《小傳日記》五一前遇寒，魚缸無力闖；內房突炒高，無貨心慌慌！

　　《小傳日記》花旗國噚晚（２９日）公布首季經濟增長放緩，兼差過預期，跟住美聯儲局就
宣布維持息率不變，又無暗示想提早加息，好友當堂放下心頭大石。不過，歐洲嗰邊，企業成績
唔多掂，歐元又反彈，搞到德國股市急插逾３巴仙，英法市都唔見１至３巴仙，一字記之「弱」
。
　　Ａ場今日（３０日）都無咩力，長假期前回吐番０﹒８巴仙收４４４１，繼續處於整固階段
。香江呢邊嘅祖國錢莊派完成績表後就「舉晒白旗」，其他中資股好似祖國移動（００９４１）
都腳軟無力。結果，魚缸埋單唔見２６７點收２８１３３，好彩嘅係仲收高於十天線
（約２７９８３），國貨佬就跣低１７１點報１４４３１。全日主板成交１７０９億銀左右。

＊內房追落後港房繼續上，新世界大刁破頂急急漲＊

　　大市回吐，但祖國磚頭就跑贏晒所有板塊，威盡魚缸！全靠阿爺前排係咁出招幫班患咗「低
溫症」嘅磚頭商升溫，似乎終於有啲成效。發改委發文章話，喺寬鬆政策下，３月份９０個重點
城市新建商品房交投按年升四成。難得暖返少少，潤地（０１１０９）「嘭嘭聲」衝高逾７巴仙
，見２８﹒２５銀，創埋上市新高，係最威水大隻佬。另一位大哥祖國海外（００６８８）都有
５巴仙入袋。不過二、三線地產商升得仲勁，當中，恆大（０３３３３）最誇張，近２８億銀大
成交爆升１９巴仙，係升幅最大嘅「港股通」！雅居樂（０３３８３）同碧桂園（０２００７）
、保利置業（００１１９）都借勢飆高７巴仙至１０巴仙。勁呀！
　　花旗國議息按兵不動，香江地產商亦有正面回應。當中新世界（０００１７）有大生意宣布
，同阿布扎比投資局組合營，注入香港三家酒店，預計可以錄得１５５億收益，難怪股價逆市行
前逾２巴仙；街坊恆地（０００１２）同新地（０００１６）齊齊踢上兼破一年高位。惟獨超人
１號（００００１）獨憔悴，輕輕唔見０﹒１巴仙。

＊四大行放榜缸友真失望，德國佬踐踏聯通跌到慌＊

　　魚缸今日回吐，祖國錢莊難辭其咎。梗係喇！幾間大隻佬首季盈利增長都唔夠兩巴仙，孖屐
唔多唔少都會好失望；其中中行（０３９８８）係四大行入面表現最差，首季盈利進帳得１個巴
仙，股價今日走低３﹒６巴仙，收報５﹒３３銀；囝囝中銀香港（０２３８８）都唔好得去邊，
唔見咗４巴仙有多。另外，多間大行都輪住出嚟講嘢，雖然未致於話大潑冷水，但評價只算不過
不失，工行（０１３９８）、建行（００９３９）跌近２巴仙。
　　聯通（００７６２）下調國際漫遊數據流量費，就算有德銀出嚟護航，都阻止唔到股價跌勢
，今日就急插近６巴仙，收報１４﹒５６銀，係表現最差嘅藍戰士。中移動（００９４１）同中
電信（００７２８）分別跌約３巴仙左右。

＊永利續遇壓成交有異樣，資金追落後紙業逆市漲＊

　　魚缸回吐，唔少股份都屋漏逢夜雨。傳瑞聲（０２０１８）失去蘋果訂單，因為被發現零件
有缺陷，消息令到股價大挫，試過連４０蚊大關都守唔到，收報４１﹒１５銀跌逾５巴仙。
　　另一邊廂，濠賭股永利澳門（０１１２８）之前宣布咗份好差嘅季績，搞到今日上半場臨完
場前，突然錄近２３億嘅大手交易，佔發行股本近３％，雖然未知邊個大戶掟貨？又邊個接貨？
但隻股業績曳，今日要再跌逾２巴仙，收報１５﹒７８銀。兩隻藍戰士銀娛（０００２７）同金
沙（０１９２８）防守力算唔錯，軟１個巴仙唔夠。
　　今日大市顯著回吐，但值得慶幸嘅係，有部分資金轉去尋找一啲相對落後嘅股份。今日除咗
炒起內房之外，另一個幸運板塊就係紙業股；玖紙（０２６８９）踢高超過１１巴仙收報
６﹒３５銀；理文造紙（０２３１４）就抽高近７巴仙，造４﹒４１銀。

＊合一與藍鼎炒到㷫烚烚，７４５急回新丁各走各＊

　　茫茫股海中，能夠成為缸友焦點，梗係要「爆升」兼有「成交」配合喇！合一投資
（００９１３）失驚無神以４﹒８億銀飆升１９巴仙，報０﹒３１５銀。
　　升到癲咗嘅藍鼎（００５８２）又係無原因咁展開升浪，最尾飛上８７巴仙，報０﹒１８９
銀，成交仲超過１６億銀！
　　啊，講漏咗其實倒插都可以吸引眼球㗎！國家文化產業（００７４５）前兩日飆咗９１巴仙
後，今日獲利回吐盤湧晒出嚟，最多插過近２９巴仙，認真驚驚。
　　細價股表現「天與地」，今日啱啱上場嘅兩隻新丁都一樣。鑄能（０８１３３）配售上市，
一開場就爆升咗上去，收報２﹒１３銀，較配股價高出近十倍！昊海生物（０６８２６）似乎就
有啲迷茫，收報５８﹒４銀，較招股價５９銀低１巴仙。不過路遙知馬力，缸友都係睇定啲再決
定！假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。