《小傳日記》缸內世界已經再回復平靜，大家都等緊花旗國１２月加息，各地缸友都抱住觀
望態度，睇定Ｄ先再衝。上星期五晚（２０日）道指就升９１點收報１７８２３，歐洲股市都企
穩。
至於Ａ場方面，習大大話要重點將機械人納入創新領域，產值有望突破千億，不過講緊係十
年後嘅事，對Ａ場起唔到即時刺激作用，結果收市微跌０﹒６巴仙收３６１０，仲一度穿過三千
六關添。香江就繼續喺廿天線（約２２６３１）度浮浮沉沉，收報２２６６５跌８８點，國指碌
低７２點收１０２２９。全日成交得番６２３億，一字記之曰：悶！
＊中石油思動乍見春江鴨，阿爺來錫錫迪迪卻下插＊
中石油（００８５７）就有風傳出話將會出售管道等資產，以提升公司今年嘅利潤，資產包
括管道同煉油業務，有關交易預料最快喺今個星期公布。如果成功出售，咁將會係中石油由
２０１３年出售管道股權後，第一次重大嘅資產剝離。唔知係咪同消息有關，公司今日都錄得一
手逾１億銀嘅交叉盤，股價就踢起唔夠１巴仙，報５﹒６５銀。
大笨象（００００５）都有風話公司打算新請最少一名非執董，作為范智廉繼任人。股價今
日碌低唔夠１巴仙，報６２﹒６銀。
阿爺發布２４條措施，當中惠及新能源汽車，不過盛傳比亞迪（０１２１１）喺香江４８架
電動的士就得返９架，市場好似唔多睇好公司嘅產品，股價就跣低３巴仙，報４５﹒７銀。獲大
和唱好嘅吉利（００１７５）就踢起逾２巴仙，報４﹒３銀。
＊數據微微降濠賭甚驚慌，手遊飆上來博雅在領放＊
馬交１０月份入境自由行數目同比減少咗０﹒６個巴仙，但魚缸好似好震驚咁，即刻質低啲
賭股。上個月馬交入境旅客人數一共大約２６４萬人次，當中神州旅客同比減少０﹒４個巴仙，
香江旅客都少咗０﹒７巴仙。銀娛（０００２７）今日質低４巴仙，見２３﹒１銀，成為跌幅最
勁嘅藍戰士。金沙（０１９２８）就唔見逾３巴仙，報２６﹒２５銀。
手遊股上星期五（２０日）都已經飆咗上嚟，今個星期三（２５日）就放成績嘅博雅
（００４３４）都踢起６巴仙，報３﹒７９銀。上星期破過百天線嘅ＩＧＧ（００７９９），今
日就回返逾１巴仙，報３﹒６２銀。聯眾（０６８９９）就飛起７巴仙，報５﹒４７銀。
＊君安好頭痕碌低愈一成，恆大多瓣數炒起確精靈＊
國泰君安（０１７８８）主席閻峰失聯，群龍無首下研究團隊仲要內訌，結果跌低１２巴仙
，收報２﹒８５銀。
恆大（０３３３３）好威，獲准收購中新大東方人壽五成股權，代價３９億人仔多啲，仲打
算將間保險公司改名做「恆大人壽保險」，恆大愈搞愈多瓣，粉絲畀個Ｌｉｋｅ，踢高半成，收
報６﹒７９銀。阿仔恆大健康（００７０８）亦跟升，有６巴仙進帳。
三生製藥（０１５３０）打算進一步收購中信國健藥業股權，要成１３﹒６億人仔，單刁完
成後公司將會揸住超過一半股權，股價因此踢高近２巴仙。
＊否認賣物業爪哇仍續漲，炒股不炒市買中多歡暢＊
早前澄清否認賣大新金融中心嘅爪哇（００２５１），今日繼續大升特升，埋單急升２５巴
仙，仲創埋新高１１﹒７４銀以全日最高位收市，已經連升三日累升４１巴仙，勁！
先豐（００５００）同首華財經（０８１２３）分別踢高２６巴仙同近１９巴仙，收報
２﹒１５銀同０﹒２７銀，先豐仲係今日表現最叻個股！仲有粵豐環保（０１３８１）一朝早錄
得逾千萬股大手成交，今日埋單都大反彈１５巴仙！
中國置業（００７３６）打算以１３０８萬銀收購權富證券，當中７８０萬係溢價，結果今
日抽升近１２巴仙。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
