《小傳日記》自從上個月初Ａ場發生「股災」之後，香江缸友明顯猶有餘悸，就算見到Ａ場
有Ｄ力反彈，香江呢邊都唔會太興奮。好似今日（４日）Ａ場狀態大勇，阿爺多方面限制沽空之
後，即以全日最高位收市，抽升３﹒７巴仙收３７５６點。
但係，香江竟然升唔起，就算大象（００００５）噚日送上驚喜業績，今日都要碌番落去
７０銀樓下，ＱＱ（００７００）都腳軟企唔穩。悶市無方向，全日成交得番近７４７億銀，魚
缸全日波幅亦只得３００點左右，埋單微跌５點收２４４０６，國指喺國壽（０２６２８）、平
保（０２３１８）支撐下，收漲６４點報１１０７４跑贏大市。
＊ＱＱ顯疲態大象同失態，產品無問題師傅仍趴低＊
魚缸反覆，部分藍戰士都見到疲態。重磅ＱＱ下星期三（１２日）放榜，雖然巴克萊預計第
二季收入有１６巴仙增長，仲上望目標價２０２銀，不過缸友似乎唔係太敢入貨，搞到ＱＱ收跌
近１巴仙報１４３銀。大笨象都無法延續強勢，一開賽已唔多掂，雖然臨尾跌少咗，不過都要碌
低近２巴仙，報６９﹒９５銀。
輩份細好多嘅康師傅（００３２２）雖然澄清自己嘅產品無涉及問題油。不過傳出問題油消
息後，消費者對公司信心難免有損，今日仍要趴低３巴仙，報１４﹒４２銀。
以前曾受「毒奶」困擾嘅蒙牛（０２３１９），噚日畀高盛唱淡下插近１３巴仙後，今日仲
未止跌，繼續碌低逾４巴仙，收報３２﹒１５銀，連續兩日成為表現最差藍籌股，陰功豬囉！
＊潤電向前衝藍戰最威風，博耳被狙擊急急腳澄清＊
講完表現差嘅藍戰士，梗係要表揚吓最威水嗰班啦。潤電（００８３６）呢幾日已經唔聲唔
聲咁收復番部分失地，今日獲德銀維持ｂｕｙ入評級，埋單抽升近５巴仙收２１﹒１５銀，一口
氣衝破埋１００天及５０天線，榮登最威風藍戰士。壽仔（０２６２８）以逾３巴仙升幅緊隨其
後，收２８﹒５５銀。
另一邊廂，民企股博耳電力（０１６８５）就無咁好彩，上半場突然被洗倉，急瀉最多逾
２４巴仙報１０﹒８銀。公司即刻開分析員電話會議，反駁祖國傳媒話公司誇大帳目嘅報道係不
實，重申財政健康，將來會繼續增加人手。派完定心丸，粉絲先無咁驚，最後只係跌約７巴仙收
１３﹒２８銀，總算執番身彩。
＊油價被打殘油股卻硬淨，鐵鳥掩嘴笑高飛上雲霄＊
油價噚晚再度急挫，加埋估計國內成品油價每噸今晚零晨後會下調１９０銀人仔左右。面對
咁多不利因素，油股今日表面唔係跌好多，實情係已經跌得太多，「三桶油」中以中石油
（００８５７）表現最差，無咗逾１巴仙，報７﹒３６銀，創年半新低。中海油（００８８３）
同中石化（００３８６）就齊齊碌低唔夠１巴仙。
呢邊班鐵鳥見住油價下挫就掩住半邊嘴偷笑，但似乎笑得有啲大聲，搞到喺人都知添！國航
（００７５３）反覆飛上９巴仙，報８﹒４７銀。東航（００６７０）同南航（０１０５５）都
跟住尾飛高５巴仙至８巴仙。國泰（００２９３）都有約１巴仙進帳，收報１８﹒４６銀。班鐵
鳥咁開心，其他參賽者見到唔羡慕都難呀！
＊高銀孖寶醒齊齊孖住升，靄華今除權整日升不倦＊
魚缸原是變幻無常，由高位跌落深淵嘅高銀孖寶今日都見到少少起息。其中，高銀地產
（００２８３）上星期五獲主席潘蘇通用咗近２２萬銀增持，股價今日踢高近一成，報６﹒７４
銀。高銀金融（００５３０）表現更出色，有近兩成落袋。
金海（００１３９）就唔執輸，今日跳高２３巴仙，報１﹒１２銀，接連奪回十天線（約
０﹒９６５銀）及五十天線（約１﹒０２４銀），成交仲有超過４億銀咁多。
但講到最好打，就非「二叔公」靄華押業信貸（０１３１９）莫屬，今日末期息及紅股除權
，跳高成３８巴仙咁多，收報０﹒８４銀，創埋上市新高兼係升幅最大股份。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
樂本健【秋日開倉26 - 27/9】保健品低至$20！► 火速行動
