《小傳日記》香江魚缸噚日（２５日）收市Ｕ盤前後嘅收市價都無變動？原來係恆指公司「
蝦碌」，因為收市數據傳送延誤，令到收市報價有問題；並且更正番全日應該係跌５﹒８３點收
２２８１４﹒９５點，而國指就係９５０４﹒７８點跌２﹒３１點。咁啱得咁橋，原來噚日就係
重推收市Ｕ盤一個月…
睇番今日（２６日）個市。花旗聯儲局主席耶倫今晚開金口前，是「鷹」是「鴿」在
Ｊａｃｋｓｏｎ Ｈｏｌｅ會上露端倪，而香江好友亦重奪主導權。今日大市反覆偏好，恆指收
升９４點報２２９０９，國指都有４５點進帳報９５５０。不過成交明顯未配合，只得５４５億
銀，而且十天線都未收復到，缸友唔好以為暴風雨已經過咗去呀！
＊車股炒業績榮辱相互見，瑞聲輕踏前舜宇更高興＊
業績期近尾聲，今日見好多砵砵車趕住一齊出成績表，東風（００４８９）中午出業績，半
年少賺近２巴仙至近６８億人仔，午後一開波即刻倒跌，全日後退近７巴仙，收報８﹒１７銀；
華晨（０１１１４）收市後先派成績表，績前先炒起近６巴仙，報８﹒６２銀。早前放咗榜嘅吉
利（００１７５）今日衝前近４巴仙，報６﹒０７銀，高見６﹒１７銀創９年高位，勁！
建行（００９３９）半年賺１３３４億人仔，按年多１巴仙多Ｄ，瑞信話佢資產質素轉穩，
係行內首選，畀「優於大市」評級；德銀就話佢收入弱，但照畀「買貨」評級。結果今日逆市唔
見近１巴仙，報５﹒７７銀。街坊信行（００９９８）亦腳軟軟，半年多賺半成至２３６億人仔
，另打算發行最多４００億人仔可換Ａ仔債券，今日軟唔夠半個巴仙，報５﹒０２銀。
＊師傅將放榜先來兜番轉，牛牛繼續牛創一年高位＊
康師傅（００３２２）下周一（２９日）放榜，今日率先跳起近半成，報８﹒０１銀，但缸
友們要注意，下周五（２日）收市後康師傅將會被正式踢出藍戰士行列。街坊旺旺
（００１５１）亦都彈高逾４巴仙，報５﹒３５銀。
蒙牛（０２３１９）績後升唔停，噚日抽高近１２巴仙之後，今日再向前衝近６巴仙，高見
１５﹒９６銀創一年高位。
將會取代康師傅成為新一代藍戰士嘅瑞聲（０２０１８）出咗業績，半年多賺９巴仙至近
１４億人仔，全日漲近２巴仙，報８２銀；舜宇光學（０２３８２）今日曾經升破４０蚊破頂，
高見４０﹒７銀，最終踢高近７巴仙，埋單４０﹒１銀。
＊潤地有大刁升得認真爽，大行撐壽仔粉絲心花放＊
今日繼續有唔少公司派成績表，潤地（０１１０９）中期盈利多賺近兩成有７６﹒８億銀，
而且用６２億銀收購深圳商住同停車場項目，踢高近４巴仙，收報２１﹒４５銀。
國壽（０２６２８）中期少賺６７巴仙得１０３﹒９５億人仔，但仍然得到高盛唱好，予
「買入」評級，目標價２６銀。粉絲當然開心喇，即入貨支持，埋單升逾３巴仙，收１９﹒０８
元。
中興（００７６３）就陰功豬喇！中期雖然多賺９巴仙，但業績未能利好股價，主要因為中
興喺美國正被調查，瑞信都話依件事影響比預期大。中興趴低逾８巴仙，收報１０﹒５８銀。
利豐（００４９４）半年少賺近５２巴仙得７２００萬美金，大和同摩通亦毫不留情地降低
利豐嘅目標價，跣低近４巴仙，收報３﹒８銀。
＊中興與利豐歎句陰功豬，恆和忽炒高中途要停賽＊
恆和（００５１３）傳出旗下中環恆和中心大部分業權，獲神州財團出價１０億銀洽購至尾
聲，有望短期內易手。望返恆和以噚日收市價０﹒１１６銀計，市值唔夠８億銀。如果賣得成，
特別息應該走唔甩卦？！恆和今朝炒高４５巴仙後中途停賽，停牌前報０﹒１６８銀。公司停賽
後講明會就出售物業公司權益公布內幕消息，睇嚟應該好事近喇！
唐宮（０１１８１）宣布派特別息６仙，公司中期純利升四成至４１０１萬銀人仔。派特息
自然吸引唔少缸友支持，助唐宮踢高近２７巴仙，收報２﹒２３銀。京西（０２３３９）半年多
賺近１３巴仙至逾１億銀，全日進帳近１８巴仙，收報０﹒２１３銀。
阿里巴巴完成入主亞博科技（０８２７９），公司將會成為阿里巴巴同埋螞蟻金服體系內申
請同埋持有彩票運營資格嘅唯一業務平台。講返近排盛傳螞蟻金服會嚟香江上市，螞蟻金服概念
股喺神州熱炒，嚟到香江當然唔好畀佢停。亞博科持今日亦飆高２１巴仙，收報１﹒６７銀。假
期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
