《小傳日記》颱風「莎莉嘉」雖然已經登陸咗，噚晚（１８日）天文台都除下所有風球，改
發強烈季號風。點知「一波未平，一波又起」！強颱風「海馬」聽日又會殺入香江，到時可能又
會掛起１號波。雙颱風影響，今日（１９日）下晝１點鐘，天文台發出黃雨警告信號，兩個半鐘
後改發紅色，收市時就即改掛黑色！呢個風威力都幾勁，坊間仲話周五（２１日）有機會掛八號
添！
缸外天有不測之風雲，缸內亦風高浪急；無論缸外或缸內，都要做足防風準備喇！
講番缸內世界先，噚晚花旗繼續派成績表，企業季績理想，道指收高７５點報１８１６１點
。不過香江缸友都按兵不動，今朝恆指低開不足１點報２３３９３，之後阿爺公布第三季ＧＤＰ
增６﹒７巴仙，無咩驚喜，大市又繼續喺五十天線（２３２９０）浮浮沉沉，完場時碌低８９點
報２３３０４，國指唔見７８點報９６４１。
風大雨大，又驚打大風，缸友都離場觀戰，全日成交只得５４５億銀。
＊黃雨變紅雨紅雨變黑雨，缸內與缸外扣好安全帶＊
大隻仔國壽（０２６２８）生意麻麻要發盈警。各大行收到後都好失望，瑞信直頭估國壽全
年都好難達到孖屐預期，削盈測１７巴仙。國壽腳軟趴低近３巴仙，收報２０﹒１５銀。聯通
（００７６２）都預料首三季亦都好肉酸，大跌８１巴仙。瑞信一樣唔畀面，削佢今年盈測４４
巴仙，聯通一同趴低逾１巴仙，收報９﹒４６銀。
鎊匯噚日上升番Ｄ，渣打（０２８８８）更傳出可以收返「咖喱國」企業Ｅｓｓａｒ償還
２１億美金貸款。失而復得，自然喜極而泣，渣打逆市踢高近２巴仙，收報６４﹒２５銀。大笨
象（００００５）同長建（０１０３８）叫做逆市企穩，分別收報５９﹒０５銀及６３銀。
＊壽仔發盈警跌到眼定定，渣打失復得開心到哭泣＊
新奧（０２６８８）呢幾日都有大金額大手出現，而股價喺３８蚊屢見支持，噚日輕微彈高
逾１巴仙後，今日再斬穫近５巴仙，收報４０﹒２５銀，所有主要平均線全部收復晒，厲害！
豬肉佬萬洲（００２８８）噚日獲法興唱好，有機會染藍後，今日再度踢高逾１巴仙，收報
７﹒０６銀，創埋上市新高。除此之外，原來今日有位同行中糧肉食（０１６１０）招股，難怪
孖屐有借口炒影子股喇！
中芯國際（００９８１）獲野村唱好，因為受惠神州客仔需求增加，預期ＥＢＩＴＤＡ利潤
率都有望上升。中芯國際今日跳升逾３巴仙，收報０﹒９９銀，離蚊股只差一步。
建滔績層板（０１８８８）呢兩日錄得唔少大手交易，今日跣低逾３巴仙，收報７銀，跌穿
十天線同廿天線，睇嚟７銀關支持力度仍然好大！
＊新奧跳隻舞萬洲炒影子，大行齊踐踏中車時即跌＊
中車時代（０３８９８）今年頭９個月純利得１９億人仔，按年跌１﹒４巴仙，瑞信話業績
令人失望，連同高盛、美銀美林一齊降「他屐」，中車時代今日碌低逾４巴仙，報３９﹒２銀。
其他鐵路佬就兩邊走，中鐵（００３９０）微微跣低０﹒３巴仙，報６銀；中車（０１７６６）
就駛前近１巴仙，收７﹒２銀。
一班砵砵車銷售股逆流走上，寶信（０１２９３）獲瑞信維持「跑贏孖屐」評級，飆前逾６
巴仙，報２﹒５銀。正通汽車（０１７２８）、大昌行（０１８２８）跟尾衝前４同逾２巴仙，
埋單２﹒５７同３﹒２９銀。
＊奇峰炒私有砵砵多人追，君陽見異樣半新丁散水＊
奇峰化纖（００５４９）控股股東考慮緊提出自願全面收購要約，將公司私有化。隻股今日
復出缸湖一度彈高近１９巴仙，高見逾一年高位１﹒０２銀，但最後只能夠行前７巴仙，報
０﹒９２銀。
君陽金融（００３９７）大成交落鑊，一支火箭飛起逾１５巴仙，報０﹒２４７銀，成交涉
及１﹒５１億股，足足係平日日均嘅８倍。
部分半新丁出現散水潮，沛然環保（０８３２０）急插近３７巴仙，得返０﹒４０５銀，仲
係全日最差魚仔，但依然比配售價０﹒２８元高近４５巴仙。駿高（０８０３５）都唔好得去邊
，瀉走逾１２巴仙，收報０﹒３２銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
