《小傳日記》阿爺呢排好多會要開，缸友就乖乖等聖旨，睇準機會入市！唔使講，「一帶一
路」繼續係重中之中，而「互聯網＋」都係今年主力發展方向，所以鐵路同科技股呢排都輪住衝
高。不過，Ａ場早排升得太多，依家都仲唞緊，繼續炒股不炒市格局，收升ＤＤ報３６９１點。
香江就繼續聚焦各大公司業績表，一如預期祖國錢莊表現無驚喜，工行（０１３９８）全年
只多賺５巴仙差過預期兼減息；雖然大行都幫拖唱好，但粉絲就懶得理，掟貨走人，埋單收跌逾
１巴仙報５﹒５銀。另一邊廂，祖國磚頭有阿爺呵護，內房股即刻開Ｐａｒｔｙ慶祝，成為今日
新寵兒。
可惜重磅股呆呆滯滯，香江魚缸想發力都難，收市報２４４８６點跌１０點，國貨就唔見
２１點收１１８９８，全日主板成交７７９億銀。等埋下星期一（３０日）期指結算日，好淡友
決一勝負，後市走勢相信會更清晰。
＊內銀紛放榜無驚亦無喜，鐵路與科技阿爺來錫錫＊
祖國樓市積弱咗一段時間，唔少地方都出現「鬼城」，阿爺終出手要拯救身處水深火熱嘅地
主佬。國土部、住建部下發文件，要求優化住房同用地供應結構，確保房地產孖屐要健康發展。
兩隻藍戰士潤地（０１１０９）、中海外（００６８８）高據恆指升幅頭兩位，分別踢高５巴仙
同近４巴仙，收報２１﹒９銀及２４﹒９５銀。不過缸友要留意，兩隻藍戰士查實已經衝高咗一
段時間，差唔多呈超賣，短線可能有高位回吐嘅風險架，小心。
其實唔單止優化住屋呢個好消息，內地傳媒傳出，祖國好多地方都鬆綁公積金貸款撐樓市，
仲可能有唔同嘅新方案接踵出台，「氹」到班二線街坊都好開心，好似保利置業（００１１９）
全年少賺６６巴仙，但都照樣叨光衝高近６巴仙。雅居樂（０３３８３）、富力（０２７７７）
都各有７至４巴仙進帳。
＊股仔伸伸手粉絲眉頭縐，內房反彈了今天高高收＊
前排「陰啲陰啲」升嘅位元堂（００８９７）今日復賽，原來宣布「抽水」！折讓三成左右
「二供一」兼改每手買賣單位去到二萬股，籌２﹒２１億銀。今日一開市就即插低逾兩成，最尾
都唔見２４巴仙，報０﹒１２銀。咁啱得咁橋，英皇證券（００７１７）又係折讓三成「二供一
」，不過都唔夠喉，仲要配股籌多近１３億，結果股價蒸發咗１５巴仙。
合併遐想永遠是最美麗的，但遐想終有一日要面對現實。廣船（００３１７）母企合併遐想
響短暫嘅一日之後就破滅咗，公司發咗澄清，指阿媽無諗住要合併同收唔到政府有呢個意思，噚
日爆升１８巴仙後，今日即肯插返近１１巴仙，報２０﹒４銀。
跌得好慘嘅仲有志道（０１２２０），今日無端端插咗３１巴仙，報１﹒８５銀。
＊合併夢發完廣船急急插，中交建然氣績前先踢高＊
近排全球焦點當然係阿爺牽頭嘅亞投行啦，啱啱又傳嚟好消息。土耳其同泡菜國宣布申請以
創始成員國加入，加上孖屐憧憬喺博鰲亞洲論壇會有「一帶一路」規劃方案出爐，相關股份再逆
市炒高。北車（０６１９９）、南車（０１７６６）分別升４巴仙同逾３巴仙，收報１１﹒１４
銀及１０﹒２４銀；下星期一（３０日）放榜嘅中交建（０１８００）都有近２巴仙升幅。
潤燃（０１１９３）舊年多賺１５巴仙至２４﹒８２億銀，績後又有大行出嚟美言幾句，刺
激股價抽高７巴仙，收報２３﹒３銀，一掃霉氣。其他街坊都齊齊叨光，中國天然氣
（００９３１）趁下星期派成績前彈高４巴仙。新奧能源（０２６８８）就收市後揭盅，股價都
偷步升近３巴仙。中燃氣（００３８４）都唔執輸，都袋番逾３巴仙落袋。
＊潤燃盤數正大行來添花，利標好靚仔皆因萬人迷＊
利標（００７８７）舊年少賺８﹒２巴仙，成績唔合格，不過搵到萬人迷碧咸合作搞公司去
發展高科技同運動產品，成功令缸友暈晒浪一於力撐，今日彈高１２巴仙報１﹒３７銀，萬人迷
魅力無法擋！不過點講都唔夠僑威（０１２０１）厲害，事關停賽超過一年，而家符合返參賽資
格，正式復賽，即宣布舊年成功扭虧為盈賺６５１７萬，今日最多爆升近８７巴仙，埋單就縮番
ＤＤ，但都升近四成報０﹒９７銀，勁。
相反，中外運（００５９８）董事長趙滬湘同總裁李關鵬早排缺席分析員會議，搞到大家左
估右估，估到要先掟貨，結果股價插低６巴，成個星期計唔見咗兩成呀！
另一邊廂，就有兩間公司「揸ＦＩＴ人」唔妥對方，搞到上法庭。話說九倉（００００４）
副主席吳天海被問到會唔會買融綠平台時，就話如果價錢啱都會諗吓。呢番說話畀融創
（０１９１８）董事長孫宏斌聽到，直斥九倉無品兼唔守法。搞到九倉嬲嬲地，今日正式告佢誹
謗。不過，呢Ｄ恩恩怨怨，對股價又唔會有咩影響嘅。融創今日漲近７巴仙，報６﹒５５銀，九
倉都升咗０﹒６巴仙。假期偷快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
