《小傳日記》花旗多間巨擘成績表都有意外驚喜，支持道指再創新高。雖然噚晚（２０日）
又係「象徵式」踢高３６點１８５９５點，但連升九日都未斷纜，認真巴閉！不過孖屐開始蠢蠢
欲炒美聯儲局提早加息，缸友都要小心呀！
另一方面，東瀛國傳出加碼放水，而歐洲央行今晚又傾議息，雖然估計會按兵不動，但香江
魚缸今朝（２１日）都有力衝高，恆指開市漲８９點報２１９７１；加上祖國移動
（００９４１）獲大行護航發威領軍，帶領大市抽高至２２１１８，又創今年新高。雖然尾市縮
晒水，只得１１８點進帳，但啱啱好企穩二萬二收市，好友都算交足功課。國指表現就一般，收
升３３點報９０５７。全日成交多番近１２巴仙至６５３億銀，都唔算太靜局了。
＊巨擘成績靚道指甚標青，中移撐大市紅底都話正＊
瑞信認為神州電訊業受政策影響嘅風險唔大，加埋４Ｇ業務會令到電訊商收入錄得增長，三
大電訊商齊齊予「優於大市」評級。祖國移動獲予目標價１２３﹒５銀，今日企高近４巴仙，收
報９８銀，成為最佳藍戰士之餘，亦離紅底股之列只差一小步。聯通（００７６２）及中電信
（００７２８）就分別有逾３巴仙及６巴仙進帳。
近日ＶＲ同ＡＲ概念大熱，相關魚仔愈游愈遠。瑞聲（０２０１８）呢排經常獲大行唱好，
股價再游前逾１巴仙，收７０﹒３銀，續創上市新高。舜宇（０２３８２）仲厲害，斬穫逾３巴
仙，收報３０﹒１５銀，齊齊破頂。
臨收市前，突然傳出神華集團同中廣核「結婚」喜訊，成為資產規模高達２０４０億美金嘅
公用事業巨頭。不過仲未獲得祖國多個部門批准，成唔成事都未知數。但相關股仔即落鑊，中廣
核電力（０１８１６）、中廣核新能源（０１８１１）、同中廣核礦業（０１１６４）分別飆升
９巴仙、７巴仙及１５巴仙！而神華（０１０８８）就收復失地，埋單無升跌收１４﹒７４銀。
＊兩Ｒ續熱炒股仔紛破頂，神華中廣核報喜心情靚＊
多間賓架繼續唱好樓市，大摩噚日就估下半年會升半成，今日輪到瑞信預期全年只跌５巴仙
，比原先預測嘅１５巴仙少得多。新世界（０００１７）更加獲上調評級至「跑贏孖屐」，應聲
彈高近２巴仙，報８﹒８７銀；長實（０１１１３）目標都升到６２﹒２銀，結果衝前逾２巴仙
，報５４﹒７５銀。另一磚頭大佬九倉（００００４）亦跳高１巴仙，收５２﹒９銀，仲曾經創
逾一年高５４﹒１銀。
歐洲央行會喺今晚舉行政策會議議息，相信都係按兵不動。渣打（０２８８８）率先跑前逾
２巴仙，報６３﹒１銀。大象（００００５）一名外匯主管有傳涉嫌外匯交易欺詐畀花旗國拉咗
，但佢唔理咁多，微微踢高唔夠１巴仙，埋單５０﹒４５銀。
＊歐央行議息渣打跑得快，中旅發盈警掟貨實難怪＊
ＱＱ（００７００）今日表現反反覆覆，升吓又跌吓，一度破頂高見１８６﹒５銀，但全日
腳軟近１巴仙，報１８４﹒６銀。不過，瑞信讚ＱＱ移向廣告業務毛利率上升，更一次過將「他
屐」提升逾兩成至２３０銀！
中旅（００３０８）就唔多生性，發盈警預期中期綜合純利大跌６９巴仙，即刻瞓低近７巴
仙，報２﹒２９銀。但都冇科瑞（０８１０９）咁慘，即使之前獲有軍方背景嘅中軍金控入股半
成，仍然急插近４１巴仙，得返０﹒２１７銀。
維達（０３３３１）雖然先前公布中期少賺３巴仙，但里昂、大和依然上調目標，佢亦大舉
反彈９巴仙，報１４﹒５８銀。街坊恆安（０１０４４）都唔好彩，跟住碌低近３巴仙，報
６５﹒６銀。
＊大行來關照維達認真俏，金股頭耷耷水泥升到笑＊
海螺水泥（００９１４）獲摩通喺上星期一（１１日）同四（１４日）合計揼咗１﹒７６億
銀增持。獲得大行力撐，股價亦穩步上揚近５巴仙，收報２０﹒４５銀。街坊金隅
（０２００９）更有逾６巴仙落袋，收報２﹒８９銀。中國建材（０３３２３）就得近１巴仙進
帳。
美金強勢，加埋股市暢旺，金價碌低至３周最低水平。招金（０１８１８）受累跌低近３巴
仙，收報８﹒５５銀。紫金（０２８９９）就輕微碌低唔夠半巴仙，恆興黃金（０２３０３）亦
唔見逾２巴仙。至於早前母企獲批轉讓２﹒２億股嘅靈寶黃金（０３３３０）今日跑贏同業，企
高逾８巴仙，收報２﹒０６銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
