圖上面，仲出現一支倒轉鎚頭，想入市撈平貨
嘅缸友，小心！
至於另一隻股王ＱＱ（００７００）連續碌低三日之後，終於反彈近番１巴仙，主席馬化騰
話，推出微信電話本，令電訊商數據服務達到雙羸，認真多諗頭，抵佢同軟件股一齊造好喇。至
於馬交班賭仔就慘喇，話說馬交嗰邊預料出年博彩收入可能唔會有增長，難怪嚇到缸友即刻走人
，當中新濠國際（００２００）就大跌４巴仙收１８﹒５４銀，兩位藍戰士就好ＤＤ，銀娛
（０００２７）同金沙（０１９２８）就只係唔見約１巴仙。
＊博彩乏增長濠賭認真傷，油庫將啟用油股齊齊漲＊
呢排魚缸冇乜油，好彩今日有油佬入入油。神州由２００３年開始就籌建石油儲備基地，初
步打算用１５年時間分三期搞掂油庫等等設施，家吓第一期４個基地，包括舟山、鎮海、大連同
黃島嘅基地已經投用，庫容達到１６４０萬立方米，認真犀利！消息一出，一班賣油佬們立即踢
高喇，中海油（００８８３）踢高２巴仙，報１１﹒４８銀，係第二勁大隻佬。中石化
（００３８６）同中石油（００８５７）就逆市升約１巴仙，算係今日表現唔錯嘅藍戰士架喇。
另外阿爺都公布新版嘅能源戰略行動計劃，要求重點突破頁岩氣同煤層氣開發，希望過多五
、六年，頁岩氣產量可以超過３００億立方米。阿爺開到聲，班頁岩氣股份即刻升天！安東油田
（０３３３７）跌足半年，今日去到１﹒３９銀逾兩年低位之後，就大反擊１７巴仙收１﹒６５
銀，成交仲要高達約２億銀，街坊華油能源（０１２５１）都一度踢高一成，不過完場前無晒鑊
氣，最終只係升咗近２巴仙。
＊阿爺夠關照頁岩氣即笑，威高業績曳高台往下跳＊
國貨佬嗰邊，威高（０１０６６）派咗成績表，首九個月少賺一成，如果單計第三季就要跌
３６巴仙，瑞銀即出報告話業績太過令人失望，目標價繼續Ｋｅｅｐ番喺８﹒７銀。結果今日就
要表演「高台跳水」，以３﹒７億銀大成交插低逾１５巴仙收７﹒０２銀，唔單止創埋逾５２周
新低，仲係最曳表現股份，同埋港股通最水皮股份添。今次咁樣被人質落去，就算今日最終守得
到７蚊關，睇怕之後條路都唔係咁易行。
同樣喺港股通成員嘅漢能薄膜發電（００５６６）就真係又威，又高高喇！全日成交高達約
２﹒８億銀，但係佢就表演「跳高」，彈高逾８巴仙收１﹒９３銀破頂，仲拎埋最威水港股通
「冧巴溫」，仲唔恨死威高啦？！
＊２６１復賽爆升夠誇張，渾水來狙擊奇峰忽休戰＊
仲有成班細股都好ＨＡＰＰＹ，中建置地（００２６１）噚日復賽，話賣股單交易傾唔成，
搞到股價一度急瀉。不過今日一開市就衝番上去，下半場就愈升愈急，飆高８２巴仙收０﹒０２
銀，以全日最高位收市，真係估佢唔到。
最後，要提一提隻突然停賽嘅奇峰國際（０１２２８），皆因成為咗沽空機構渾水狙擊對象
，被指公司造假數，舊年收入根本就無７﹒７銀億，實際收入有可能係「零」添！消息一出，奇
峰好快就宣布停賽，停牌前唔見咗近６巴仙報１﹒４６銀。公司就已經話會發澄清通告，睇吓挽
唔挽回到粉絲信心喇……請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
