《古臣周記》近一兩年,香港唔少人和事不斷衝擊阿臣對社會嘅認識。由廉政公署嘅湯顯明
到李寶蘭事件,話畀大家知廉潔依個香港核心價值同繁榮基石其實可以好脆弱。又由細到大深信
香港實行三權分立,避免一權獨大影響營商環境,但突然會有一堆人話你知從來冇依回事,三權
分立只係「影子」。
又好似股市咁,讀書時老師成日同你講「投資者係理性嘅」,但實情唔少股民都將「投機」
當成「投資」。早兩日傳出「三馬」馬雲、馬化騰同平保(02318)董事長馬明哲成立嘅眾
安保險,會搵埋萬贏證券等喺廣州南沙自貿區成立一家「恆贏證券」。唔需要咩理由,就因為黐
到大孖沙,已經足夠令持有萬贏證券嘅威華達(00622)喪炒特炒,飆升逾67%後停牌。
理性?大家都係跟風啫!遲吓正式開通埋「深港通」,A股大媽炒風加碼傳入香港,到時真係「
沒有最瘋狂,只有更瘋狂」!
*國壽為國慘烈捐軀,平保信得過*
阿臣始終睇唔透細股仔嘅升跌嘅「邏輯」,唔敢亂入亂炒一通,而藍籌大股講政策影響、睇
業務基本面,雖然有根有據得多,但阿臣都有排學。
唔少內險陸續喺依個星期放榜,阿臣望一望啲新聞,話老大哥國壽(02628)今年第三
度發盈警,估計受投資收益下降拖累,第三季淨利會按年大跌60%,翻查資料國壽自舊年中國
股災要大手買A股幫阿爺托市以嚟,業績根本冇好過。相反平保驚喜不斷,中期投資收益話雖唔
見緊三分一,但純利「逆市」升近18%之餘,壽險新業務價值更加急升43%,跑贏一班同業
幾條街!
齋睇過往業績,平保一個字「掂」啊!聽日(27日)公布嘅第三季業績應該都冇問題,論
潛力股價要返返去股災前50蚊水平其實唔難吖!可惜古臣要等月尾出糧先有能力再注資古臣基
金,惟有暫時將平保放入shopping cart先啦!
表列截至10月26日止投資組合表現:
股份 股數 買入價 現價 總值
----------------------------------------
騰訊 100股 203﹒40元 214﹒60元 21460元
電能 500股 71﹒90元 72﹒95元 36475元
----------------------------------------
股票市值 :57935元
剩餘現金 : 3575元
組合淨值 :61510元
組合本周變化:+0﹒87%
組合本月變化:+1﹒06%(截至上月底止組合淨值:60865元)
組合累計變化:+2﹒52%(本金60000元)
*數據截至今日中午收市
【你點睇】的士記分制將於周末生效,你認為該制度可否幫助的士提升服務質素?► 立即投票