《小傳日記》東瀛國噚日（２８日）出乎意料無加大放水規模，避險資金日圓當堂升到嘭嘭
聲。消息先打殘東瀛魚缸，後令到恆指３００點升幅盡銷，繼而震散埋花旗魚缸；道指噚晚急挫
２１０點收１７８３０，係兩個月來最大單日跌幅。
外圍氣氛咁差，香江今朝（２９日）開市都唔好得去邊，一開場就唔見１７２點報
２１２１５，加上祖國錢莊同石化雙雄業績都唔對辦，恆指沽壓愈來愈勁，一度急插３６４點至
２１０２３，差ＤＤ就失守二萬一關。好彩埋單仲叫守得住，報２１０６７挫３２０點；國指就
碌低１２１點報８９３９。成交６０７億銀。
總結成個４月份，恆指其實都曾經最多累升８７７點，埋單袋２９０點。雖然呢幾日跌番Ｄ
，都唔可以話響起回調訊號。不過，放完長周末下星期二（３日）返來，就要迎接傳統「五窮月
」，究竟今次可唔可以打破傳統，就要睇實阿爺經濟數據喇！
＊四月漲三百港股仍有勢？中石油被掟皆因成績曳＊
中石油（００８５７）首季盈轉虧，勁蝕１３７﹒８５億人仔，係上市以來最差。即使富瑞
幫口，話今年可能賣管道資產派息，油價唔太差就仲有利可圖，繼續叫買入；佢依然仆低近４巴
仙，報５﹒７１銀。中石化（００３８６）表現好得多，純利大升２０７巴仙至６６﹒６億人仔
，卻畀街坊拖累，腳軟逾１巴仙，報５﹒５３銀。
招行（０３９６８）首季賺１８３﹒５億人幣多６﹒６巴仙；大和讚成績唔錯贏哂班錢莊同
業；瑞信更上調「他屐」至１５﹒６銀。招行最終衝前逾２巴仙，報１７﹒０６銀。工行
（０１３９８）純利就只微升０﹒６巴仙，差人成條街自然冇運行，碌低逾１巴仙，埋單
４﹒２１銀。
＊大行捧招行粉絲即埋鑊，百記停一停小傳嫂失落＊
大笨象（００００５）放完假（５月３日）就會派成績表，但放假前隨市走低，軟近１巴仙
，收報５１﹒８銀。囝囝恆生（０００１１）就唔見逾２巴仙，報１４１銀。其他街坊都唔好得
去邊，東亞（０００２３）跣低逾２巴仙。
早排傳完超人一號（００００１）收購Ｏ２單「刁」受阻之後；又傳收購意大利電訊公司亦
受阻，話呢單刁亦可能遭歐盟否決。今日，就連小傳嫂日日都要行一轉嘅百佳都出電腦系統問題
，一度要全線暫停營業。今日一號股價唔見逾１巴仙，報９３銀。
恆地（０００１２）主席李兆基上周五（２２日）增持７萬股，公司合作項目港島西區瑧璈
首輪銷售反應唔錯，但缸友好似唔多領情，股價偏偏向下３巴仙，埋單４８﹒５銀。
＊迪迪盤數靚逆市頗省鏡，金價有苗頭金股確係正＊
馬交３月跟團旅客得返５６﹒４萬人次，按年減少３６巴仙，係五年來低位。數據唔靚，金
沙（０１９２８）、永利（０１１２８）趴低逾１同２巴仙，報２７﹒８同１１﹒１銀。銀娛
（０００２７）畀大摩降目標，更瞓低近３巴仙，報２６﹒２銀。
米蘭站（０１１５０）主席姚君達折讓近１９巴仙，配售最少４１﹒３巴仙股權，今朝開賽
冇耐就錄得２﹒７億股大手，之後愈插愈深，全日足足瀉走近２７巴仙，得返０﹒９銀。
御泰中彩（００５５５）因為重組神州股權未獲批，賣彩票系統業務單刁要押後，隨時搞到
冇充裕資金贖返認沽債券導致違約，應聲跣低逾１４巴仙，報０﹒１３９銀。
＊跟團客急降濠賭甚閉翳，米蘭站御泰分別被質低＊
一大班重磅中資股陸續派成績表，大部分都唔係好好表現。不過，喺金礦股方面，紫金礦業
（０２８９９）將喺收市後放榜，除咗偷步炒業績收高近２巴仙報２﹒５７外，金價連升四日，
都為一班金仔打下強心針。街坊招金（０１８１８）、中國黃金國際（０２０９９）逆市中都有
４至５巴仙進帳！
比亞迪（０１２１１）都有好消息，首季多賺６倍至８﹒５億人仔。有咁好成績，迪迪仔梗
係叉足電衝前近２巴仙，收４５﹒７銀。其他傳統砵砵車就無晒癮，隨市向後褪，噚日獲瑞信唱
好嘅北汽（０１９５８）就突圍而出，踢高逾３巴仙收６﹒５４銀。
生發發（００３８８）早排炒「深港通」消息，升破２００銀關後，近日又靜番落嚟，今日
仲回番去十天線（約１９８﹒３５銀）樓下，收報１９６﹒３銀，睇嚟大市未轉強，生發發都要
整固番一排先得。假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】本港主要銀行跟隨美聯儲減息，你對樓市前景有否信心？► 立即投票
