《小傳日記》香江魚缸正式收爐，捱咗大半年尋底之旅，終於可以同呢隻「傷心羊羊」
Ｓａｙ Ｇｏｏｄｂｙｅ，齊齊迎接充滿朝氣嘅「金猴皇」喇！
基本上，去到羊年最後一日交易日，Ｈｏｌｉｄａｙ Ｍｏｏｄ高漲，缸友仲邊有心機作戰
呀！是以全日成交靜到痺，成交得番５５４億銀。恆指表現點樣？繼續窄幅上落，全日高低波幅
只得１６７點，但總算穩穩陣陣開心完場，收升１０５點報１９２８８，國指揚８０點報
８０５４。
總結羊年表現，恆指足足蒸發５５４３點或２２﹒３巴仙；國指就更傷，暴瀉４０１１點或
３３﹒２巴仙。不過，睇番恆指公仔圖，十天線（１９２６４）同廿天線（１９３４５）就快可
以聚頭，相信放完五日假之後，就開始有明確Ｄ方向，希望下星期四（１１日）再同「金猴皇」
一齊向上衝吧！
＊歲晚等收爐成交繼續奀，傷心羊咩咩插逾五千點＊
大笨象（００００５）雖然傳出全球員工凍薪，但公司強調升職嘅照會加人工。不過，米字
國員工無論升唔升職都有人工加，相反香江就無咁好待遇，真係太大細超，太過分喇！不過，大
笨象今日仍有近１巴仙進帳，收報５２﹒３５銀。渣打（０２８８８）呢隻黃台之瓜，就踢高近
３巴仙，收報４９﹒６５銀。
東亞（０００２３）再遭對沖基金狙擊要求以每股６０銀賣盤。不過，「發炮」基金嘅理據
似乎有「根本性矛盾」，一邊讚公司規模同業務吸引，但又鼓勵股東喺市況差嗰陣出售。話說早
前東亞第二大股東Ｃａｉｘａ Ｂａｎｋ剔除支持李家協議，今次狙擊戰或者會埋身肉搏。東亞
股價今日再踢高近６巴仙，收報２３銀。
大新金融（００４４０）旗下壽險業務傳獲多間公司有意收購，包括友邦（０１２９９）等
大行，摩通出報告話，出售可以釋放其壽險業務價值。大新金融再掟高近１２巴仙，收報
４２﹒４５銀，大新銀行（０２３５６）都有近６巴仙落袋。
＊大象大細超渣打似否極，東亞與大新升升復升升＊
恆發洋參（００９１１）主席急急腳售股套現；今次雖然先賣逾６巴仙股權，但講明仲傾緊
賣多啲股份，缸友就估佢可能連控制權都賣埋添！憧憬賣盤下，恆發洋參復牌反彈咗逾一倍，收
報０﹒０６９銀，最高更見０﹒１１８銀。
大中華（００１４１）控股權同樣易手，除咗提出以每股３﹒９９８元要約外，仲會派合共
約３﹒４４銀息。咁好消息，大中華一開賽已經飆高，收市就進帳近２３巴仙，收報６﹒９７銀
。
臨近放假，唔少魚仔都臨尾博一博！科瑞（０８１０９）同北亞（０００６１）午後曾一度
踢高１﹒４倍同１﹒２５倍，不過都係過眼雲煙，最尾都係踢高近一成巴仙及逾２２巴仙。華富
國際（００９５２）相對走勢就無咁驚險，但全日計更斬獲近３２巴仙。
＊大中華易主復牌急急漲，科瑞與北亞走勢過山車＊
北京控股（００３９２）以超過１２５億銀收購「啤酒國」廢物能源公司，但孖屐唔係幾睇
好，賓架花旗直指收購代價太貴，同時質疑公司收購嘅效益有幾多，將目標價劈到５０銀。結果
搞到股價唔見近８巴仙，報３５﹒１５銀，慘。
有風話爪哇（００２５１）旗下灣仔嘅大新金融中心，被財團用大約一百億銀買起，出售協
議初步達成。買家係邊個？孖屐都認為中資嘅光大集團最有機！如果落實，呢單「刁」就會成為
香江商廈次高成交嘅典例。難怪股價由頭升到落尾，收市前仲突然宣布停賽，停牌前抽升１８巴
仙報１８﹒４８銀，唔通單「刁」已經傾掂數？！
金價連續第二日飛起，觸及三個月高位，全世界經濟放慢同金融市場波動之下，投資者懷疑
聯儲局係咪可以喺今年加息，令到美金續跌。呢排金仔表現都幾唔錯，紫金（０２８９９）、招
金（０１８１８）分別飛起逾６巴仙同近１０巴仙，各自報１﹒９７銀、４﹒６２銀收爐。
＊瓜哇創新高賣樓傾掂數？內險齊反彈金股畀個讚＊
長和（００００１）為咗同米字國Ｏ２合併，可以作出幾大讓步？噚日（４日）長和聯席董
事總經理霍建寧先「賣大包」，承諾５年內唔加價，兼投資５０億英鎊發展。噢！如果香江嘅３
都有咁嘅承諾就好囉！不過，孖屐就有風話，原來歐盟已經發出反對聲明，表示對單「刁」有擔
憂。隨時慘食檸檬，難怪長和今日逆市無咗近２巴仙，報９５﹒１５銀。
九倉（００００４）拍住綠城（０３９００）仲有中交集團一齊發展北京住宅項目，股價同
綠城一齊踢起近５巴仙同近２巴仙，過年前收３７﹒３銀同６銀收市。
全國社保基金條例草案通過，太保（０２６０１）、平保（０２３１８）、國壽
（０２６２８）三者分別有近２巴仙至逾４巴仙落袋。
好快就到猴年啦！小傳順祝大家投資場上得心應手，萬事如意，新年進步，身體健康！請請
！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
