《小傳日記》花旗國噚晚（３０日）停賽一天，加上香江期指已完成結算，缸友都以為今日
（３１日）實係悶到暈收場。估佢唔到，Ａ場突然有好消息傳出，首先ＭＳＣＩ傳會喺６月１５
號公布開綠燈畀Ａ場加入；高盛亦改口風，話「入摩」機會升到去七成。Ａ場缸友立即衝入市撈
底；再加埋有券商估計，阿爺當日仲可能會宣布埋「深港通」出台，實行好上加好！
兩大好消息帶動下，Ａ場即時攻破２９００，收漲逾３巴仙報２９１６；創業板炒高５巴仙
。「深港通」受惠股ＱＱ（００７００）同中宇輩金融股齊齊領軍，香江亦士氣大漲，恆指最高
踢高近３００點見２０９７４，差ＤＤ就收復二萬一關。
不過，收市之後ＭＳＣＩ中國指數調整，基金喺完場前換馬，當中最後一分鐘成交近３０７
億銀，魚缸全日成交急增至約１０３１億銀。恆指埋單得番１８５點進帳，收２０８１５，國指
收升８０點報８７０４。但恆指成功連升六日，都可喜可賀！
「五窮」月先苦後甜，全月埋單跌２５１點。
＊五窮不太窮皆因好後勁，摩指執執位臨尾成交激＊
６月猛料浪接浪，先傳「深港通」通車，又傳ＭＳＣＩ納入Ａ股，靠魚缸成交搵食嘅生發發
（００３８８）夠晒過癮，全日行前接近２巴仙報１８６銀，連５０天線（１８４﹒９１銀）都
收復埋。券商股更係興奮到爆，比較細嘅平安證券（００２３１）、君陽金融（００３９７）同
華富國際（００９５２）都爆上近１６巴仙、近１２巴仙同近１１巴仙。大隻啲嘅神州券商例如
廣發（０１７７６）同華泰六八八六（０６８８６）開香檳慶祝，邁出約半成！
Ａ仔場受消息影響，大漲超過３巴仙，悶到發咗霉嘅Ａ股ＥＴＦ終於起飛，南方Ａ５０
（０２８２２）同Ｘ安碩Ａ５０中國（０２８２３）都踏出超過３巴仙同接近４巴仙。兩個內險
大佬國壽（０２６２８）同平保（０２３１８），亦都跑上約２巴仙，收市分別報１７﹒３８銀
同３４７﹒７銀。
＊Ａ仔真靚仔ＥＴＦ有勢，市好券商好內險亦唔曳＊
ＭＳＣＩ中國指數收市後正式換馬，獲納入嘅三生製藥（０１５３０），預期追蹤該指數嘅
被動基金所需買盤約３億銀，今日率先升近１巴仙，報７﹒５７銀。
被踢走嘅越秀地產（００１２３）、神州租車（００６９９）、中集集團（０２０３９）及
大唐發電（００９９１）走勢各異，越秀地產同大唐發電分別踢高１巴仙同近２巴仙，但神州租
車同中集集團就齊齊腳軟近１巴仙。
＊三生成新貴舊再不閉翳，港鐵又加價破頂向前駛＊
缸外發出酷熱天氣警告，缸內同樣ｖｅｒｙ ｈｏｔ，但超人系就大落後。長建
（０１０３８）無厘神氣，逆市跣低０﹒３巴仙收７２﹒７銀；電能（００００６）腳軟
０﹒５％，報７５﹒３５銀。長實（０１１１３）澄清無減持匯賢產業（８７００１），前者一
度行前１巴仙，可惜最終無升跌，埋單４８﹒６５銀。
康師傅（００３２２）之前放榜畀幾間賓架唱到一棟都冇，兩日內插足一成半，今日終於扭
轉頹勢，反彈逾３巴仙，報７﹒０６銀，仲係最叻藍戰士添！
港鐵（０００６６）下月２６日又按可加可減機制加價２﹒６５巴仙，即日第二程９折優惠
仲會縮水。香江乘客負擔更重大嘆無奈，缸友卻賺到四萬咁口，港鐵係最大贏家，發力衝前逾１
巴仙，報３６﹒８５銀，試過破頂見３７﹒２５銀！
＊５４７批盪企展十合一，嘉域今回吐高銀系熱炒＊
數字王國（００５４７）打算折讓１８巴仙配股淨籌超過３﹒４億銀，本來一度插低逾１１
巴仙，不過粉絲好快就回心轉意，最終都只係微跌近半成，收報０﹒５８銀。
企展（０１８０８）仲慘，打算「十合一」，股價急瀉１３巴仙，埋單０﹒０５８銀，盤中
低見０﹒０５４銀創埋上市新低。
噚日急升超過兩倍嘅嘉域（００１８６）今日回番近１２巴仙，報０﹒４８５銀。
高銀系有炒作，雖然高銀金融（００５３０）主席潘蘇通上禮拜四（２６日）減持３５萬股
，但高銀金融同高銀地產（００２８３）今日分別炒高近２８巴仙同近１４巴仙，報６﹒８銀同
３﹒４５銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
