《小傳日記》花旗魚缸感恩節假期前靜靜渡過，而歐洲魚缸似乎已經消化晒地緣政局不穩問
題，噚晚（２５日）英法德三大指數都抽高１至２巴仙，缸友Ｄ信心都返番來。本來外圍氣氛好
番，香江都叨光衝番高二百幾點，直逼２２８００點，點知午後好友急急腳撤退，趁聽日期指結
算日前沽貨離場。
結果，香江收市就嘔凸出嚟，恆指收挫９點報２２４８８，廿天線（２２５６４）再一次雙
手奉還，國貨就跟隨跣低１９點收１０１０８。魚缸咁悶局，成交又再縮一縮，只得近６１４億
銀。
睇嚟要等下個月初，中美公布連串經濟數據，魚缸先有望走出悶局！
＊早市好氣勢午後卻閉翳，媽咪來錫錫昆侖超靚仔＊
雖然噚晚油價無咩大波動，但昆侖能源（００１３５）大力踢高３巴仙，收６﹒９４銀，係
今日表現最佳藍戰士！事關阿媽中石油（００８５７）打算向佢注入昆侖燃氣資產，阿仔話收購
可以避免同阿媽爭，增強業務協同性。
中石油另外亦打算整合天然氣管道業務，諗住出售中亞管道公司嘅一半股權畀曼松控股，單
刁大約值１５０億至１５５億人仔！另打算轉讓新疆等６座天然氣儲氣庫淨低嘅天然氣儲量資產
，大概值３５億人仔，勁多錢袋，但花旗指出售資產唔會為股東增值，維持「沽貨」評級，「他
屐」５﹒４銀。結果中石油今日收唔夠半個巴仙，報５﹒７５銀。
＊高佬來踐踏招商急插水，開心畀個讚中外運真帥＊
祖國錢莊表現都唔錯，工行（０１３９８）同農行（０１２８８）升高唔夠半巴仙至１巴仙
左右，但招行（０３９６８）就慘，畀高盛睇淡，評級由「掃貨」降到去「沽貨」，結果今日唔
見近半成，收報１８﹒７６銀。
另外，高盛同埋花旗都畀中外運（００５９８）「掃貨」評級，高盛畀「他屐」６﹒３銀，
花旗就降佢「他屐」去到６﹒６８銀。結果中外運踢高６巴仙，收報４﹒７９銀。
中交建（０１８００）就畀花旗削「他屐」去到８﹒８銀，評級降到去「沽貨」，話佢無簽
到海外鐵路項目，又可能分拆唔到疏浚業務。今日踢低近半成，收報９﹒２５銀。
比亞迪（０１２１１）亦同一命運畀大行唱淡，大摩話佢新能源車擴張計劃受津貼減少等問
題而放慢速度，所以要降佢「他屐」去到４５蚊，今日就咁就碌低６巴仙。
＊大行踩迪迪碌低軟無力，細價股落鑊有食趁熱食＊
香江今日好多細股都落鑊，龍傑智能卡（０２０８６）今日飛升３３巴仙，報１﹒４１銀，
成交達到１５２８萬銀，成為升幅王。相反，榮登跌幅榜榜首嘅係首都創投（０２３２４），今
日逾１億銀大成交急挫，無咗２６巴仙，報０﹒３５銀，差不多一口氣回吐番呢個月嘅升幅，慘
。
數字王國（００５４７）又係無咩消息刺激，但成交都好勁，一度打入５０大成交榜，若以
番幅計，就排喺第６位，埋單收報０﹒５５銀，踢起１８巴仙，企穩喺十天線（０﹒４６３銀）
之上。
恆大健康（００７０８）噚日（２５日）回吐完後股價又破頂，今日再踢起１３巴仙，報
２﹒５３銀，最高見２﹒５５銀，恭喜晒缸友呀！
＊龍光搞批盪粉絲即掟貨，銀基業績靚彈起笑呵呵＊
龍光（０３３８０）以先舊後新方式，折讓逾１３巴仙配售最多５﹒５８億股，淨籌
１５﹒４億嚟發展。結果跳水式直插１４巴仙，得返２﹒７６銀。
今日再有一班股仔攞成績。其中，中燃（００３８４）半年純利１３﹒０４億，少咗足足
２２巴仙。花旗覺得唔錯、總算符合預期，繼續叫買入。巴克萊就認為，天然氣價跌將帶動銷量
復甦，佢每股盈利嘅增長會好過哂啲街坊，封為首選，但削目標９巴仙。中燃曾經跣低近半成，
之後跌得冇咁痛，但都唔見咗２巴仙，報１１﹒６２銀。
銀基（００８８６）啱啱相反，不知幾叻仔，中期賺多１﹒４倍，自然大受歡迎，彈起逾一
成，收１﹒２９銀。
新丁福萊特（０６８６５）第一次上戰場就即刻「潛水」，游極都上唔返招股價２﹒１銀，
仲試過沖落去１﹒８６銀，埋單１﹒９４銀，比招股價低近８巴仙，計落每手蝕１６０蚊，真係
「眼淚在心裡流」。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
