《小傳日記》中美香江齊反彈，最怕彈完又再散！

　　《小傳日記》花旗聯儲官員噚晚（２６日）一番明示暗示，市場立即聯想到息魔遲Ｄ先嚟，
道指成功大反擊抽高６１９點，收市報１６２８５，結束六連跌，兼且係四年來最大單日漲幅。
樂觀氣氛仲感染埋中港魚缸，Ａ場今日（２７日）愈升愈有力，收漲逾５巴仙報３０８３，成功
收復三千關。
　　香江當然唔執輸，今早高開近７００點，浮浮沉沉咗一陣就跟住Ａ場再往上衝，曾經升近
９００點見２１９６３，埋單都有７５８點落袋報２１８３８，係個半月來最大升幅；國指亦反
擊４３５點報９８６３。
　　大反彈嘅一日，成交有１２２４億銀左右。一班ＥＴＦ、內險股閒閒地都有超過一成升幅，
認真不得了！
　　今天好開心，但唔好唔記得，聽日（２８日）係期指結算日。睇番公仔圖，暫時香江仲未收
復星期一（２４日）嘅下跌裂口。小心今日大反彈，明日掉頭散！

＊Ａ仔越三千香江衝番轉，明天結算日大戶怎盤算＊

　　講到今日最威水，非沉寂一排嘅中海油（００８８３）莫屬，雖然半年少賺５６巴仙至
１４７億銀人仔，但仍好過預期；多間大行都齊聲讚頌，股價抽高逾１４巴仙，報９﹒２２銀，
輕鬆奪得最佳藍籌。街坊中石化（００３８６）半年就少賺２２巴仙至２５４億人仔，股價都有
近２巴仙進帳。中石油（００８５７）嚟緊都會放榜，今日就踢高約４巴仙，收報６﹒５５銀。
　　今日接近舉世歡騰，蒙牛（０２３１９）半年多賺近２８巴仙至逾１３億銀，好過「孖屐」
預期，不過股價要碌低３巴仙，收報２８﹒９銀，為今日唯一一位「舉白旗」嘅藍戰士。街坊輝
山乳業（０６８６３）續有「頂呱呱」嘅表現，跳高逾４巴仙，收報２﹒８４銀，續創逾年半新
高。

＊業績勝預期中海油靚爆，同樣勝預期牛牛卻被質＊

　　魚缸急反彈，中資金融股就威盡全場。神州錢莊排住隊攞成績，農行（０１２８８）、工行
（０１３９８）同交行（０３３２８）今日就會知結果，個個偷步衝前１至３巴仙，收報
３﹒１７、４﹒７１同５﹒９２銀。聽日（２８日）放榜嘅中行（０３９８８）、民行
（０１９８８）同建行（００９３９）都先聲奪人，有約３至４巴仙進帳，其中光大銀行
（０６８１８）踢高６巴仙報３﹒５３銀，盛京銀行（０２０６６）收市前突然爆升近１７巴仙
收９﹒４５銀添！
　　內險股升得仲誇張，國壽（０２６２８）中期賺多咗超過七成，有成３１５億人仔，Ａ股玩
漲停，Ｈ股亦企高逾１０巴仙，報２７﹒１銀。中國太平（００９６６）又唔執輸，飛起逾１１
巴仙，收２１﹒２５銀。中國太保（０２６０１）同新華保險（０１３３６）一樣勁，彈高近８
及１０巴仙。

＊壽仔五星星大漲逾一成，信達買南商逆市頭擰擰＊

　　另一邊廂，中國信達（０１３５９）今日派成績前就頭耷耷，仲一度創新低，收市就瞓低咗
近２巴仙報２﹒８４銀。雖然公司係唯一一間入標想買中銀香港（０２３８８）旗下嘅南洋商業
銀行，不過市傳殺出「程咬金」，話上海陸家嘴集團都加入戰團。至於中銀香港，收高逾３巴仙
，報２６﹒６５銀。
　　香江跟住花旗國魚缸反彈，一眾藍戰士朝早都好英勇，ＱＱ（００７００）同友邦
（０１２９９）曾經跳起３至５巴仙；但到午市魚缸升幅收窄，又齊齊碌低１巴仙，好彩最終大
市尾段生性飆上，兩位大股都行返前近３及１巴仙，埋單見１３２﹒２同４２﹒５銀。
　　大市生猛番，最高興莫如生發發啦，收市升逾４％。另外，花旗有望延後加息，地主佬都有
好表現，四叔（０００１２）漲近６％添。

＊四叔好靚仔賭仔亦唔曳，阿爺來錫錫基建有氣勢＊

　　馬交７月入境旅客達到約２６５萬人次，按月回升１８巴仙。噚日捱打嘅賭仔今日都重新振
作，銀娛（０００２７）同金沙（０１９２８）分別彈高逾７巴仙及近６巴仙，收報２６﹒０５
銀及２８銀。同行美高梅（０２２８２）、新濠國際（００２００）同澳博（００８８０）分別
都有６巴仙至７巴仙嘅進帳，做到人人有份，永不落空。
　　阿爺噚日又開會，提出加快棚改、鐵路等工程建設。中國中車（０１７６６）仲獲高盛指係
潛在受惠財政政策刺激嘅股份，股價當堂愈升愈有，最尾有１６巴仙收穫，報９﹒６８銀。中鐵
建（０１１８６）都有成近１３巴仙進帳。中鐵（００３９０）同中交建（０１８００）就分別
升１０巴仙同８巴仙，勁。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。