《小傳日記》孖屐一早預咗花旗國唔會咁快加息，美聯儲局「揸Ｆｉｔ人」耶倫都話，對加
息保持耐性，但補多句話依家經濟已經穩步增長。此言一出，缸友即刻揣測可能最快年中就會進
入加息時代，再加上期油跌到去六年低位，最低得番４４﹒０８銀美金，搞到道指又再急插近
２００點至１７１９１，睇嚟萬七大關都真係有Ｄ危呀…
Ａ場嗰邊都唔好得去邊，噚日（２８日）收市之後，市傳阿爺將會延續第二輪「兩融」檢查
，雖然之後中證監叫大家唔好過分解讀，而且今朝（２９日）仲放水４５０億人仔添，但Ａ場都
頭耷耷唔見逾１巴仙收３２６２點。中美魚缸都自身難保，香江就梗係向下碌喇，喺期指結算日
大跌２６５點收２４５９５，國貨指數就仲慘，跣低２２７點收１１７３６，全日總成交８９５
億銀左右。
缸友真係要綁好安全帶，睇實呢幾日十天線（約２４４６９）仲守唔守得住啦！
＊中美魚缸弱左右各一巴，香江向下碌友邦誇啦啦＊
中港美魚缸都轉弱，香江今日就有約９００隻幾股份「扯白旗」。藍戰士入面，潤電
（００８３６）就嘔番噚日部分升幅出嚟，跌逾４巴仙做咗最差大隻佬；兩大地主潤地
（０１１０９）同祖國海外（００６８８）就拎咗第二及三名，齊齊唔見約４巴仙。
大隻嘅ＱＱ（００７００）同大象（００００５）都腳仔軟；而友邦（０１２９９）之前因
為升得太多，今日散場前就急回近３巴仙收４５﹒１銀，連十天線都穿埋。
反而平時無咁活躍嘅恆安（０１０４４）、港鐵（０００６６）同蒙牛（０２３１９）就大
發神威，順序奪得最威水表現首三名。恆安就因為獲高盛納入「確信買入」名單，股價就衝高近
４巴仙收８８﹒８銀創埋一年新高。港鐵西港島線西營盤站料３月底啟用，今日破頂慶祝，收升
近３巴仙赧３４﹒６銀；蒙牛亦漲近２巴仙收３５﹒４５銀。
＊高佬畀個讚恆安靚爆鏡，資金搵出路港鐵開快車＊
噚日花旗國話原油庫存增加多過預期成兩倍咁多，油價又點會唔畀人壓低，收市跌差唔多４
巴仙，最低試過去到４４﹒０８美金，差唔多係六年低位。油價大插自然搞到國內一班石油大亨
好頭痕，中海油（００８８３）上游業務比較多，搞到佢又跌逾２巴仙，報１０﹒２銀。中石油
（００８５７）亦唔好得去邊要跌２巴仙，而中石化（００３８６）就下游業務多啲，所以只係
跌逾１巴仙。睇嚟呢班石油大亨短期仍然會受壓，大家最好少掂為妙。
另外，有消息話祖國工信部可能係今年５月１７日發個ＦＤＤ－ＬＴＥ牌比中電信
（００７２８）同中聯通（００７６２），到時佢地兩個就可以同中移動（００９４１）喺４Ｇ
市場嚟個拗手瓜。不過，單睇今日股價表現，中移動就略勝一籌升近１巴仙報１０４﹒３銀，相
反中電信同中聯通就分別要跌４巴仙同逾２巴仙。
＊油價六年低油股被壓擠，中電信聯通今天甚閉翳＊
阿爺展開第二輪「兩融」檢查，繼續出手遏抑炒風。雖然中證監解釋話係日常監管工作，叫
缸友唔使太驚，但係明眼人都知發生咩事，券商股呢排都好難有運行架喇，大隻嘅海通證券
（０６８３７）、中信証券（０６０３０）同銀證（０６８８１）都齊齊唔見２至逾３巴仙。
除此之外，更有消息話，阿爺要求祖國錢莊要嚴控資金流向股市，一眾錢莊都無晒心機，建
工中農都碌低１至２巴仙，中小型嘅錢莊入面，民行（０１９８８）資產質素無咁好，搞到今日
都係跌得最傷，埋單唔見近５巴仙收９﹒５銀。
講開錢莊，香江呢邊嘅渣打（０２８８８）都好陰功，市傳兩大銀行Ｌｌｏｙｄｓ同大象英
國高層，成為接任ＣＥＯ大熱人選，消息愈傳愈熱，唔知係咪缸友驚之後新人事，新作風，都決
定掟貨走人，搞到渣打急跌近４巴仙收１０６﹒５銀，「紅底股」都危危乎呀！
＊渣打與民行齊齊遇沽壓，券商有點累核電光燦燦＊
今日魚缸咁冇力，但係一班發電機仲可以繼續發電，認真唔簡單。事關阿爺開到聲，部署加
快鐵路、核電、建材生產線等神州裝備「走出去」，又話要推進國際產能合作、提升合作層次；
同埋支持發展「眾創空間」嘅政策措施，為創業創新搭建新平台。消息一出，一班核電仔就一馬
當先衝出幾個價位。上海電氣（０２７２７）（滬：６０１７２７）今日就跑出逾２巴仙，Ａ仔
果邊更飛高近８巴仙。東方電氣（０１０７２）（滬：６００８７５）諮番轉，Ａ仔踢高２﹒６
巴仙，但香江呢邊亦彈高逾３巴仙。街坊中廣核電力（０１８１６）都有逾４巴仙進帳添！
至於一班發電廠，除咗潤電（００８３６）跌得甚激之外，其他同業都唔錯，大唐發電
（００９９１）飆上逾３巴仙，報４﹒２１銀；中國電力（０２３８０）就抽高近２巴仙，報
４﹒３７銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
