《小傳日記》踏入８月份，香江魚缸就受到當頭打擊；就係祖國官方同財新７月製造業
ＰＭＩ都唔掂。阿爺個數就跌到去５０巴仙，創５個月低位；財新嗰邊就仲差，得番４７﹒８，
驚見兩年低位添。祖國經濟咁差，Ａ場都無晒心機，埋單唔見逾１巴仙收３６２２。
一班「中」字輩股份都捱沽，國壽（０２６２８）同平保（０２３１８）唔見約３巴仙，祖
國石油（００８５７）、祖國移動（００９４１）都碌低２至３巴仙。而希臘魚缸停咗賽五個星
期終於復市，一開場就止唔到瀉，曾經插水逾兩成幾，搞到香江尾市跌多咗，散場挫２２４點收
２４４１１，國貨就跣低１２１點收１１００９，全日成交７９５億銀左右。
＊ＰＭＩ曳曳中字現跌勢，大象跳隻舞寶哥哥閉翳＊
大笨象（００００５）今日中午放榜，股東自然大為緊張，好彩成績都叫做有交代。中期列
帳稅前盈利約１３６億美金升約一成，好過孖屐預期。普通股應佔溢利就微跌至９６億美金，派
息１０美仙。難怪放榜後大笨象即刻逆市跳高近２巴仙，報７１﹒０５銀，為表現最佳藍戰士。
至於「囝囝」恆生（０００１１）中期多賺１﹒４倍至２００億銀左右，但唔計賣興業銀行
就只係升１１巴仙至９４億銀，息１﹒１銀。跟隨阿媽逆市升唔夠１巴仙，報１５９﹒６銀。
本地土炮錢莊東亞（０００２３）成績表唔算好，中期少賺約６巴仙至近３４億銀，派息
３８仙，較上年少；今日碌低約２巴仙，報３０﹒７銀。
＊強人來入股馬斯葛飛升，ＱＱ微微跌恆大卻捱沽＊
馬斯葛（００１３６）配股引入恆大地產（０３３３３）同ＱＱ（００７００）。完成後，
恆大地產佔馬斯葛擴大後約５５巴仙股本，ＱＱ就佔擴大後約２０巴仙，配股價０﹒６１仙較停
賽前收市價０﹒２８５銀有成９８巴仙折讓，折讓幅度都咪話唔得人驚！
不過，話晒新主人背景咁勁，馬斯葛復賽後試過彈高成１﹒５倍咁多，埋單計都有近７２巴
仙進帳，收報０﹒４９銀，認真開心！ＱＱ就無咗唔夠１巴仙，恆大地產仲慘，蒸發逾６巴仙。
恆大地產「囝囝」恆大健康（００７０８）連升１２日袋咗近七成升幅後，今日試過嘔番逾
１２巴仙出嚟，但尾市力挽狂欄，倒升２巴仙，收報１０﹒１４銀。勁！
＊濠賭有數據先來回回氣，高佬叫沽售牛牛難歡喜＊
馬交公布７月份賭收１８６﹒１億澳門元，按月回升７﹒２巴仙，但按年仍然大跌３４﹒５
巴仙；而今年１至７月博彩毛收入累計１４０３億澳門元，按年跌３６﹒７巴仙。即使符合市場
預期，但賭股７月已累積一輪升幅，今日手軟腳軟。銀娛（０００２７）冇咗近３巴仙，報
３４﹒７銀；金沙（０１９２８）企唔穩報３３﹒９銀，蒸發逾１巴仙；永利澳門
（０１１２８）更加插足近５巴仙。
高盛吹風唱淡蒙牛（０２３１９），投資評級由「中性」降到「沽售」，目標價削咗三成，
得返３０﹒１銀。蒙牛邊度頂得住，試過直插近１３巴仙，低見３０﹒６，收報３３﹒５５銀，
唔見４％，成為表現最差嘅藍戰士。
＊資源好頭痕跣低難避免，券商股齊挫心驚膽又顫＊
香港資源（０２８８２）重組捲入行賄案，徐子淇父親同黃英豪畀廉署起訴。集團指與公司
事務無關，而黃英豪就辭任主席、執董，交棒畀配偶黃周莉菁。香港資源全日捱沽，碌到去
０﹒１４４銀，跣低咗１４巴仙。可憐同佢合營珠寶店金至尊嘅六福（００５９０），股價受拖
累，唔見咗超過４巴仙，報２０﹒８５銀。
中證監話，一Ｄ帳戶有異常交易行為同程序化交易風險，嚴重影響市場穩定，會進一步加強
監管力度。券商股差唔多全線陣亡，光大控股（００１６５）挫近６巴仙收１７﹒７４銀，中州
證券（０１３７５）都插低６巴仙。中信証券（０６０３０）（滬：６０００３０）否認聯手對
沖基金做空Ａ股，都唔見３巴仙得返２０﹒６５銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
