《小傳日記》終於到咗星Ａ５０期指同香江期指結算大戰日。未開場前，花旗國噚晚
（３０日）宣布息魔未夠鐘上場，一如孖屐預期。道指衝高１２１點慶祝，收報１７７５１。只
可惜，Ａ場都仲係無定向咁走上走落，但次次反彈啲啲就無功而回，仲曾經低見３６８５點，最
後更以接近全日低位散場，跌逾２巴仙收報３７０５。
Ａ場無晒精神，香江無奈跟隨調頭，再加埋星Ａ５０期指喺Ａ場收市之後，７月合約愈跌愈
深，都嚇窒咗香江缸友。結果恆指上半場明明踢高最多２５０幾點，最終淡友反敗為勝，好友高
舉白旗。恆指埋單倒跌１２１點報２４４９７，國指就挫１３６點報１１１３７，成交約有
８０２億銀。
＊花旗開香檳Ａ仔卻頭痕，香江失方向先升後消沉＊
花旗國聯儲局噚晚議完息，維持息率不變，符合市場預期，仲話等通脹２巴仙可能先加息。
結果一班本地地主見息魔未到都慶祝一下。新地（０００１６）圍內最叻，同新世界發展
（０００１７）亦差唔多，踢高唔夠１巴仙，分別報１２０﹒１銀同９﹒１８銀；長實地產
（０１１１３）就腳軟唔夠１巴仙，報６４﹒５銀。
恆大地產（０３３３３）噚日回購咗１﹒３億股左右，用咗接近６﹒８億，真係豪爽，但結
果今日唔見４巴仙，報５﹒２１銀。另一邊廂，阿仔恆大健康（００７０８）就大升近一成，報
９﹒１５銀。
＊恆大搞回購粉絲卻質低，壽仔發盈喜無奈價閉翳＊
內險股今日腳軟軟，國壽（０２６２８）噚晚發盈喜，受惠投資收益大增同埋業務發展，估
計半年多賺七成，但瑞信話比佢預期少半成，又指出目前估值係同行最高，維持「中性」評級，
「他屐」４０蚊。加上Ａ仔無咩力，結果今日國壽跌近３巴仙，報２８﹒９銀，係最渣表現藍戰
士。另一位藍戰士平保（０２３１８）今日亦碌低近２巴仙，報４４﹒７５銀。
賭仔今日亦唔多掂，永利（０１１２８）次季少賺超過六成，賺約７３６０萬美金，瑞銀話
業績唔理想，畀佢「他屐」１６蚊，結果今日唔見近１巴仙。藍戰士金沙（０１９２８）同埋銀
娛（０００２７）分別唔見唔夠１巴仙同１巴仙多啲。
＊瑞銀來踐踏永利凍一凍，摩通吹吹風點中更輕鬆＊
基金業協會數據話，到６月底，９１間證券公司資管業務規模多達１０萬億人仔。其中，中
信証券（０６０３０）獨佔萬幾億人仔，領先同行成條街。業務咁勁，可惜股價唔生性，早段彈
出，尾市碌返去２０﹒９５銀。反而，廣發証券（０１７７６）好落力，衝前約２巴仙收報
１５﹒１銀。中國銀河（０６８８１）都不甘後人，企高２巴仙報７﹒１４銀。
摩通就吹風，中小型股調整完，相信有Ｄ基調唔錯嘅都已經回落到合理水平，睇好威勝
（０３３９３）、創科實業（００６６９）同申洲國際（０２３１３）咁話。威勝即刻彈起近７
巴仙，另外兩隻就抽高近３巴仙，分別報１０﹒６４、２８﹒５同４０﹒９５銀。
＊華夏與萬德升勢認真誇，７０７異動價漲成交激＊
魚缸反反覆覆，個別毫子股炒起。華夏能源（０８００９）飛起４３巴仙，一支大陽燭升破
５０天同１００天線，報０﹒２３銀，差唔多收復返七月唔見咗嘅失地，更加做埋今日大贏家，
成交飆到近三千萬。
緊隨其後嘅萬德移動（０８１６３）公布截至６月３０日成績表，虧損少咗，去到１３１４
萬，而股價就差個馬鼻做老二，踢高逾３６巴仙，埋單０﹒１８８銀。
協盛協豐（００７０７）成交量就驚人，高達逾２億銀，仲有近１５巴仙進帳，曾經高見
０﹒７４銀，創５年半新高。正峰集團（０２３８９）就改名做北控醫療，新名夠哂旺，全日抽
高近一成。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
樂本健【秋日開倉26 - 27/9】保健品低至$20！► 火速行動
