《小傳日記》魚缸有點靜，暴風雨前夕？

　　《小傳日記》香江淡友噚日（２４日）突襲成功，魚缸十天線不保。雖然今日（２５日）個
市又靜番落嚟，高低波幅只得約１６０點，但其實數數手指，距離業績期「閉幕」得番四日，仲
有一大班中資公司未派成績表，加上花旗聯儲主席耶倫將會喺香江時間明晚發表講話，缸友未來
呢幾日真係要綁好安全帶喇！
　　魚缸觀望氣氛咁濃，浮浮沉沉咗成日都上唔番十天線（約２２９０１），埋單微升６﹒０９
點收報２２８２６﹒８７，國指就收跌６﹒８８點報９５００﹒２１。
　　咦？點解今日小傳連小數點都報埋？事關今日好奇怪，兩個指數喺４點個價，同Ｕ盤後嘅收
市價係一模一樣。「典」解嘅？？全日成交仍未見起色，悶市下只得６８０億銀左右。　　

＊Ｕ盤前與後指數無變動？魚缸靜蠅蠅後市不輕鬆＊

　　股東ＣＤＨ放棄控股萬洲（００２８８），以折讓５巴仙掟近１１巴仙股權。完成後，
ＣＤＨ唔再係控股股東，而另一股東雄均持股會增持至約３６巴仙。唔少缸友視今次折讓減持為
睇淡公司前景，累萬洲今日趴底逾４巴仙，收報６銀。
　　信置（０００８３）全年賺少咗２４巴仙得７１億銀，缸友唔滿意之餘，花旗亦踩埋一份，
降級至「中性」，目標睇１３﹒７銀。信置只好走低逾２巴仙，收報１３﹒５４銀。
　　中糧包裝（００９０６）早前公布半年業務麻麻，賺少咗２３巴仙，但股價勝在夠殘。繼噚
日輕微升逾２巴仙後，今日再斬穫近１４巴仙，收報３﹒７５銀。勁！
　　
＊大好友退步股價即碌低，中石油海油雙雙有點翳＊

　　中石油（００８５７）中期純利大插９８巴仙得返５億銀人仔多啲。中海油（００８８３）
仲慘，中期盈轉虧蝕逾７７億人仔，認真陰功，但好在照派息。不過油價低迷係不爭事實，孖屐
都心裏有數油企難有好成績，中石油及中海油只係碌低近１巴仙，收報５﹒２２銀及９﹒５２銀
。
　　蒙牛（０２３１９）半年少賺近兩成得１１億銀人仔，但仍然獲得德銀唱好，繼續叫「掃貨
」。缸友亦好聽話，掃高近１２巴仙，收報１４﹒５８銀，為最好打藍戰士。
　　保利協鑫（０３８００）中期大升逾１倍至近１４億銀人仔，麥格埋繼續唔畀面予「跑輸大
市」評級，但「他屐」就升至０﹒９８銀。保利協鑫仍要趴低逾４巴仙，收報１﹒１２銀。
　　銀娛（０００２７）中期多賺２６巴仙至近２６億銀，雖然無中期息派，但有１８仙特別息
畀返股東。中午放榜後，銀娛扭轉跌升，埋單計倒升逾２巴仙，收報２６﹒３５銀。

＊德國佬祝福蒙牛認真牛，銀娛好成績午後跳隻舞＊

　　祖國錢莊建行（００９３９）今日會派成績表，今日率先踢高逾１巴仙，收報５﹒８２銀，
曾高見５﹒８５銀創今年高位；交行（０３３２８）亦同樣今日放榜，微升唔夠半個巴仙，報
５﹒７３銀。工行（０１３９８）下個禮拜二（３０日）先出成績，今日跟升近１巴仙，埋單
４﹒９３銀。
　　早前發過盈警（預期半年少賺６５巴仙至７０巴仙）嘅國壽（０２６２８）收市後會公布業
績，該股自１６號起已累跌超過半成，今日踢高１巴仙，收報１８﹒４６銀；中國太平
（００９６６）中午公布半年少賺４７巴仙至３１億，唔派息，今日曾升近１巴仙，結果微跌唔
夠半個巴仙，報１６﹒０４銀。

＊內銀續放榜攜手輕踏前，傳滬控房策大小股齊軟＊

　　傳上海會收緊政策，抑制樓價同地價上漲，內地磚頭即刻淆曬底，富力地產（０２７７７）
畀麥格理降評級去到「中性」，創七年高位１３﹒５６銀之後倒跌，大跌半成收場，報１２﹒８
銀；中海外（００６８８）今日連跌第４日，又唔見近３巴仙，收報２５﹒３５銀；潤地
（０１１０９）聽日放榜，亦都跣低逾２巴仙，報２０﹒６５銀。
　　一號超人（００００１）畀富瑞降目標價去到１１７蚊，評級「買貨」，今日飛低近１巴仙
，報９８銀。
　　北汽（０１９５８）中期多賺１１巴仙至２４億銀人仔，瑞信同摩通亦齊齊唱好。北汽滿心
歡喜，高飛近９巴仙，收報７﹒３５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。