《小傳日記》耶倫轉軚變鷹派，缸友六月勿鬆懈！

　　《小傳日記》缸友等到頸都長，花旗聯儲局主席耶倫終於肯放風，話如果經濟同就業市場持
續轉好，當局就會喺未來幾個月加息！可能缸友一早就預咗息魔再次降臨，今朝（３０日）香江
魚缸只係輕輕低開５３點，跟住好快站穩陣腳，仲曾經倒升最多１８８點報２０７６５添！
　　不過始終無實際好消息支持，加上Ａ場無方向收報２８２２，恆指下半場即刻縮番大半。但
好友都成功喺期指結算日，踢高５２點擊退淡友，收報２０６２９，國指揚２９點收８６２４。
成交依舊淡淨，約有５８５億銀。
　　過埋聽日，「五窮月」終於劃上句號。展望近日走勢，香江其實已逐步走出低谷，究竟好友
可唔可以喺６月擊退「六絕」，就要睇實下個月花旗議息、米字國「脫歐」公投同Ａ場闖摩等大
事件喇！
　　　　　　　　
＊或派特別息中銀高高高，一號有大手地主頗風騷＊

　　中銀香港（０２３８８）賣南商行畀祖國信達（０１３５９）嘅刁喺今日完成。中銀賺咗
３００億，兼且可能發特別股息，衝前２巴仙，報２３﹒７銀。
　　超人一號（００００１）晏晝放飯前錄得幾手共２８４萬股交叉盤，大嗱嗱涉及２﹒６億銀
，不過未能順勢而上，微微腳軟得返９０﹒３銀。
　　聯儲局主席耶倫再放風，話適合喺之後幾個月內加息。恆地（０００１２）、九倉
（００００４）依然企高１至２巴仙，報４６﹒４５同４１﹒９銀。而新地（０００１６）踢高
近２巴仙，收９０﹒９５銀，大摩話佢截至５月嘅銷售達２８０億，已經比２０１６財年目標多
，繼續叫「增持」。

＊瑞聲與舜宇你好我亦好，賭收快公布賭仔先偷步＊

　　瑞聲（０２０１８）之前獲高盛唱好，話好多間知名手機品牌下半年都推出新手機，金屬殼
預計會成為主流，估瑞聲到時可以受惠，升目標價至５１蚊，相當於預測市盈率９倍，今日股價
即刻踢高６巴仙，收報６２﹒６銀。街坊舜宇光學（０２３８２）亦一樣咁巴閉，有４巴仙進帳
，收報２６﹒６５銀，曾經高見２７﹒６銀破頂。
　　馬交５月賭收最快喺６月１日至３號就會有消息，賭仔紛紛偷步造好，金沙（０１９２８）
同銀娛（０００２７）兩位藍戰士分別彈高２巴仙同１巴仙，各報２９﹒５５銀同２６﹒１銀。
美高梅（０２２８２）仲叻，聽日末期息９﹒３仙除淨，今日升幅有４巴仙。

＊車仔齊踩油缸邊飆呀飆，潤電似否極街坊亦歡笑＊

　　長汽（０２３３３）之前喺電郵提到，將開拓南非市場，並授予子公司分銷權引入哈佛品牌
，駛前近４巴仙，報５﹒９１銀。東風（００４８９）更叻彈高逾４巴仙，報８﹒６２銀；瑞信
讚佢上半年盈利有驚喜、銷售增長加快，預測來季會反彈。砵砵車五菱（００３０５）都跳起逾
３巴仙。
　　潤電（００８３６）先前連跌５日累挫逾９巴仙，今日終於肯生性，反彈逾３巴仙，埋單
１１﹒９４銀，仲係最好打藍戰士。其他火電佬亦唔執輸，中國電力（０２３８０）、華電國際
（０１０７１）飛前５至６巴仙，埋單３﹒２１同４﹒０２銀。

＊嘉城終復牌急漲逾兩倍，奧普炒私有萬達腳軟軟＊

　　嘉域（００１８６）沉睡５年後今日終於甦醒，雖然曾經跌近１６巴仙，但缸友知道清盤被
永久終止就火箭式炒起佢近２﹒１倍，收報０﹒５５銀，位居升幅榜首位。
　　奧普（００４７７）獲溢價近兩成半提私有化，股價跳高兩成，收報２﹒６１銀。另邊廂，
理文手袋（０１４８８）就折讓兩成賣盤畀聯想控股（０３３９６）旗下弘毅投，前者腳軟４巴
仙，報１﹒４２銀；後者就升近３巴仙，埋單１８﹒３２銀。
　　萬達商業（０３６９９）私有化最終要約價係５２﹒８銀，唔會再提高，復牌後跌近２巴仙
，收報４９﹒２５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。