《小傳日記》噚晚（２６日）外圍魚缸大風大雨，花旗國又驚息魔來臨，搞到唔見咗１９０
點；歐洲嗰邊就因為希臘危機未解決，表現呆呆滯滯。歐美唔多妥，嚇到香江缸友今日
（２７日）唔敢瞓身入市，噚日炒到熱烘烘嘅基金互認都急降溫，就連Ａ股獲納入富時指數，Ａ
場升到去４９４１點，都幫唔到香江再衝前。
查實呢排重磅大隻佬升得太多，今日生發發（００３８８）及友邦（０１２９９）回吐，再
加埋中移（００９４１）繼續弱，難免拖低大市。不過，相信只係健康調整，好友正等緊一個進
攻機會！
總結全日表現，二萬八關失而復得，收跌１６８點報２８０８１；國貨佬受內銀內險拖累，
埋單唔見１００點報１４７０１。主板成交１５７５億銀左右，比噚日少咗約兩成。
＊外圍打大風Ａ仔續輕鬆，跟醜唔跟好香江有點凍＊
和黃（０００１３）告別股壇，可惜噚日Ｌａｓｔ Ｄａｙ收市前突然急跌，未能夠劃上一
個完美嘅句號，喺歷史上寫低漂亮嘅一筆。媽媽長和（００００１）今日除淨，今朝開市後曾低
見１１３﹒５銀，之後又上升返ＤＤ，全日最後收報１１８﹒２銀。分派嘅長地
（０１１１３）將會喺６月３日掛牌。
不過大市始終頹頹地，幾隻大隻重磅股今日都係跟隨魚缸一齊頹廢。摩通增持大象
（００００５）成２﹒５億股，不過股價都係唔見０﹒６巴仙。富瑞就提升祖國蠕動目標價，不
過都一樣唔見近１巴仙。連友邦都慘豬豬，跟隨跣低１﹒６巴仙。
但同股唔同命，康師博（００３２２）季績後比「巴仔」調低目標價，但埋單反彈近７巴仙
，係最巴閉大隻佬，認真犀利！
＊深港通開通股仔紛起動，富時縱畀讚ＥＴＦ失寵＊
富時指數決定受埋Ａ仔玩，「孖屐」估到時Ａ仔會有多８００億美金湧入去，但因為好多中
資金融股股價今日唔多掂，Ａ仔ＥＴＦ都要跟市回吐，南方Ａ５０（０２８２２）、安碩Ａ５０
中國（０２８２３）同埋華夏滬深三百（０３１８８）齊齊唔見約１巴仙，南方Ａ５０同華夏滬
深三百都創過新高，分別係１８﹒３２銀同６６﹒５銀。
祖國證監指下半年實施「深港通」，樂觀Ｄ諗，最快咪即係７月？！部分心急嘅缸友就決定
衝咗先算，相關股即刻逆市向上，浙江世寶（０１０５７）（深：００２７０３）Ａ股較Ｈ股溢
價高達２﹒９倍左右，梗係率先受捧喇！今日逆市踢高４巴仙收１５﹒６６銀；山東墨龍
（００５６８）（深：００２４９０）Ａ股溢價有２﹒４倍左右，今日Ｈ股收市都升近２巴仙。
＊紫金今復賽加鞭發力追，泊個好碼頭８１５很帥＊
紫金（０２８９９）停賽成個月有多，今日公布非公開發Ａ股籌百億銀，兼投資兩個銅礦項
目，復賽後表現勇猛，抽升逾１６巴仙收３﹒４８銀，仲一度創近四年高位３﹒６２銀，總算吐
氣揚眉！另一隻復賽嘅祖國白銀（００８１５）泊到好碼頭，折讓兩成配股畀財險
（０２３２８）等大粒佬，復牌後踢高１３巴仙，收５﹒９９銀。
不過講到巴閉，中建置地（００２６１）今日威到盡，宣布可能抵押附屬畀主要股東中建富
通（００１３８），仲話周不時有人搵佢傾注資，結果隻２６１以逾１４億銀成交炒高近４５巴
仙收市，報０﹒０６８銀，隻１３８亦都有８巴仙進帳。
雖然大市回軟，但細股炒風不絕！原來祖國有個財經吹水網站做咗「大媽」嘅「軍師」，噚
日成功推高匯源（０１８８６）同琥珀（０００９０），今日再點名推國聯通信（０８０６０）
同埋勵晶太平洋（００５７５），雖然已經齊齊發不明升因，但埋單都分別爆升６９巴仙及３１
巴仙，認真誇張！
＊細價股熱炒不要問原因，軍工續威威新丁有苗頭＊
阿爺噚日公布一個軍事戰略白皮書，話中國陸軍會加快多能化，提高精確作戰能力。海軍空
軍都會作出轉變，結果三軍未動，軍股先行，Ａ場嗰邊Ｄ軍工股風雲再起，連帶香江軍工概念股
都繼續炒上。中航工業（００２３２）、廣船（００３１７）、航天萬源（０１１８５）、航天
控股（０００３１）都抽高１巴仙至８巴仙不等，認真強勁！
今日有三位新丁加入魚缸大家庭，大家都各有進帳，都算叫對缸友有交代。好似德基科技
（０１３０１），暗盤價已經比招股價高兩成，今日股價收報２﹒６２銀，高招股價１５巴仙。
雲南水務（０６８３９）就報７﹒２５銀，高招股價兩成五。最勁嘅，當然係配售上市嘅超智能
（０８３５５）直頭比批盪價高１４倍收市，報５﹒３９銀！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
