《小傳日記》又到每個月好淡友決勝負嘅日子，今次淡友簡直贏到開巷，「國家隊」匯金減
持祖國錢莊，嚇到Ａ場缸友無鞋挽屐走，Ａ場急瀉近７巴仙收４６２０點。香江呢邊Ａ仔升唔跟
升，Ａ仔跌跟住跌，仲要受埋花旗國加息陰霾嘅影響。今日（２８日）魚缸一眾中字輩舉晒白旗
，恆指最多跳水８３８點，好彩埋單叫做跌少咗，不過都要收低６２６點或２﹒２巴仙，收報
２７４５４。國貨佬傷亡仲慘重，蒸發５１８點或３﹒５巴仙，收１４１８３，盤中仲曾經跌穿
萬四關添。
香江魚缸跌得咁急，十天線及廿天線都齊齊被攻陷，全日有超過１２００隻股下跌，主板成
交有２０６０億銀左右。大成交跳水，睇嚟淡友唔會咁易收兵，二萬七關不可失！
＊匯金忽減持工行與建行，Ａ仔香江市齊齊急插水＊
當近排好消息不絕，基金互認、「深港通」快開車等，人人都覺得Ａ場破五千大關不是夢時
，「國家隊」匯金就喺呢個時候叫醒大家，原來喺今個星期二（２６日）已經減持工行
（０１３９８）（滬：６０１３９８）同建行（００９３９）（滬：６０１９３９）Ａ股，合共
套現超過３５億人仔。呢個數目對於「國家隊」嚟講就梗係濕濕碎，但係今年第一次出手掟貨，
就足以嚇震兩地股市。
唔使問阿貴，講得出嘅中字輩都受重創，當中建行破頂見７﹒９８銀之後就愈跌愈深，埋單
插低近４巴仙收７﹒６５銀，其他街坊跌幅都介乎２至４巴仙。內險股、ＥＴＦ股傷得仲勁，閒
閒地都唔見４至６巴仙，慘！
＊眾股扯白旗港所有尾陣，花旗畀個讚一號做奇葩＊
再睇下班大隻佬表現，長和（００００１）做咗逆市奇葩，全城大恐慌之際，竟然仲可以衝
高逾２巴仙收１２１銀。超人力場果然厲害！花旗仲出咗報告話，高處未算高，叫缸友繼續買貨
，上到１５０銀見。
其他大隻佬無一倖存，百麗（０１８８０）雖然有摩通、瑞信升目標價，但係都挽回唔到粉
絲嘅信心，回吐番噚日升幅，碌低逾５巴仙係最差大隻佬。而同大市關係最密切嘅生發發
（００３８８）就再一度失守３００大關，不過尾市發力收復失地，總算唔係跌好多，收低近２
巴仙報３００﹒２銀。仍然睇好後市缸友，不妨喺十天線（約２９２﹒３銀）附近上車。
友邦（０１２９９）、中石油（００８５７）同埋利豐（００４９４）就齊齊畀安本資產沽
貨，前兩者就跣低約３巴仙，利豐已經係「黃台之瓜何堪摘」，就係咁易跌近１巴仙收市。
＊賭股繼續弱利豐黃台瓜，主席定心丸中電信照撻＊
仲有一路都發唔到圍嘅賭股，有券商估計今個月博彩收入會減少近四成，真係沒有最低，只
有更低…金沙（０１９２８）帶頭碌低逾逾３巴仙收３０﹒５銀，銀娛（０００２７）旗下二期
隆重開幕，孖屐都一致睇好，但都跟市唔見逾３巴仙收３７﹒１５銀。
個市大插，中資電訊股無咩壞消息之下，跌得亦傷；當中中電信（００７２８）今日舉行股
東會，「揸ＦＩＴ人」王曉初就好有信心話要令股價跑贏恆指！只可惜事與願違，埋單收低４巴
仙報５﹒２４銀，一支大陰燭仲跌向百天線（５﹒０６銀）添，街坊聯通（００７６２）都無咗
逾３巴仙。反而大佬中移動（００９４１）抗跌力比較勁，只係跌咗２巴仙收１０３﹒３銀，大
跌市嚟講，已算有個交代喇！
＊金海遇伯樂復牌曾勁升，帝盛被私有開心跳隻舞＊
唔好以為魚缸大地震，炒友就會怕怕，細價股繼續炒到熱烘烘。中國金海（００１３９）折
讓逾七成配股，引入湖北藍鼎（深：０００９７１）主席做大股東，淨籌近１０億銀。結果強勢
復賽，今朝最高爆升７６巴仙至１﹒６９銀。只係市況急劇轉差，難免影響升勢，但都有２９巴
仙落袋收１﹒２４銀。
另一隻帝盛酒店（０２２６６）擬畀遠東發展（０００３５）以溢價逾三成提私有化，兩股
復賽後，前者急升最多２６巴仙至１﹒７１銀，收市仍升１６％；而後者破頂見３﹒９７銀後就
腳軟，倒跌逾３巴仙報３﹒７１銀。遠東集團下個月２６號就會喺中環重開荔園，依家重組架構
，將來一定有好多發展大計，值得留意。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
【你點睇】本港主要銀行跟隨美聯儲減息，你對樓市前景有否信心？► 立即投票
